ବନ୍ଦୀ ପଡିଛି ମାନବିକତା
କିଛି ଟଙ୍କା, ପଦବୀ ଆଉ କ୍ଷମତାରେ ଅନ୍ଧ ଥିବା ବ୍ୟକ୍ତି ମାନଙ୍କ ପାଇଁ ମାନବିକତା ଆଜି ବନ୍ଦୀ ଜୀବନ କାଟୁଛି. ମଣିଷ ଭିତରେ ଏ ବନ୍ଦୀର ଜାଲ ଏତେ ମାତ୍ରରେ ରହିଛି ଯେ ସେଥିରୁ ସେ ବାହାରିପାରୁନି.ସମାଜରେ ବସବାସ କରି ମଧ୍ୟ ସେ ସାମାଜିକ ଜୀବନ ଭିତରେ ଚଳିପାରୁନାହିଁ. କିଛି ଟଙ୍କା, ପଦବୀ ଆଉ କ୍ଷମତାର କ୍ଷଣସ୍ଥାୟୀ ଶକ୍ତି ପାଇଁ ତାହା ଭିତରେ ଅହଂକାର ଏତେ ମାତ୍ରାରେ ବଢ଼ିଯାଉଛି ଯେ ସେ ତାର ମାନବିକତାକୁ ଭୁଲି ଯାଉଛି. ମଣିଷ ହୋଇ ମଧ୍ୟ ସମାଜରେ ବସବାସ କରୁଥିବା ଅନ୍ୟ ମଣିଷକୁ ସେ ମଣିଷ ବୋଲି ଭାବୁନାହିଁ. ତାର ବ୍ୟବହାର, କଥା ବାର୍ତ୍ତା ଠାରୁ ଆରମ୍ଭ କରି ନୀତି ଦିନ ଜୀବନ ଶୈଳୀ ଆଜି ଆମ ସାମାଜକି ବ୍ୟବସ୍ଥାରେ କଳଙ୍କ ଲଗାଇଛି.ଆରେ ଭାଇ ମାନବିକତାକୁ ଟିକେ ଚି଼ହ୍ନ, ନିଜକୁ ଚି଼ହ୍ନ ଓ ଭଗବାନ ତମକୁ କାହିଁକି ଏ ସଂସାରକୁ ପଠାଇଛି ତାହା ଜାଣ. କଥାରେ ଅଛି ଆଜି ଯେ ରାଜା କାଲି ସେ ଫକୀର. ତେଣୁ ଏତେ ଗର୍ବ ଓ ଅହଂକାର କାହିଁକି. କାଲି ନା କିଛି ଥିଲା ତମର, ନା ଆଜି ଯାହା ଅଛି ତମ ପାଖରେ ସେ ବି ତମର. କେବଳ ସମୟ ଅନୁସାରେ ସେ ସବୁ ଆସିବ ଆଉ ଯିବ. ଆଉ ଡେରୀ ନକରି ଚାଲ ନିଜକୁ ଚିହ୍ନିବା ଓ ନିଜ ଭିତରେ ଥିବା ଅମୁଲ୍ୟ ମାନବିକତାର ଧନକୁ ଜାଣିବା. କେତେ ଦିନ ଆଉ ମିଛଟାରେ ନିଜର ମାନବିକତାକୁ ବନ୍ଦୀ କରି ରଖିବା କିଛି ଟଙ୍କା, ପଦବୀ ଆଉ କ୍ଷମତା ପାଇଁ.
ସକାଳେ ଚା ଦୋକାନୀ, ପାନ ଦୋକାନୀ ଠାରୁ ଆରମ୍ଭ କରି ପରିବା ଵାଲା ଓ ଅଟୋ ଵାଲାଠାରୁ ନେଇ ନିଜ ଅଫିସର ତଳିଆ କର୍ମଚାରୀ ମାନଙ୍କ ପର୍ଯ୍ୟନ୍ତ, ବାବୁ ମାନଙ୍କର ବ୍ୟବହାର ଓ ଆଭିମୁଖ୍ୟ ମାନବିକତାର ସମସ୍ତ ସମ୍ବେଦନାକୁ ନଷ୍ଟ କରି ଦେଇଛି. ଉଚ୍ଚ ନୀଚର ଭେଦଭାବ ନା ମାନୁଛି ବୟସ ନା ଅଛି ସଂସ୍କୃତି ଓ ପରମ୍ଫରାର ମାପକାଠି. ଏମାନଙ୍କ ଠାରୁ ସଂମ୍ମାନ ଓ ଆଦର ଆଶା କରିବା ବୃଥା ଅଟେ.ସମାଜରେ ଦିନକୁ ଏମାନଙ୍କ ସଂଖ୍ୟା ବଢ଼ି ବଢ଼ି ଚାଲିଛି.
କଣ ହେବ ସେ 5ତାଲା ଅଟ୍ଟାଳିକା ଘର, କେଉଁ କାମରେ ଲାଗିବ ସେ 5କୋଟିର ଗାଡି.କଣ ହେବ ସେ କୋଟି କୋଟି ବେନାମୀ ଟଙ୍କା. ଯାହା ପାଇଁ ତମ ମଣିଷପଣିଆର ମାନବିକତା ବନ୍ଦୀ ଜୀବନ କାଟିବ ନିଶ୍ୱାସ ଥିବା ଯାଏ. ମଣିଷ ହୋଇ ମଣିଷକୁ ଠିକ ସେ ଚିହ୍ନି ନପାରିବା ପଶୁ ସହ ସମ୍ମାନ ନୁହେଁକି. ପଶୁ ଭିତରେ ଚିନ୍ତା ଚେତନା ନଥାଇ ସେ ଆମକୁ ଅନେକ ଶିକ୍ଷା ଦେଉଛି.ହେଲେ ଆମେ ମୁକ୍ତ ବିହଙ୍ଗ ହୋଇ କାହିଁକି କିଛି ଟଙ୍କା, ପଦବୀ ଆଉ କ୍ଷମତା ପାଇଁ ବନ୍ଦୀ ଜୀବନ ବିତାଇବା. ଏବେ ସମୟ କରିବାର ଆସିଛି, ବେଳ ଥାଉ ଥାଉ ସଚେତନ ହେବା ଓ ଏ ବନ୍ଦୀରୁ ନିଜକୁ ମୁକ୍ତ କରିବା.
