ଢେଙ୍କାନାଳ: ଆସନ୍ତା ବର୍ଷଠାରୁ ଭାରତୀୟ ଜନ ସଞ୍ଚାର ସଂସ୍ଥାନ (ଆଇଆଇଏମ୍‍ସି)ରେ ସାମ୍ବାଦିକତା ଓ ଗଣଯୋଗାଯୋଗର ବିଭିନ୍ନ ବିଷୟରେ ସ୍ନାତକୋତ୍ତର ପାଠ୍ୟକ୍ରମ ଆରମ୍ଭ ହେବାର ଅଛି । ଏହାସହ ଗବେଷଣାକୁ ମଧ୍ୟ ଗୁରୁତ୍ୱ ଦିଆଯିବ ବୋଲି ଆଇଆଇଏମ୍‍ସି ପରିଦର୍ଶନରେ ଆସି ମହାନିର୍ଦ୍ଦେଶକ କେ.ଏସ୍‍. ଧତ୍ୱାଲିଆ କହିଛନ୍ତି ।
ଗୁରୁବାର ପୂର୍ବାହ୍ଣରେ ଶ୍ରୀ ଧତ୍ୱାଲିଆ ଆଇଆଇଏମ୍‍ସି ଢେଙ୍କାନାଳ କ୍ୟାମ୍ପସ୍‍ରେ ପହଞ୍ଚିବା ପରେ ଛାତ୍ରଛାତ୍ରୀଙ୍କ ସହ ଆଲୋଚନା କରିଛନ୍ତି । ସେ କହିଛନ୍ତି, ସାମ୍ବାଦିକତା କ୍ଷେତ୍ରରେ ଆଇଆଇଏମ୍‍ସି ଛାତ୍ରଛାତ୍ରୀଙ୍କ ଭୂମିକା ବେଶ୍‍ ଗୁରୁତ୍ୱପୂର୍ଣ୍ଣ । ତେବେ ସମାଜର ବିକାଶ ପାଇଁ ଛାତ୍ରଛାତ୍ରୀଙ୍କର ଏକ ବଡ଼ ଦାୟିତ୍ୱ ରହିଛି । ବିଶେଷତଃ ଆଇଆଇଏମ୍‍ସିର ଶିକ୍ଷାର୍ଥୀମାନେ ଲୋକଙ୍କ ପାଖକୁ ଯାଇ ସାମ୍ବାଦିକତା ମାଧ୍ୟମରେ ସେମାନଙ୍କ ସମସ୍ୟାର ସମାଧାନ କରିବା ଦିଗରେ ଉତ୍ସର୍ଗୀକୃତ ହୁଅନ୍ତୁ ବୋଲି ସେ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଛନ୍ତି । ଏହାସହ ଛାତ୍ରଛାତ୍ରୀମାନେ ନିଜ ନିଜର ଟ୍ୟାଲେଣ୍ଟ ଦେଖାଇ ସମାଜ ତଥା ପରିବେଶର ହିତ ପାଇଁ କାମ କରନ୍ତୁ ବୋଲି ସେ ଆଶାବ୍ୟକ୍ତ କରିଛନ୍ତି ।
ସେହିପରି ଆଗାମୀ ଦିନରେ ଆଇଆଇଏମ୍‍ସି ଢେଙ୍କାନାଳରେ ଏକ ଗୋଷ୍ଠୀ ବେତାର କେନ୍ଦ୍ର ଖୋଲାଯିବାକୁ ସମସ୍ତ ପ୍ରକାର ପ୍ରଚେଷ୍ଟା କରାଯାଉଥିବା ସେ ସ୍ପଷ୍ଟ କରିଛନ୍ତି । ଏହାସହ ଭିଡିଓ କନ୍‍ଫରେନ୍ସିଂ ତଥା ଇ-କ୍ଲାସ୍‍ରୁମ୍‍ ବ୍ୟବସ୍ଥାକୁ ତ୍ୱରାନ୍ୱିତ କରାଯିବ ବୋଲି ଶ୍ରୀ ଧତ୍ୱାଲିଆ କହିଛନ୍ତି ।
