ଭୁବନେଶ୍ୱର :ପ୍ରଶ୍ନକାଳରେ କହିବାକୁ ସୁଯୋଗ ନ ମିଳିବାରୁ ଅସନ୍ତୋଷ ପ୍ରକାଶ କଲେ ବିଜେଡି ବିଧାୟକ ଉମା ସାମନ୍ତରାୟ। 13 ତାରିଖରୁ ଆଜି ଯାଏ ମିଳିଲାନି ସୁଯୋଗ। ଆମେ ବିଧାନସଭା ଆସିବୁ କାହିଁକି ବୋଲି ପ୍ରଶ୍ନକଲେ ବିଧାୟକ ଉମା ସାମନ୍ତରାୟ। ଶାସକ ଦଳ ବିଧାୟକଙ୍କ ବାଚସ୍ପତି ଏପରି ପ୍ରଶ୍ନ ଏବେ ଚର୍ଚ୍ଚାର ବିଷୟ l

ଭୁବନେଶ୍ୱର : ଟୋକନ ବ୍ୟବସ୍ଥାରେ ଚାଷୀ ମଣ୍ଡୀରେ ଧାନ ବିକ୍ରୀ କରିବେ । ଯୋଗାଣ ବିଭାଗର ଏପରି ନିଷ୍ପତିରେ ଚାଷୀ ଧାନ ମଣ୍ଡିରେ ବିକ୍ରୀ କରିପାରିଲେ ନାହିଁ । ଫଳରେ ଚାଷୀ ଆନ୍ଦୋଳନ ଉଗ୍ର ହେଲା ପଶ୍ଚିମ ଓଡ଼ିଶାରେ । ବିଭିନ୍ନ ଚାଷୀ ସଂଗଠନ ଏକାଠି ହୋଇ ଧାନ ବିକ୍ରୀରେ ଟୋକନ ବ୍ୟବସ୍ଥାକୁ ବିରୋଧ କଲେ । ଲୋକସଭାରୁ ବିଧାନସଭା । ଚାଷୀ ଧାନ ବି୍କ୍ରୀ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ଘେରିଥିଲେ ବିରୋଧୀ । ପଶ୍ଚିମ ଓଡ଼ିଶା ବି ଜୋର ଧରିଥିଲା ଚାଷୀ ଆନ୍ଦୋଳନ । ଏହାକୁ ନେଇ ଆରମ୍ଭରୁ ବିଧାନସଭାରେ ହଟଗୋଳ କରିଥିଲେ ବିରୋଧୀ କଂଗ୍ରେସ ଓ ବିଜେପି । ଟୋକନ ବ୍ୟବସ୍ଥା ଉଚ୍ଛେଦ ଦାବିରେ ଜିଦ ଧରିଥିବା ଚାଷୀଙ୍କ ଦାବିକୁ ଶେଷରେ ଗ୍ରହଣ କରିଛନ୍ତି ପଶ୍ଚିମ ଓଡ଼ିଶାର ଟାଣୁଆ ନେତା ତଥା ଶ୍ରମମନ୍ତ୍ରୀ ସୁଶାନ୍ତ ସିଂହ । କିପରି ଚାଷୀ ଆନ୍ଦୋଳନ ପ୍ରତ୍ୟାହାର ହେବ ସେନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଶ୍ଚିମ ଓଡ଼ିଶାର ବିଧାୟକଙ୍କୁ ନେଇ ଚାଲିଲା ବୈଠକ । ଯୋଗଣା ମନ୍ତ୍ରୀ ବି ଏହି ବୈଠକରେ ନିଜର ମତ ରଖିଥିଲେ । ଏହାପରେ ମନ୍ତ୍ରୀ ସୁଶାନ୍ତ ସିଂହ ନିଜ କାମରେ ଲାଗିପଡ଼ିଲେ । ସାଙ୍ଗରେ ସରକାରଙ୍କ ଦଳ ଉପ ମୁଖ୍ୟ ସଚେତକ ରୋହିତ ପୂଜାରୀଙ୍କୁ ସାଙ୍ଗରେ ଧରି ସୁଶାନ୍ତ ନିଜେ ସମ୍ମଲପୁର ଯାଇ ଚାଷୀଙ୍କ ସହ ଆଲୋଚନା କରିଥିଲେ । ବିଜେଡ଼ି ସବୁବେଳେ ଚାଷୀଙ୍କ ସ୍ୱାର୍ଥକୁ ଗୁରୁତ୍ୱ ଦେଇଛି ଓ ଆଜି ବି ଦେବ ବୋଲି ଶ୍ରମମନ୍ତ୍ରୀ ଆନ୍ଦୋଳନ କରିଥିବା ଚାଷୀଙ୍କୁ ବୁଝାଇଥିଲେ । ଶେଷରେ ତାଙ୍କ ଉପରେ ବିଶ୍ୱାସ ରଖି ଚାଷୀମାନେ ଆନ୍ଦୋଳନରୁ ହଟିଥିଲେ । ମନ୍ତ୍ରୀ ସୁଶାନ୍ତ ସିଂହ ଓ ବିଜେଡ଼ି ଉପମୁଖ୍ୟ ସଚେତକ ତଥା ରେଢ଼ାଖୋଲ ବିଧାୟକ ରୋହିତ ପୂଜାରୀ ବରେଇ ପାଲିରେ ପହଞ୍ଚି ଚାଷୀଙ୍କ ସହ ଆଲୋଚନା କରିଥିଲେ। ବୈଠକରେ ମନ୍ତ୍ରୀ ଓ ବିଧାୟକ ଟୋକନ ବ୍ୟବସ୍ଥାରେ ସରଳୀକରଣ କରାଯିବ। ଯେତେ ପରିମାଣରେ ଧାନ ଆଣିଲେ ବି ଚାଷୀ ମଣ୍ଡିରେ ଧାନ ବିକି ପାରିବେ। ସରକାରଙ୍କ ପକ୍ଷରୁ ଚାଷୀଙ୍କ ସବୁ ଧାନ ସଂଗ୍ରହ କରାଯିବ। ଜରୁରୀ ସମୟରେ ଟୋକନ ଜେନେରଟ କରାଯିବ। ଏଥିରେ ଚାଷୀଙ୍କୁ କୌଣସି ଅସୁବିଧା ହେବ ନାହିଁ ବୋଲି ଚାଷୀଙ୍କୁ ମନ୍ତ୍ରୀ ପ୍ରତିଶ୍ରୁତି ଦେଇଥିଲେ। ଏହା ପରେ କୃଷକ ପ୍ରତିନିଧିଙ୍କ ବୈଠକ ବସିଥିଲା। ଏହା ପରେ ଆନ୍ଦୋଳନ ପ୍ରତ୍ୟାହାର ଘୋଷଣା କରିଛନ୍ତି ଚାଷୀ ନେତା ଅଶୋକ ପ୍ରଧାନ। ଶ୍ରମମନ୍ତ୍ରୀ ସୁଶାନ୍ତ ସିଂହ ଯେପରି ସହଜରେ ପଶ୍ଚିମ ଓଡ଼ିଶାରେ ଚାଷୀ ଆନ୍ଦୋଳନକୁ ପ୍ରତ୍ୟାହାର କଲେ ଏଥିରୁୂ ବିରୋଧୀଙ୍କ ହାତରୁ ଗୋଟେ ପ୍ରସଙ୍ଗ ଛଡ଼ାଇ ନେଲେ । ତେଣୁ ଏବେ ବିଜେଡ଼ି ପାଇଁ ପଶ୍ଚିମ ଓଡ଼ିଶା ହିରୋ ସାଜିଛନ୍ତି ମନ୍ତ୍ରୀ ସୁଶାନ୍ତ । କାରଣ ବିଧାନସଭାରେ ମନ୍ତ୍ରୀ ଟୋକନ ବ୍ୟବସ୍ଥା ପ୍ରତ୍ୟାହାର କରାଯିବ ନାହିଁ କରିବା ପରେ ପଶ୍ଚିମ ଓଡ଼ିଶା ଚାଷୀ ଆନ୍ଦୋଳନ ଜୋର ଧରିଥିଲା ।

ଭୁବନେଶ୍ବର () ବିଧାନସଭାରେ ଡଙ୍କାରୀ ଝଡ l ଯାଜପୁର ଜିଲ୍ଲା ଡଙ୍କାରୀ ପାହାଡର ଲଘୁ ଖଣିଜ ସମ୍ପଦକୁ ରାଜନେତା-ପ୍ରଶାସକ-ପୋଲିସର ତ୍ରିକୋଣୀୟ ମେଣ୍ଟ ଲୁଟି ନେଇଛନ୍ତି । ପାହାଡ ବିକ୍ରି କରି ଦଲାଲମାନେ ରାଜନେତା ଓ ପ୍ରଶାସକଙ୍କୁ ମୋଟା ଅଙ୍କ ଦେଇଛନ୍ତି । ସରକାର 2016ରୁ ଏହାର ସୁରକା ପାଇଥିଲେ ବି କାର୍ଯ୍ୟାନୁଷ୍ଠାନ ନେଇ ନାହାଁନ୍ତି । ଆଜି ଏ ସମ୍ପର୍କିତ ମୁଲତବୀ ପ୍ରସ୍ତାବ ଆଲୋଚନାରେ ବିରୋଧୀ ଅଭିଯୋଗ କରିଥିଲେ । ରାଜସ୍ବ ମନ୍ତ୍ରୀ ସୁଦାମ ମାର୍ଣ୍ତ ସ୍ବୀକାର କରିଛନ୍ତି ଯେ, ଡଙ୍କାରୀ ପାହାଡ ଲିଜ ନେଇଥିବା ଶିବାସ ଜେନାଙ୍କ ଠାରୁ ସରକାର 58 କୋଟି 62 ଲକ୍ଷ ଟଙ୍କା ରୟାଲଟି ଆଦାୟ କରିପାରିନାହାଁନ୍ତି ।
ଡଙ୍କାରୀ ପାହାଡରୁ ବେଆଇନ ଭାବେ ବହୁମୂଲ୍ୟ କଳା ପଥର ଖନନ ହେଉଛି ଏବଂ ବାହାରକୁ ଚାଲାଣ ହେଉଛି । ଏ ସମ୍ପର୍କରେ 2016 ମସିହାରେ ତତ୍କାଳିନ ଜିଲ୍ଲାପାଳ ରାଜ୍ୟ ସରକାରଙ୍କୁ ଅବଗତ କରିଥିଲେ । ପାହାଡକୁ ନିଶ୍ଚିହ୍ନ କରିଦେବାକୁ ଚେଷ୍ଟା କରାଯାଉଥିବା କଥା ଉଲ୍ଲେଖ କରି 10 ଜଣ ଆରଆଇଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଜଣାଇଥିଲେ । ଏପରିକି 2016 ଅଗଷ୍ଟ 6 ତାରିଖରେ ଜିଲ୍ଲାପାଳ ରାଜସ୍ବ ସଚିବଙ୍କୁ ଚିଠି ଲେଖି 6 ଜଣ ଉପଜିଲ୍ଲାପାଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରିଥିଲେ । ସେହି ବର୍ଷ ଜୁନ ମାସରେ ତତ୍କାଳିନ ଖଣି ନିର୍ଦ୍ଦେଶକ ମଧ୍ୟ ବେଆଇନ କଳା ପଥର ଚାଲାଣ ନେଇ ଜିଲ୍ଲାପାଳଙ୍କୁ ରିପୋର୍ଟ ମାଗିଥିଲେ । କିନ୍ତୁ 3 ବର୍ଷ ଧରି କାହିଁକି କାର୍ଯ୍ୟାନୁଷ୍ଠାନ ହେଲାନି । କିଏ ସେମାନଙ୍କୁ ସୁରକ୍ଷା ଦେଉଛି ବୋଲି ପ୍ରଶ୍ନ କରିଥିଲ ବିରୋଧୀ ଦଳ ଉପନେତା ବିଷ୍ଣୁ ସେଠୀ ।