ସୋଆ ଏସ୍ଏଚ୍ଏମ୍ ପକ୍ଷରୁ ପଖାଳ ଉତ୍ସବ ଆରମ୍ଭ
ପ୍ରତ୍ୟେକ ଓଡ଼ିଆଙ୍କ ପ୍ରିୟ ଖାଦ୍ୟ ପଖାଳର ସ୍ୱାଦ ନେବା ସହ ଏହାର ପ୍ରଚାର ଓ ପ୍ରସାର ଲକ୍ଷ୍ୟ ନେଇ ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ହୋଟେଲ ମ୍ୟାନେଜମେଂଟ (ଏସଏଚ୍ଏମ୍) ପକ୍ଷରୁ ବୁଧବାର ଏକ ୫-ଦିନିଆ ପଖାଳ ଉତ୍ସବ ଆରମ୍ଭ ହୋଇଛି ।
ଏସ୍ଏଚ୍ଏମ୍ରେ ଆୟୋଜିତ ହୋଇଥିବା ପଖାଳ ଉତ୍ସବକୁ ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଉଦ୍ଘାଟନ କରିବା ସହିତ ଓଡ଼ିଆ ଅସ୍ମିତାକୁ ବଜାୟ ରଖି ଉତ୍କଳ ଦିବସ ପରିପ୍ରେକ୍ଷୀରେ ପଖାଳ ଉତ୍ସବ ପାଳନ କରିବା ପ୍ରତି ଓଡ଼ିଆ ପାଇଁ ଗର୍ବ ଓ ଗୌରବର ବିଷୟ ବୋଲି କହିଥିଲେ । ଓଡ଼ିଶାର ଘରେ ଘରେ ଏହି ପାରମ୍ପାରିକ ଖାଦ୍ୟ ବେଶ ଆଦୃତ ହୋଇଥିବା ବେଳେ ସାରା ବିଶ୍ୱରେ ଏହାର ଚାହିଦା ବୃଦ୍ଧି ପାଉଛି । ସ୍ୱାସ୍ଥ୍ୟ ପାଇଁ ପଖାଳ ଏକ ଔଷଧ ପରି କାମ କରିବା ସହିତ ଏହାର ତୋରାଣି ଅଂଶୁଘାତ ସମୟରେ ବେଶ ସହାୟକ ହୋଇଥାଏ ବୋଲି ପ୍ରଫେସର ନନ୍ଦ କହିଥିଲେ ।
ଓଡ଼ିଶାର ହସ୍ତତନ୍ତ୍ର ଏବଂ ହସ୍ତଶିଳ୍ପ ସହିତ ଏହାର ଇତିହାସ, ଜୀବନଶୈଳୀ, ପରମ୍ପରା ଓ ସଂସ୍କୃତିକୁ ବାନ୍ଧି ରଖିବାର ପ୍ରୟାସ ଏହି ପଖାଳ ଉତ୍ସବର ଉଦ୍ଦେଶ୍ୟ ବୋଲି ସେ କହିଥିଲେ ।
ସବୁ ବର୍ଷ ପରି ଚଳିତ ବର୍ଷ ମଧ୍ୟ ଏସ୍ଏଚ୍ଏମ୍ ପକ୍ଷରୁ ଏପ୍ରିଲ୍ ୧ ରୁ ୫ ତାରିଖ ପର୍ଯ୍ୟନ୍ତ ‘ପଖାଳ ଉତ୍ସବ’ର ଆୟୋଜନ କରାଯାଇଛି । ୫ ଦିନ ବ୍ୟାପି ଚାଲିବାକୁ ଥିବା ଏହି ଉତ୍ସବରେ ପଖାଳ ସାଙ୍ଗକୁ ବିଭିନ୍ନ କିସମର ବ୍ୟଞ୍ଜନ ପ୍ରସ୍ତୁତ କରାଯାଇଛି । ପାରମ୍ପରିକ ବ୍ୟଞ୍ଜନ ପରିବେଷଣ ସହିତ ଓଡ଼ିଶାର ସଂସ୍କୃତି ଓ ପରମ୍ପରାକୁ ବଜାୟ ରଖି ପ୍ରତ୍ୟେକ ଓଡିଆଙ୍କ ଖାଦ୍ୟରୁଚି ତଥା ଭାବଧାରାକୁ ସର୍ବସାଧାରଣଙ୍କ ନିକଟରେ ପହଂଚାଇବା ଏହି ଉତ୍ସବର ମୁଖ୍ୟ ଉଦ୍ଦେଶ୍ୟ ବୋଲି ଏସ୍ଏଚ୍ଏମ୍ର ଡିନ୍ ପ୍ରଫେସର ସୁଶାନ୍ତ ରଞ୍ଜନ ଚଇନି କହିଛନ୍ତି । ଖରାଦିନେ ପ୍ରତ୍ୟେକ ଓଡ଼ିଆ ଖରା ତାତିକୁ ଏଡ଼ାଇବା ପାଇଁ ପଖାଳ ଖାଇବାକୁ ହିଁ ପସନ୍ଦ କରିଥାନ୍ତି ବୋଲି ସେ କହିଥିଲେ ।
ଓଡ଼ିଶାର କଳା ଓ ସଂସ୍କୃତି ସହିତ ବିଭିନ୍ନ ଜିଲ୍ଲାର ହସ୍ତତନ୍ତ୍ର ଏବଂ ହସ୍ତଶିଳ୍ପ, ପରମ୍ପରା ଓ ଗ୍ରାମୀଣ ପରିବେଶ ଏବଂ ଏସ୍ଏଚ୍ଏମ୍ ଛାତ୍ରଛାତ୍ରୀଙ୍କ ଦ୍ୱାରା ପ୍ରସ୍ତୁତ ହୋଇଥିବା ଭିନ୍ନ ଭିନ୍ନ ହସ୍ତକଳାର ଏକ ଝଲକ ଏହି ଉତ୍ସବରେ ଦେଖିବାକୁ ମିଳିଛି ।
ଅତିଥିମାନଙ୍କୁ ଏହି ଉତ୍ସବରେ ପ୍ରତ୍ୟେକ ଦିନ ୧୨ ଟାରୁ ୩ ଟା ପର୍ଯ୍ୟନ୍ତ ପଖାଳ ପରଷା ଯିବ । ଏହି ଉତ୍ସବକୁ ଏସ୍ଏଚ୍ଏମ୍ର ଛାତ୍ରଛାତ୍ରୀମାନେ ପାରମ୍ପରିକ ବେଶଭୂଷା ପରିଧାନ କରି ଖାଦ୍ୟ ପରିଷିବେ । ଏହି ଉତ୍ସବକୁ ଛାତ୍ରଛାତ୍ରୀମାନେ ସଂଚାଳନ କରୁଥିବା ବେଳେ ସେମାନଙ୍କୁ ଫ୍ୟାକଲ୍ଟି ଓ ଅନ୍ୟାନ୍ୟ କର୍ମଚାରୀମାନେ ସହଯୋଗ କରୁଛନ୍ତି ।