ଏହି ଅବସରରେ ଆଇଆଇଏମ୍‍ସି ଢେଙ୍କାନାଳର ଆଞ୍ଚଳିକ ନିର୍ଦ୍ଦେଶକ ଡ. ମୃଣାଳ ଚାଟାର୍ଜୀ ଶ୍ରୀ ଧତ୍ୱାଲିଆଙ୍କୁ ସ୍ୱାଗତ କରିବା ପରେ ଆଇଆଇଏମ୍‍ସି ଛାତ୍ରଛାତ୍ରୀଙ୍କ ସୃଜନଶୀଳତା ଉଦାହରଣ ମାଧ୍ୟମରେ କହିଥିଲେ । ପରେ ଛାତ୍ରଛାତ୍ରୀଙ୍କ ବିଭିନ୍ନ ପ୍ରଶ୍ନର ଉତ୍ତର ରଖିଥିଲେ ଶ୍ରୀ ଧତ୍ୱାଲିଆ । ଏହି କାର୍ଯ୍ୟକ୍ରମରେ ସେକ୍ସନ୍‍ ଅଫିସର କେଦାରନାଥ ଜେନା, ସହାୟକ ପ୍ରଫେସର ଡ. ଜ୍ୟୋତି ପ୍ରକାଶ ମହାପାତ୍ରଙ୍କ ସମେତ ସମସ୍ତ କର୍ମକର୍ତ୍ତା ଓ ଛାତ୍ରଛାତ୍ରୀ ଉପସ୍ଥିତ ଥିଲେ । ଧନ୍ୟବାଦ ଦେଇଥିଲେ ସହାୟକ ପ୍ରଫେସର ସମ୍ବିତ ପାଲ ।
ଐତିହାସିକ ପୋଷ୍ଟକାର୍ଡ ଉନ୍ମୋଚିତ
ଏହି ଅବସରରେ ଆଇଆଇଏମ୍‍ସି ଢେଙ୍କାନାଳ ପକ୍ଷରୁ ପ୍ରକାଶିତ ସ୍ୱତନ୍ତ୍ର ଐତିହାସିକ ପୋଷ୍ଟକାର୍ଡ ଉନ୍ମୋଚିତ କରିଛନ୍ତି ମହାନିର୍ଦ୍ଦେଶକ କେ.ଏସ୍‍. ଧତ୍ୱାଲିଆ । ୧୯୪୮ ଜାନୁଆରୀ ୩୧ ତାରିଖରେ ଦେଶ ବିଦେଶର ବିଭିନ୍ନ ଖବରକାଗଜର ପ୍ରଥମ ପୃଷ୍ଠାରେ ପ୍ରକାଶିତ ମହାତ୍ମାଗାନ୍ଧୀଙ୍କ ହତ୍ୟା ସମ୍ପର୍କିତ ଖବରକୁ ଏହି ପୋଷ୍ଟକାର୍ଡରେ ସ୍ଥାନ ଦିଆଯାଇଛି । ପୂର୍ବରୁ ସ୍ୱାଧୀନତା ଦିବସର ପ୍ରଥମ ପୃଷ୍ଠାର ଖବରକାଗଜକୁ ନେଇ ଏକ ପୋଷ୍ଟକାର୍ଡ ସିରିଜ୍‍ ପ୍ରସ୍ତୁତ ହୋଇଥିଲା । ଏହି ପୋଷ୍ଟକାର୍ଡ ବିକ୍ରି ପାଇଁ ମଧ୍ୟ ଉପଲବ୍ଧ ।

ଯାଜପୁର : ବିଜେଡିର ସଭ୍ୟସଂଗ୍ରହ ଅଭିଯାନ ଯାଜପୁର ଜ଼ିଲ୍ଲାରେ ଜୋରଦାର ହୋଇଛି l ପୁରା ଯାଜପୁର ଜିଲ୍ଲାରେ 5ଲକ୍ଷ ସଭ୍ୟ ସଂଗ୍ରହ କରିବାକୁ ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ଆହ୍ୱାନ ଦେବା ପରେ ଯୁବ, ଛାତ୍ର, ମହିଳା, ପରି ଛାମୁଆ ସଂଗଠନର ସଦସ୍ୟମାନେ ସଭ୍ୟ ସଂଗ୍ରହ ଅଭିଯାନ ଜୋରଦାର କରିଛନ୍ତି l ପ୍ରତି ୱାଡରେ ଘର ଘରକୁ ଯାଇ ସଭ୍ୟ ସଂଗ୍ରହ ଅଭିଯାନ କରୁଛନ୍ତି ଜିଲ୍ଲା ବିଜେଡି ସଦସ୍ୟମାନେ l ଯାଜପୁର ପୌର ପରିଷଦର ପୂର୍ବତନ ଅଧକ୍ଷ ଭବ ପ୍ରସାଦ ଦାସ ବିଜେଡି ସଭ୍ୟ ସଂଗ୍ରହ ଅଭିଯାନର ମଙ୍ଗ ଧରିଛନ୍ତି l ବିଜେଡି ସଭାପତି ନବୀନ ପଟ୍ଟନାୟକ ତୃଣମୂଳ ସ୍ଥଳରୁ ସଭ୍ୟ ସଂଗ୍ରହ ଅଭିଯାନ କରି ଏକ କୋଟି କରିବାକୁ ନେତାଙ୍କୁ ଟାର୍ଗେଟ ଦେଇଛନ୍ତି l ସେହି ଅନୁସାରେ ଯାଜପୁରରେ ଅଭିଯାନ ଜୋରଦାର ହୋଇଛି l

ଭୁବନେଶ୍ୱର : ଡିଜିଟାଲ ପଦକ୍ଷେପର ଏକ ଅଂଶ ଭାବେ ଏବଂ ରେଳବାଇରେ ସବୁଜ ରେଳବାଇ ସହିତ କାର୍ଯ୍ୟାଳୟ ମାନଙ୍କରେ କାଗଜ ବିହୀନ କାର୍ଯ୍ୟକୁ ପ୍ରୋତ୍ସାହନ ଦେବାପାଇଁ ଓ ବର୍ତ୍ତମାନ କାର୍ଯ୍ୟପ୍ରଣାଳୀରେ ସ୍ୱଚ୍ଛତା ଓ ପାରଦର୍ଶିତା ଆଣିବାପାଇଁ ପୂର୍ବତଟ ରେଳପଥ ଇ-କାର୍ଯ୍ୟାଳୟ ପ୍ରଣାଳୀରେ କାର୍ଯ୍ୟକାରିତା ପାଇଁ ପଦକ୍ଷେପ ନେଇଅଛି ଯାହାକି ରାଷ୍ଟ୍ରୀୟ ଇ-ଗବର୍ଣ୍ଣIସର ଅଂଶବିଶେଷ ଅଟେ I

ପୂର୍ବତଟ ରେଳପଥର ମହାପ୍ରବନ୍ଧକ ଶ୍ରୀ ବିଦ୍ୟା ଭୂଷଣ ଆଜି ରେଳପଥର ମୁଖ୍ୟାଳୟ ରେଳସଦନ ଠାରେ ଅତିରିକ୍ତ ମହାପ୍ରବନ୍ଧକ ଶ୍ରୀ ସୁଧୀର କୁମାର ଓ ସମସ୍ତ ବିଭାଗୀୟ ପ୍ରମୁଖ ଅଧିକାରୀମାନଙ୍କ ଉପସ୍ଥିତିରେ ଏନଆଈସି ଇ-କାର୍ଯ୍ୟାଳୟ ପ୍ରଣାଳୀକୁ ଉଦ୍ଘାଟନ କରିଛନ୍ତି I

ଦୈନଦିନ ଦପ୍ତରୀ କାର୍ଯ୍ୟର କାର୍ଯ୍ୟପ୍ରଣାଳୀରେ ସ୍ୱଚ୍ଛତା ଓ ପାରଦର୍ଶିତା ଆଣିବା ଏବଂ କାଗଜ ବିହୀନ କାର୍ଯ୍ୟ କରିବାପାଇଁ ଏହି ଇ-କାର୍ଯ୍ୟାଳୟ ପ୍ରଣାଳୀ ଏକ ମୁଖ୍ୟ ମାଧ୍ୟମ ହୋଇପାରିବ I ଏହି ପ୍ରଣାଳୀ ମଧ୍ୟ ସବୁଜ ପଦକ୍ଷେପ ପାଇଁ ଏକ ମାର୍ଗ ହୋଇପାରିବ I