ଦୈନିକ ଡଙ୍କାରୀରୁ ଦୁଇ କୋଟି ଟଙ୍କାର ଖଣିଜ ସମ୍ପଦ ଲୁଟ ହେଉଛି । ଏହି ଲୁଟରେ ସମ୍ପୃକ୍ତ ଲୋକଙ୍କର ସ୍ମିତାରାଣୀ ମୃତ୍ୟୁ ଘଟଣା ସହ ମଧ୍ୟ ସମ୍ପର୍କ ରହିଛି । ସ୍ମିତାରାଣୀ ମୃତ୍ୟୁ ସହ ଜଡିତ ରୁପେଶ ଭଦ୍ରା ଜଣେ ସାମାନ୍ୟ ଚା ଦୋକାନରୁ କୋଟିପତି ହେଲେ କେମିତି । ଦୈନିକ ତାଙ୍କ ଆକାଉଣ୍ଟରେ କୋଟି କୋଟି ଟଙ୍କା ନେଣ ଦେଣ ହେଉଛି କେମିତି । ଏସବୁ ତଦନ୍ତ ସାପେକ୍ଷ ବୋଲି ବିରୋଧୀ ଦଳ ଦାବି କରିଛି । କେବଳ ଡଙ୍କାରୀ କାହିଁକି ବଲାଙ୍ଗିର, ଋଷିକୂଲ୍ୟା, ଖୋର୍ଦ୍ଧା ସବୁଠି ଲଘୁ ଖଣିଜ ସମ୍ପଦର ବେଆଇନ ଚାଲାଣ ହେଉଛି ବୋଲି ବିରୋଧୀ ଅଭିଯୋଗ କରିଥିଲେ ।
ବିଭାଗୀୟ ମନ୍ତ୍ରୀ ସୁଦାମ ମାର୍ଣ୍ତି ଏହାରର ଉତ୍ତରରେ ସ୍ବୀକାର କରିଥିଲେ ଯେ, ଡଙ୍କାରୀ ପାହାଡ ଲିଜଧାରୀ ଶିବାସ ଜେନାଙ୍କ ଠାରୁ 58 କୋଟି 62 ଲକ୍ଷ ଟଙ୍କା ସରକାର ଆଦାୟ କରିପାରିନାହାଁନ୍ତି । ହାଇକୋର୍ଟ ଧର୍ମଶାଳା ତହସିଲଦାରଙ୍କ ଆବେଦନକୁ ଖାରଜ କରିଥିଲେ । ପରେ ସୁପ୍ରିମ କୋର୍ଟରେ ଏହି ମାମଲା ବିଚାର ଅପେକ୍ଷାରେ । 2018ରେ ନ୍ୟାସନାଲ ଗ୍ରୀନ ଟ୍ରିବୁନାଲଙ୍କ ନିର୍ଦ୍ଦେଶରେ ଏକ ତଦନ୍ତ କରାଯାଇ ଡଙ୍କାରୀ ପାହାଡର କଳା ପଥର ଖଣିର ପରିବେଶ ମଂଜୁରୀ ରଦ୍ଦ କରାଯାଇ ଉତ୍ତୋଳନ ବନ୍ଦ କରାଯାଇଛି । ବେଆଇନ ଚାଲାଣକୁ ରୋକିବା ପାଇଁ ଡଙ୍କାରୀରେ ଏକ ପୋଲିସ ଫାଣ୍ଡି ପ୍ରତିଷ୍ଠା କରାଯିବା ସହ ଥାନାରେ ଗୋଟେ ପ୍ଲାଟୁନ ଫୋର୍ସ ମୁତ୍ତୟନ ହେବେ । ରାଜସ୍ବ ନିରୀକ୍ଷକଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ପରିବେଶ ଆଇନ ଉଲଂଘନକାରୀଙ୍କ ବିରୋଧରେ ମଧ୍ୟ ଚଣ୍ତିଖୋଲ ଜେଏମଏଫସି କୋର୍ଟରେ ମାମଲା ଦାୟର କରାଯାଇଛି ବୋଲି ରାଜସ୍ବ ମନ୍ତ୍ରୀ କହିଛନ୍ତି ।