ଏହି ପଖାଳ ଉତ୍ସବରେ ଅତିଥି ମାନଙ୍କୁ ଉଷୁନା ପଖାଳ, ଅରୁଆ ପଖାଳ, ଦହି ପଖାଳ, ଅଦା ପଖାଳ, ଛୁଙ୍କ ପଖାଳ ଏବଂ ଲେମ୍ବୁ ପଖାଳ ଇତ୍ୟାଦି ପରଷା ଯିବାର ବ୍ୟବସ୍ଥା ହୋଇଛି । ସେହିପରି ପଖାଳକୁ ସୁହାଇଲା ଭଳି ବିଭିନ୍ନ ପ୍ରକାରର ଆମିଷ ଓ ନିରାମିଷ ବ୍ୟଞ୍ଜନ ଯେପରିକି – ମାଛ ପତ୍ରପୋଡା, ଚିଙ୍ଗୁଡି ଛେଚା, ଶୁଖୁଆ ଭଜା, କୁକୁଡା କଷା, ଚୁନା ମାଛ ଭଜା, ଚିଙ୍ଗୁଡି ଝରଝରି, ପୋହଳା ମାଛ ଭଜା, ଛତୁ ପତ୍ରପୋଡା, ଆଳୁ ଭଜା, ବାଇଗଣ ଭଜା, ଆଳୁ ଓ ବାଇଗଣ ଭର୍ତା, ପୋଡା ଆଳୁ , ଗୋଟା ଭେଣ୍ଡି ଭଜା, ନଡ଼ିଆ ଭଜା, ସାଗ ବଡ଼ି ଭଜା, ଆମ୍ବ ଛେଚା ଚଟଣୀ, ପୋଡା ଟମାଟୋ ଚଟଣୀ, ପଣସ ପିଠଉ ଭଜା, ପନିର ଭୁର୍ଜି, ଆଳୁ କଲରା ବାଟି ତରକାରୀ ଓ ବଡି ଚୁରା ପ୍ରଭୃତି ପରିବେଷଣ କରାଯିବାର ବ୍ୟବସ୍ଥା କରାଯାଇଛି ।
ସୋଆରେ ଉତ୍କଳ ଦିବସ ପାଳିତ
ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍ଡ ଟୁ ବି ବିଶ୍ୱବିଦ୍ୟାଳୟ ପକ୍ଷରୁ ବୁଧବାର ୯୧ତମ ଉତ୍କଳ ଦିବସ ପାଳିତ ହୋଇଯାଇଛି । ସୋଆର ମୁଖ୍ୟ କାର୍ଯ୍ୟାଳୟରେ ଆୟୋଜିତ ଏହି ସ୍ୱତନ୍ତ୍ର ଉତ୍ସବରେ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ, ସୋଆ ଆନ୍ତର୍ଜାତିକ ଉପଦେଷ୍ଟା ମଣ୍ଡଳୀର ଅଧ୍ୟକ୍ଷ ପ୍ରଫେସର ଦାମୋଦର ଆଚାର୍ଯ୍ୟ ଏବଂ ବରିଷ୍ଠ କର୍ମକର୍ତାଗଣ ଯୋଗ ଦେଇ ଉତ୍କଳ ପ୍ରଦେଶ ଗଠନର ମହାନ ବରପୁତ୍ର ମାନଙ୍କର ସ୍ମୃତି ଚାରଣ କରିଥିଲେ ।
ଏହି ଅବସରରେ ଉପସ୍ଥିତ ବ୍ୟକ୍ତି ବିଶେଷ ବନ୍ଦେ ଉତ୍କଳ ଜନନୀ ଗାନ କରିବା ସହ ବରପୁତ୍ରମାନଙ୍କ ଫଟୋଚିତ୍ରରେ ପୁଷ୍ପ ଅର୍ପଣ କରିଥିଲେ ।
କାର୍ଯ୍ୟକ୍ରମକୁ ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ପରିଚାଳନା କରିଥିଲେ ।
ବିଧାନସଭାରେ ଅରୁଣଙ୍କ ଘୋଡା ଉପାଖ୍ୟାନ
ଏଥର ରାଜ୍ୟସଭା ନିର୍ବାଚନରେ ୧୧ଜଣ ବିଧାୟକ କ୍ରସ ଭୋଟିଂ କରିଥିଲେ । ବିଜେଡିର ୬ ବିଧାୟକଙ୍କ ସହ ୨ଜଣ ବିଜେଡିରୁ ନିଲମ୍ବିତ ବିଧାୟକ ଏବଂ କଂଗ୍ରେସରୁ ତିନିଜଣ ବିଧାୟକ ଦିଲ୍ଲୀପ ରାୟଙ୍କୁ ଭୋଟ ଦେଇଥିଲେ । କଂଗ୍ରେସରୁ ବାରବାଟି-କଟକ ବିଧାୟିକା ସୋଫିଆ ଫିର୍ଦ୍ଦୋଶ, ମୋହନା ବିଧାୟକ ଦାଶରଥୀ ଗମାଙ୍ଗ ଓ ସାନଖେମୁଣ୍ଡି ବିଧାୟକ ରମେଶ ଜେନା। ସେହିଭଳି ବିଜେଡିରୁ ବାଲିଗୁଡା ବିଧାୟକ ଚକ୍ରମଣୀ କହଁର, ବସ୍ତା ବିଧାୟିକା ସୁବାସିନୀ ଜେନା, ଜୟଦେବ ବିଧାୟକ ନବ କିଶୋର ମଲ୍ଲିକ, ବାଙ୍କି ବିଧାୟକ ଦେବୀ ରଂଜନ ତ୍ରିପାଠୀ, ଚୌଦ୍ବାର-କଟକ ବିଧାୟକ ସୌଭିକ ବିଶ୍ବାଳ ଓ ତିର୍ତ୍ତୋଲ ବିଧାୟକ ରମାକାନ୍ତ ଭୋଇ ଦଳୀୟ ନିର୍ଦ୍ଦେଶର ଅବମାନନା କରି ଦିଲ୍ଲୀପ ରାୟଙ୍କୁ ଭୋଟ ଦେଇ ଚର୍ଚ୍ଚାରେ ରହିବା ସହ ବିଧାୟକ ମାନେ ଦଳରୁ ନିଲମ୍ବିତ ହୋଇଛନ୍ତି l ଘୋଡା ବେପାରେ ସାମିଲ ହୋଇ ବିଧାୟକ ମାନେ ଦଳୀୟ ଶୁଙ୍ଖଳା ଭାଙ୍ଗ କରିଛନ୍ତି ବୋଲି ବିଜେଡି ଓ କଂଗ୍ରେସ ଅଭିଯୋଗ କରିଛନ୍ତି l ଯାହାକୁ ନେଇ ରାଜନୈତିକ ଉଷ୍ମତା ଲାଗି ରହିଛି l ଏହାରି ଭିତରେ ବ୍ୟୟ ମଂଜୁର ବିଲ ଆଲୋଚନା ରେ ଏହି ଚର୍ଚ୍ଚାକୁ ଅଧିକ ଉଷ୍ମତା ବଢ଼ାଇଛନ୍ତି ବରିଷ୍ଠ ବିଜେଡି ବିଧାୟକ ଅରୁଣ ସାହୁ l ବିଧାନସଭାରେ ଅରୁଣଙ୍କ ଘୋଡା ଉପାଖ୍ୟାନ ଆଜି କ୍ରସ ଭିଟିଂ କରିଥିବା ବିଧାୟକଙ୍କୁ ପୁଣି ଥରେ ଓଡିଶାବାସୀଙ୍କ ଆଗରେ ବିଶ୍ୱାସ ଘାତକ ବୋଲି ପ୍ରମାଣିତ କରି ବିଧାୟକ ମାନଙ୍କ ନୂଆ ନାମକରଣ କରି ବିଜେଡି ବିଧାୟକ ଅରୁଣ ସାହୁ ପୁରା ଚର୍ଚ୍ଚାରେ l