ନେସନାଲ ଇନଫରମେଟିକ୍ସ ସେଣ୍ଟର (ଏନଆଈସି) ଦ୍ୱାରା ବିକଶିତ କରାଯାଇଥିବା ଇ-କାର୍ଯ୍ୟାଳୟ ପ୍ରଣାଳୀ ଏକ କ୍ଲାଉଡ଼ ଏନାବେଲ ସଫ୍ଟଓୟାର ଯାହାକି ସିକନ୍ଦରାବାଦ ଓ ଗୁରୁଗାଓଁ ସ୍ଥିତ ରେଲଟଲ ଟାୟାର-୩ ସୀକୃତିପ୍ରାପ୍ତ ଡାଟା ସେଣ୍ଟର ଦ୍ୱାରା ପରିଚାଳିତ ହେବ I ଏହା କେନ୍ଦ୍ରୀୟ ସଚିବାଳୟ ମାନୁଆଲ ଇ-କାର୍ଯ୍ୟାଳୟ ପ୍ରଣାଳୀ ଅନ୍ତର୍ଗତ ଅଟେ I ସ୍ୱତନ୍ତ୍ର କାର୍ଯ୍ୟକାରିତା ଗୁଡିକୁ ଏକୀକୃତ ମାଧ୍ୟମରେ ପାରଦର୍ଶିତାକୁ ବୃଦ୍ଧି କରାଇବା, ସରକାରୀ କର୍ଯ୍ୟରେ ସଂସ୍କୃତି ଓ ନୈତିକତା ବଦଳାଇବା ସହିତ ଦାଇତ୍ୱବୋଧ ବୃଦ୍ଧି କରାଇବା ଏବଂ ସ୍ୱଚ୍ଛତା ଆଣିବା ପାଇଁ ଏହି ପ୍ରଣାଳୀ ସହାୟକ ହେବ I

ବର୍ତ୍ତମାନ ଚାରିଟି ଉପକରଣ ଯଥା ଫାଇଲ ମ୍ୟାନେଜମେଣ୍ଟ ପ୍ରଣାଳୀ (ଇ-ଫାଇଲ), ଜ୍ଞାନ ପରିଚାଳନା ପ୍ରଣାଳୀ (କେଏମଏସ), ସହଯୋଗ ଏବଂ ପରିଚାଳନା ପ୍ରଣାଳୀ (ସିଏଏମଏସ) ଏବଂ ବ୍ୟକ୍ତିଗତ ସୂଚନା ପରିଚାଳନା ପ୍ରଣାଳୀ (ପିଆଈଏମଏସ) ଇ-କାର୍ଯ୍ୟାଳୟ ପ୍ରଣାଳୀର ଅଂଶ ବିଶେଷ ହେବ I ମାନୁଆଲ ଫାଇଲ ପ୍ରଣାଳୀ ବନ୍ଦହେବା ପରେ ଓ ସମ୍ପୂର୍ଣ ଭାବେ ଏହି କାର୍ଯ୍ୟାଳୟ ପ୍ରଣାଳୀର ବ୍ୟବହାର ପରେ ଇ-କାର୍ଯ୍ୟାଳୟର ଉପକାରିତା ଦୃଷ୍ଟିଗୋଚର ହେବ I ବିଶ୍ୱସନୀୟତା, ଦକ୍ଷତା ଏବଂ ଉତ୍ପାଦନୀୟତା ବୃଦ୍ଧି କରିବାରେ ଏହି ପ୍ରଣାଳୀ ରେଳବାଇ କର୍ମଚାରୀଙ୍କୁ ବିଶେଷ ସହାୟକ ହେବ I ଏହି ପ୍ରଣାଳୀ ଦ୍ୱାରା ଡାଟା ସୁରକ୍ଷା ଏବଂ ସଂହତିକୁ ବୃଦ୍ଧିକରାଇବା ଓ ନୂତନତ୍ୱକୁ ପ୍ରୋତ୍ସାହନ ଦେବା ସହ ଅନୁତ୍ପାଦକ ପ୍ରଣାଳୀ ଦ୍ୱାରା ବ୍ୟୟ ହେଉଥିବା କର୍ମଚାରୀ ମାନଙ୍କ ସମୟ ଓ ପରିଶ୍ରମରୁ ମୁକ୍ତି ମିଳିପାରିବ I.