ବ୍ୟୟ ମଂଜୁର ବିଲ ବଜେଟ ଆଲୋଚନା ବେଳେ ସରକାରଙ୍କୁ କଟାକ୍ଷ କରି ଘୋଡାର ଦାମ କେତେ ବୋଲି ପ୍ରଶ୍ନ କରିବା ସହ ଘୋଡାଙ୍କ ପ୍ରକାରଭେଦ କରିଥିଲେ। ଏମିତି କି *ଘୋଡା କେ ନେବ ଘୋଡା* ଡାକରା ଦେଇ ୧୧ ପ୍ରକାର ଘୋଡ଼ାର ନାଁ କହିଥିଲେ।
୧. ଆରବ ଘୋଡା
୨. ତଟୁ ଘୋଡା
୩. ଚଲାଖୀଆ ଘୋଡା
୪. ଗେଡା ଘୋଡା
୫. ଗେଧା ଘୋଡା
୬. ବଚା ଘୋଡା
୭. ପ୍ରଭୁଭକ୍ତ ବେଇମାନ ଘୋଡା
୮. ନାଳୁଆ ଘୋଡା
୯. ବେଙ୍ଗେଇ ଘୋଡା
୧୦. ସୁକୁମାରିଆ ଘୋଡା
୧୧.ଅଲମ୍ପିକ୍ ଘୋଡା
ରାଜ୍ୟସଭା ନିର୍ବାଚନରେ କ୍ରସ ଭୋଟିଂ କରିଥିବା ବିଧାୟକଙ୍କୁ ଅରୁଣଙ୍କ ଏହି ଚତୁର କଟାକ୍ଷ ଏବେ ଚର୍ଚ୍ଚାରେ l
ମୋହନ ସରକାରକୁ ଅରୁଣଙ୍କ ଅସ୍ମିତା ବାଣ : ଟାର୍ଗେଟରେ ଡବଲ ଇଞ୍ଜନ
ଡବଲ ଇଂଞ୍ଜନ ସରକାର ଓଡିଶାକୁ ଡବଲ ଧୋକା ଦେଇଛି l ରାଜ୍ୟରେ ଗଣତନ୍ତ୍ର କେମିତି ଚାଲିଛି ତାହା ବିଧାନସଭାରେ ଶାସକ ଦଳ ବିରୋଧୀଙ୍କୁ ପ୍ରଶ୍ନ ପଚାରି ଉତ୍ତର ଦାବି କରିବାରୁ ଜଣା ପଡୁଛି ବୋଲି ବରିଷ୍ଠ ବିଜେଡି ବିଧାୟକ ଅରୁଣ ସାହୁ କହିଛନ୍ତି l
ବ୍ୟୟ ମଂଜୁର ବିଲ ଆଲୋଚନାରେ ବିଜେପି ସରକାରର ଓଡ଼ିଆ ଅସ୍ମିତା ନାରାକୁ କଡା ସମାଲୋଚନା କରିଛନ୍ତି ବରିଷ୍ଠ ବିଜେଡି ବିଧାୟକ ଅରୁଣ ସାହୁ l 200କୋଟିର ଓଡ଼ିଆ ଅସ୍ମିତା ଗଲା କୁଆଡେ l କୋଟିଆରେ କୁଆଡେ ଗଲା ଓଡ଼ିଆ ଅସ୍ମିତା l ପୋଲାଭରମ ପ୍ରକଳ୍ପ ଯୋଗୁଁ ଓଡିଶା ବୁଡ଼ୁଛି, ମହାନଦୀ ପ୍ରସଙ୍ଗରେ ଓଡ଼ିଆ ଅସ୍ମିତା କୁଆଡେ ଗଲା l ମନ୍ତ୍ରୀ କମିଟି କାହିଁକି କଲେ ନାହିଁ l ବିଜୁବାବଙ୍କୁ ଅପମାନିତ କରାଗଲା କୁଆଡେ ଗଲା ଓଡ଼ିଆ ଅସ୍ମିତା l ଲୋକସଭାରେ ବିଜେପିର 20ଜଣ ସାଂସଦ ମୁହଁରେ ତୁଣ୍ଡି ପକାଇ ବସିବା କି ପ୍ରକାର ଓଡ଼ିଆ ଅସ୍ମିତା l ଓଡ଼ିଆ ଅସ୍ମିତା ଆଜି ଧ୍ୱଂସ ହୋଇଛି l ବଜେଟ ରେ ଘୋଡାଙ୍କ ଦାମ କେତେ ବୋଲି କହି କଟାକ୍ଷ କରି ଶାସକ ଦଳକୁ ସମାଲୋଚନା କରିଥିଲେ ବିଜେଡି ବିଧାୟକ ଅରୁଣ ସାହୁ l ରାଜ୍ୟସଭା ନିର୍ବାଚନକୁ ଇଙ୍ଗିତ କରି ଅରୁଣ ବ୍ୟୟ ମଂଜୁର ବିଲରେ ମାରିଥିଲେ ଘୋଡା ବେପାର ତେରଛା ବାଣ l ରାଜ୍ୟରେ ଆଇନ ଶୁଙ୍ଖଳା ପୁରା ବିଗିଡି ଯାଇଛି l 2025-26ରେ 21 ପ୍ରତିଶତ ଅପରାଧ ବୃଦ୍ଧି ପାଇଛି l ବିଧାୟକ ଗୁଳି ଫୁଟାଉଛନ୍ତି pso ବଳି ପଡୁଛନ୍ତି l ଭୁବନେଶ୍ୱରରୁ ରାଉଲକେଲା ଓ ପୁରା ଓଡ଼ିଶାରେ ସରକାରୀ କର୍ମଚାରୀଙ୍କୁ ମାଡ଼ l ପୋଲିସ ପୋଲିସ ବିରୋଧରେ ମାମଲା ରୁଜୁ କରୁଛି l ଏହା ପ୍ରମାଣିତ କରୁଛି ରାଜ୍ୟରେ ଆଇନ ଶୁଙ୍ଖଳା କେଉଁ ସ୍ଥିତିରେ ଅଛି l ବିଜେପି ସରକାର ଆସିଲା ପରେ ଗଣତନ୍ତ୍ରକୁ ହତ୍ୟା କରୁଛି l ସରକାରୀ ଦଳ ଏବେ ବିରୋଧୀ ଦଳକୁ ପ୍ରଶ୍ନ କରୁଛି l ଗଣତନ୍ତ୍ରକୁ ଜନତନ୍ତ୍ରରେ ପରିଣତ କରିଛି ବିଜେପି l ଡରେଇ ଧମକେଇ ଶାଶନ କରୁଛି l ଆଜି ଭାରତ ବର୍ଷରେ ମଧ୍ୟ୍ ସମାନ ସ୍ଥିତି l ବ୍ରିଟିଶ ପାଖରେ ମୁଣ୍ଡ ନୁଆଁଇନଥିବା ଭାରତ ବାସି ଆଜି ଆମେରିକା ପାଖରେ ଆମେ ମୁଣ୍ଡ ନୁଆଁଇଛନ୍ତି l ଏସଆଇଆର ଜରିଆରେ ଭାରତ ବର୍ଷର 10କୋଟି ଲୋକଙ୍କ ନାଁ ଭୋଟର ଲିଷ୍ଟ ରୁ କଟିବ l ସେମାନେ ଭାରତ ବର୍ଷରେ ସବୁ ସୁବିଧା ପାଇଁ ଭୋଟ ଦେଇପାରିବେନି l ବିଧାନସଭାରେ ସବଳ ମୁଖ୍ୟମନ୍ତ୍ରୀ ନା ଦୁର୍ବଳ ମୁଖ୍ୟମନ୍ତ୍ରୀ ଏକଥା ପ୍ରମାଣିତ କରିବାକୁ ଆଣ୍ଠେଇପଡିଲେଣି ଶାସକ ଦଳ l ବଜେଟ ପରେ ବଜେଟ ଆଣୁଛନ୍ତି ବିଜେପି ସରକାର l ହେଲେ ଏହାକୁ ଖର୍ଚ୍ଚ କରିପାରୁନାହାନ୍ତି l ବଡ଼ ବଜେଟ ସହ ରାଜ୍ୟର ଋଣ ଭାର ଏବେ ବଢ଼ି ବଢ଼ି ଚାଲିଛି l 2ବର୍ଷରେ ବିଜେପି ସରକାର 50ହଜାର କୋଟି ଟଙ୍କା ଋଣ କରି ସାରିଲାଣି l ଋଣ କରି ବିକଶିତ ଭାରତ ଓ ବିକଶିତ ଓଡିଶା ଗଠନ କରିବାକୁ ସ୍ବପ୍ନ ଦେଖୁଛି ବିଜେପି l 2029ରେ ବିଜେପି କେବେ ବି ଶାଶନକୁ ଆସିପାରିବନି l ଡବଲ ଇଞ୍ଜନ ସରକାର ବ୍ୟାଗ ଗୀୟରରେ ଚାଲିଛି l ଡବଲ ଇଞ୍ଜନ ସରକାର ଓଡିଶାକୁ ଡବଲ ଧୋକା ଦେଇଛି l ଡବଲ ଇଞ୍ଜନ ସରକାରର ସ୍ପ୍ରିଡ଼ କେତେ? ପଂଚାୟତ ଓ ପୌର ନିର୍ବାଚନରେ 27ପ୍ରତିଶତ ସଂରକ୍ଷଣ ଦେବେ କି? ବଜେଟ ରେ ଘୋଡାଙ୍କ ଦାମ କେତେ ବୋଲି କହି କଟାକ୍ଷ କରି ଶାସକ ଦଳକୁ ସମାଲୋଚନା କରିଥିଲେ ବିଜେଡି ବିଧାୟକ ଅରୁଣ ସାହୁ l ରାଜ୍ୟସଭା ନିର୍ବାଚନକୁ ଇଙ୍ଗିତ କରି ଅରୁଣ ବ୍ୟୟ ମଂଜୁର ବିଲରେ ମାରିଥିଲେ ଘୋଡା ବେପାର ତେରଛା ବାଣ l
ପୂର୍ବ ଭାରତରେ ଶିକ୍ଷା କ୍ଷେତ୍ରରେ ଉତ୍କର୍ଷତା ନେଇ ସୋଆକୁ ସମ୍ମାନ ପ୍ରଦାନ
ଦେଶର ଅଗ୍ରଣୀ ବିଶ୍ୱବିଦ୍ୟାଳୟ ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍ଡ ଟୁ ବି ବିଶ୍ୱବିଦ୍ୟାଳୟକୁ ପୂର୍ବ ଭାରତରେ ଶିକ୍ଷା କ୍ଷେତ୍ରରେ ଉତ୍କର୍ଷତା ନେଇ ଗ୍ରାଜିଆ ଟ୍ରେଣ୍ଡସେଟର୍ସ ୨୦୨୬ ସମ୍ମାନ ପ୍ରଦାନ କରାଯାଇଛି । ଏଥି ସହିତ ଶୈକ୍ଷିକ ଓ ନେତୃତ୍ୱ କ୍ଷେତ୍ରରେ ଉତ୍କୃଷ୍ଟତା ନିମନ୍ତେ ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦଙ୍କୁ ମଧ୍ୟ ଗ୍ରାଜିଆ ଟ୍ରେଣ୍ଡସେଟର୍ସ ୨୦୨୬ ସମ୍ମାନରେ ସମ୍ବର୍ଦ୍ଧିତ କରାଯାଇଛି ।
ଗତ ବୁଧବାର କୋଲକାତା ଠାରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସୋଆ ବିଶ୍ୱବିଦ୍ୟାଳୟ ଏବଂ କୁଳପତି ପ୍ରଫେସର ନନ୍ଦଙ୍କୁ ଗ୍ରାଜିଆ ପକ୍ଷରୁ ଏହି ସମ୍ମାନ ପ୍ରଦାନ କରାଯାଇଛି ।
କାର୍ଯ୍ୟକ୍ରମରେ ସ୍ୱତନ୍ତ୍ର ଅତିଥି ଭାବେ ବଲିଉଡ୍ ତାରକା ରସିକା ଦୁଗଲ, ତାହା ଶାହା ବାଦୁଶାହ, ପରମବ୍ରତ ଚାଟ୍ଟାର୍ଜୀଙ୍କ ସମେତ ବିଶିଷ୍ଟ ବ୍ୟକ୍ତିମାନେ ଯୋଗ ଦେଇ ଗ୍ରାଜିଆ ସମ୍ମାନ ପ୍ରଦାନ କରିଥିଲେ ।
ଗ୍ରାଜିଆ ହେଉଛି ବିଶ୍ୱର ଏକ ଅଗ୍ରଣୀ ମହିଳା ସାପ୍ତାହିକ ପ୍ରତ୍ରିକା ଯାହାର କି ଭାରତ ସମେତ ଅନ୍ୟ ଦେଶମାନଙ୍କରେ ମଧ୍ୟ ପ୍ରକାଶନ ରହିଛି । କଳା, ସଂସ୍କୃତି, ଶିକ୍ଷା, ଉଦ୍ୟୋଗୀକରଣ, ଚଳଚ୍ଚିତ୍ର, ଫ୍ୟାସନ୍ ଓ ଡିଜାଇନ୍ ପ୍ରଭୃତିକୁ ପ୍ରୋତ୍ସାହନ ଦେବାରେ ଏହି ପ୍ରତ୍ରିକାର ପ୍ରମୁଖ ଭୂମିକା ରହିଛି । ପୂର୍ବ ଭାରତରେ ପ୍ରଥମ ଥର ପାଇଁ ଗ୍ରାଜିଆ ପକ୍ଷରୁ ଏହି ସମ୍ମାନ କାର୍ଯ୍ୟକ୍ରମର ଆୟୋଜନ କରାଯାଇଥିଲା ।
ଦେଶରେ ଚମକିଲେ ଧର୍ମେନ୍ଦ୍ର
ଦେଶର ଟପ୍ ୨୮ ପ୍ରଭାବଶାଳୀ ବ୍ୟକ୍ତିଙ୍କ ତାଲିକାରେ ସ୍ଥାନ ପାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ l ବିଜୁ ପଟ୍ଟନାୟକଙ୍କ ପରେ ଦ୍ଵିତୀୟ ରାଜନେତା ଭାବେ ଦିଲ୍ଲୀ ଦରବରାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦବଦବା ଜାହିର କରିଛନ୍ତି l ରାଜନେତା ଭାବେ ସେ ତାଙ୍କର ଦକ୍ଷତା ବିଭିନ୍ନ ସମୟରେ ଦେଖାଇ ଚର୍ଚ୍ଚାରେ ରହିଛନ୍ତି l ଉତ୍ତରପ୍ରଦେଶ, ବିହାର, ଦିଲ୍ଲୀ, ଆସାମ, ଓଡିଶା ସହ ଦେଶର ବିଭିନ୍ନ ରାଜ୍ୟରେ ବିଜେପି ସରକାର ଗଠନ କରିବାରେ ତାଙ୍କର ଉଲ୍ଲେଖନିୟ ଅବଦାନ ଅଛି l ମୋଦୀ ସରକାରରେ ଲମ୍ବା ସମୟ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇ ସେ ନିଜର ଦକ୍ଷତା ପ୍ରମାଣିତ କରିଛନ୍ତି କେନ୍ଦ୍ରମନ୍ତ୍ରୀ l ଜଣେ ସାଙ୍ଗଠନିକ ଦକ୍ଷତା ଓ ରାଜନୈତିକ ଦୂରଦୂଷ୍ଟି ଯୋଗୁଁ
ଧର୍ମେନ୍ଦ୍ର ପ୍ରଧାନ ବିଭିନ୍ନ କ୍ଷେତ୍ରରେ କାର୍ଯ୍ୟ କରି ଉଲ୍ଲେଖନୀୟ ସଫଳତା ଲାଭ କରିଛନ୍ତି। ପୂର୍ବରୁ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ୍ ମନ୍ତ୍ରୀ ଭାବେ ସେ ଅତ୍ୟନ୍ତ ପ୍ରଶଂସନୀୟ କାର୍ଯ୍ୟ କରି କେନ୍ଦ୍ରରେ ବହୁତ ପ୍ରଶଂସା ଲାଭ କରିଛନ୍ତି। ଶିକ୍ଷା ମନ୍ତ୍ରୀ ଭାବେ ସେ ଦେଶରେ ନୂତନ ଶିକ୍ଷା ନୀତି (NEP) କୁ କାର୍ଯ୍ୟକାରୀ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
କେବଳ ମନ୍ତ୍ରୀ ଭାବେ ନୁହେଁ, ଦଳର ଏକ ଦକ୍ଷ ନେତା ଭାବେ ମଧ୍ୟ ସେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ସମ୍ପାଦନ କରିଛନ୍ତି। ବିହାର ଓ ହରିୟାଣାରେ ତାଙ୍କ ନେତୃତ୍ୱରେ ବିଜେପି ବିପୁଳ ବିଜୟ ଲାଭ କରିଥିଲା।ଆଜି ତାଙ୍କର ନାମ ଦେଶର ଟପ୍ ୨୮ ପ୍ରଭାବଶାଳୀ ବ୍ୟକ୍ତିଙ୍କ ତାଲିକାରେ ସ୍ଥାନ ପାଇଛି, ଯାହା ଓଡ଼ିଶା ପାଇଁ ଏକ ବଡ଼ ଗୌରବର ବିଷୟ l ଓଡିଶା ବିଜେପିର ଜଣେ ଟାଣୁଆ ରାଜନେତା ଭାବେ ସେ ଉଭା ହୋଇଛନ୍ତି l ସମ୍ବଲପୁର ସାଂସଦ ଭାବେ କେନ୍ଦ୍ରମନ୍ତ୍ରୀ ଏହି ସଫଳତା ପାଇଁ ପୁରା ଦେଶରୁ ତାଙ୍କୁ ଶୁଭେଚ୍ଛାର ଶୁଅ ଛୁଟୁଛି l
ସମ୍ ହସ୍ପିଟାଲ୍ ପକ୍ଷରୁ ଯକ୍ଷ୍ମା ରୋଗ ନେଇ ସଚେତନତା କାର୍ଯ୍ୟକ୍ରମ ଆୟୋଜିତ
ଦେଶର ୪୦ ପ୍ରତିଶତ ବ୍ୟକ୍ତି ଯକ୍ଷ୍ମା ରୋଗରେ ପୀଡ଼ିତ ଥିବା ବେଳେ ସେମାନଙ୍କ ଠାରେ କୌଣସି ଲକ୍ଷଣ ଦେଖାଦେଉ ନଥିବାରୁ ସେମାନଙ୍କ ଚିକିତ୍ସା ସମ୍ଭବପର ହେଉ ନାହିଁ । ଏଥି ସହିତ ଏହି ରୋଗକୁ ଏକ ସାମାଜିକ କଳଙ୍କ ବୋଲି ଅନେକ ଭ୍ରାନ୍ତ ଧାରଣା ରହିଥିବାରୁ ପୀଡ଼ିତ ବ୍ୟକ୍ତି ଚିକିତ୍ସା ପାଇଁ ଆଗଭର ହେଉ ନାହାଁନ୍ତି । ତେବେ ଉପଯୁକ୍ତ ଚିକିତ୍ସା ଦ୍ୱାରା ଯକ୍ଷ୍ମା ନିରାକରଣ ହୋଇପାରିବ ବୋଲି ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ (ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ)ର ପିଜି ଡିପାର୍ଟମେଂଟ ଅଫ୍ ପଲ୍ମୋନାରି ମେଡିସିନ୍ ବିଭାଗ ପକ୍ଷରୁ ବିଶ୍ୱ ଯକ୍ଷ୍ମା ଦିବସ ପରିପ୍ରେକ୍ଷୀରେ ଆୟୋଜିତ ସିଏମଇରେ ଶନିବାର ବିଶେଷଜ୍ଞମାନେ ମତ ଦେଇଛନ୍ତି ।
ଏହି କାର୍ଯ୍ୟକ୍ରମରେ ପୁରୀ ସ୍ଥିତ ଶ୍ରୀ ଜଗନ୍ନାଥ ମେଡିକାଲ କଲେଜ ଆଣ୍ଡ ହସ୍ପିଟାଲର ପଲମୋନାରୀ ମେଡିସିନ ବିଭାଗର ମୁଖ୍ୟ ପ୍ରଫେସର (ଡାକ୍ତର) ସୁଦର୍ଶନ ପୋଥାଳ ମୁଖ୍ୟ ବକ୍ତା ଭାବେ ଯୋଗ ଦେଇ କହିଥିଲେ ଯେ ଯଦିଓ ଆମ ସମାଜରେ ଆଜି ବି ଏହାକୁ ଏକ ସାମାଜିକ କଳଙ୍କ ଭାବେ ବିବେଚନା କରାଯାଉଛି ତେବେ ଏହାର ଲକ୍ଷଣକୁ ନ ଲୁଚାଇ ଉପଯୁକ୍ତ ଚିକିତ୍ସା କରାଇବା ସହ ଔଷଧ ସେବନ କଲେ ରୋଗୀଟି ଆରୋଗ୍ୟ ଲାଭ କରିପାରିବ । ଯକ୍ଷ୍ମା ମୁକ୍ତ ଭାରତ ନିମନ୍ତେ ସାମାଜିକ ସ୍ତରରେ ସଚେତନତାର ଆବଶ୍ୟକତା ରହିଥିବା ସେ କହିଥିଲେ ।
ଏହି ପରିପ୍ରେକ୍ଷୀରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଡିନ୍ ପ୍ରଫେସର (ଡାକ୍ତର) ସଂଘମିତ୍ରା ମିଶ୍ର ମୁଖ୍ୟ ଅତିଥି ଭାବେ ଯୋଗଦେଇ ଯକ୍ଷ୍ମା ରୋଗର ଚିହ୍ନଟ ସହିତ ସେମାନଙ୍କୁ କିପରି ସଠିକ୍ ଭାବରେ ଚିକିତ୍ସା ପ୍ରଦାନ କରାଯାଇପାରିବ ସେଥି ନିମନ୍ତେ ସମ ହସ୍ପିଟାଲରେ ଖୁବ ଶୀଘ୍ର ଏକ ମଲ୍ଟି ଡ୍ରଗ୍ ରେଜିଷ୍ଟାନ୍ସ ଟିବି ୱାର୍ଡ଼ ଆରମ୍ଭ କରାଯିବ ବୋଲି ସୂଚନା ଦେଇଥିଲେ । ଏଥି ସହିତ ଟିବିକୁ ରୋକିବା ନିମନ୍ତେ କେବଳ ଡାକ୍ତର ନୁହଁନ୍ତି ବରଂ ସ୍ୱାସ୍ଥ୍ୟକର୍ମୀ, ଆଶାକର୍ମୀ ଓ ଛାତ୍ରଛାତ୍ରୀମାନଙ୍କୁ ନେଇ ବିଭିନ୍ନ ସଚେତନତା କାର୍ଯ୍ୟକ୍ରମ କରାଯିବା ଜରୁରୀ ବୋଲି ସେ କହିଥିଲେ ।
୨୦୩୬ ସୁଦ୍ଧା ସାରା ବିଶ୍ୱକୁ କିପରି ଟିବି ମୁକ୍ତ କରାଯାଇ ପାରିବ ତାହା ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଳ୍ୟୁଏଚ୍ଓ)ର ମୂଳ ଲକ୍ଷ୍ୟ ରହିଛି । ନ୍ୟାସ୍ନାଲ୍ ଟିବି ଇରାଡିକେସନ୍ ପ୍ରୋଗ୍ରାମ୍ ମାଧ୍ୟମରେ ବିଭିନ୍ନ କଲେଜ ମାନଙ୍କରେ ଛାତ୍ରଛାତ୍ରୀମାନଙ୍କୁ ବିଭିନ୍ନ ପ୍ରକାର ସଚେତନତାମୂଳକ କାର୍ଯ୍ୟକ୍ରମ ଦ୍ୱାରା ଟ୍ୟୁବରକ୍ୟୁଲୋସିସ୍ (ଟିବି) ଏବଂ ଏକ୍ସଟ୍ରା ପଲମୋନାରୀ ଟ୍ୟୁବରକ୍ୟୁଲୋସିସ୍(ଟିବି) ରୋଗର ଲକ୍ଷଣ ଓ ଚିହ୍ନଟ ଉପାୟ ଜାଣି ସଠିକ୍ ସମୟରେ ରୋଗୀର ଉପଯୁକ୍ତ ଚିକିତ୍ସା କରାଯାଇପାରିବ ବୋଲି ସେ କହିଥିଲେ ।
ଚଳିତ ବର୍ଷର ଥିମ୍ ‘ୟେସ ! ୱି କ୍ୟାନ୍ ଏଣ୍ଡ ଟିବି: ‘ଲିଡ୍ ବାଏ କନ୍ଟ୍ରିଜ୍ , ପାୱାଡ୍ର୍ ବାଏ ପିପଲ’ର ମୂଳ ଉଦ୍ଦେଶ୍ୟ ବିଷୟରେ ସେ ବ୍ୟାଖ୍ୟା କରିଥିଲେ ।
ସେହିପରି କାର୍ଯ୍ୟକ୍ରମରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର (ଡାକ୍ତର) ପୁଷ୍ପରାଜ ସାମନ୍ତସିଂହାର ସମ୍ମାନିତ ଅତିଥି ଭାବେ ଯୋଗଦେଇ ସଚେତନତା କାର୍ଯ୍ୟକ୍ରମ ଓ ଉପଯୁକ୍ତ ପନ୍ଥା ପ୍ରସ୍ତୁତ କରାଗଲେ ଟିବି ହାରିବ ଓ ଦେଶ ଜିତିବ ବୋଲି କହିଥିଲେ । ସାରା ଓଡିଶାରେ ସମ୍ ହସ୍ପିଟାଲ୍କୁ ଆସୁଥିବା ଟିବି ରୋଗୀ ଅଧିକ ମାତ୍ରାରେ ଉପଯୁକ୍ତ ଚିକିତ୍ସା ଲାଭ କରି ସୁସ୍ଥ ହୋଇ ଘରକୁ ଫେରୁଛନ୍ତି ବୋଲି ସେ କହିଥିଲେ ।
ସେହିପରି ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଆଡିସ୍ନାଲ୍ ଡିନ୍ ପ୍ରଫେସର (ଡାକ୍ତର) ପ୍ରକାଶ କୁମାର ସାହୁ ସମ୍ମାନିତ ଅତିଥି ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ ।
ମୁଖ୍ୟବକ୍ତା ଡାକ୍ତର ପୋଥାଳ ଟିବି ଓ ଲାଟେନ୍ଟ ଟିବି କିଭଳି ଜଣେ ରୋଗୀ ପାଇଁ କ୍ଷତିକାରକ ତାହା ବର୍ଣ୍ଣନା କରିବା ସହ ଏହାର ନିରାକରଣ କରିବା ନିମନ୍ତେ ଉପଯୁକ୍ତ ଚିକିତ୍ସା ଓ ପଦକ୍ଷେପ ସମ୍ପର୍କରେ ତଥ୍ୟ ପ୍ରଦାନ କରିଥିଲେ ।
ଆଇଏମ୍ଏସ୍ ଆଣ୍ଡ୍ ସମ୍ ହସ୍ପିଟାଲ୍ର ପିଜି ଡିପାର୍ଟମେଂଟ ଅଫ୍ ପଲ୍ମୋନାରୀ ମେଡିସିନ୍ ବିଭାଗର ମୁଖ୍ୟ ପ୍ରଫେସର (ଡକ୍ଟର) ବନାନୀ ଜେନା ଯକ୍ଷ୍ମା ସମ୍ପୂର୍ଣ୍ଣ ଆରୋଗ୍ୟସାଧ୍ୟ ଓ ଉପଯୁକ୍ତ ଚିକିତ୍ସା ଦ୍ୱାରା ରୋଗୀ ସୁସ୍ଥ ହୋଇପାରିବ ବୋଲି ମତ ଦେଇଥିଲେ । ଯକ୍ଷ୍ମାରେ ପୀଡ଼ିତ ବ୍ୟକ୍ତିବିଶେଷଙ୍କର ସ୍ୱାସ୍ଥ୍ୟ ପରୀକ୍ଷା, ଚିକିତ୍ସା ଓ ଔଷଧ ସେବନ ଉପରେ ସେ ଗୁରୁତ୍ୱ ଦେଇଥିଲେ । ସମ୍ ହସ୍ପିଟାଲରେ ସର୍ବାଧିକ ଟିବି ରୋଗୀଙ୍କର ଚିକିତ୍ସା କରାଯାଉଥିବା ପ୍ରଫେସର ଜେନା ସୂଚନା ଦେଇଥିଲେ ।
ଏହି କାର୍ଯ୍ୟକ୍ରମରେ ଷ୍ଟେଟ ଟିବି ଅଫିସର ଡାକ୍ତର ଅର୍ଘ୍ୟ ପ୍ରଧାନ, ହସ୍ପିଟାଲ୍ର ସମସ୍ତ ବିଭାଗର ଡାକ୍ତର, ନର୍ସ ଓ କର୍ମକର୍ତାମାନେ ଉପସ୍ଥିତ ଥିଲେ । ପଲ୍ମୋନାରୀ ମେଡିସନ୍ ବିଭାଗର ପ୍ରଫେସର (ଡାକ୍ତର) ରାଖି ଲୁଦାମ୍ ସ୍ୱାଗତ ଭାଷଣ ପ୍ରଦାନ କରିଥିବାବେଳେ ଆସୋସିଏଟ୍ ପ୍ରଫେସର (ଡାକ୍ତର) ପ୍ରତୀମ୍ ଛୋଟରାୟ ଧନ୍ୟବାଦ ଅର୍ପଣ କରିଥିଲେ ।
ଆୟୋଜିତ କାର୍ଯ୍ୟକ୍ରମରେ ବିଭିନ୍ନ ପ୍ରକାର ବୈଜ୍ଞାନିକ ଆଲୋଚନାଚକ୍ର ମଧ୍ୟ ଆୟୋଜନ କରାଯିବା ସହିତ ଏଥିରେ ବିଭିନ୍ନ ପ୍ରକାର ପ୍ରତିଯୋଗିତାରେ କୃତି ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା ।
ଏହି ପରିପ୍ରେକ୍ଷୀରେ ବିଶ୍ୱ ଯକ୍ଷ୍ମା ଦିବସ ଅବସରରେ ମାର୍ଚ୍ଚ ୨୪ ତାରିଖ ଦିନ ଆଇଏମ୍ଏସ୍ ଆଣ୍ଡ ସମ ହସ୍ପିଟାଲ ପକ୍ଷରୁ ଏକ ମେଗା ସଚେତନତା ରାଲିର ମଧ୍ୟ ଆୟୋଜନ କରାଯାଇଥିଲା । ଏହି ରାଲିରେ ପଲ୍ମୋନାରୀ ମେଡିସନ୍ ବିଭାଗର ସମସ୍ତ ଫ୍ୟାକଲ୍ଟି, ପିଜି, ନର୍ସିଂ ଓ ଡାକ୍ତରୀ ଛାତ୍ରଛାତ୍ରୀମାନେ ଅଂଶଗ୍ରହଣ କରିଥିଲେ ।
ରଘୁନାଥ ମହାନ୍ତି ଓ ଜୀବନ ପ୍ରଦୀପ ଦାସ ଘର ବାହୁଡା଼
