ଭୁବନେଶ୍ୱର : ଶିକ୍ଷା ଓ ଅନୁସନ୍ଧାନ (ଡିମ୍‌ଡ ଟୁ ବି ୟୁନିଭର୍ସିଟି) ପରିଚାଳିତ ଇନ୍‌ଷ୍ଟିଚ୍ୟୁଟ୍ ଅଫ୍ ଟେକ୍ନିକାଲ୍‌ ଏଜୁକେସନ୍ ଆଣ୍ଡ ରିସର୍ଚ୍ଚ (ଆଇଟିଇଆର୍‌) ବୈଷୟିକ ଶିକ୍ଷା କ୍ଷେତ୍ରରେ ତା’ର ସ୍ୱତନ୍ତ୍ର ସ୍ଥାନ ବଜାୟ ରଖିଥିବା ବେଳେ ୨୦୧୯ – ୨୦ ବ୍ୟାଚ୍‌ର ୯୧ ପ୍ରତିଶତ ଛାତ୍ରଛାତ୍ରୀ ପ୍ରମୁଖ କମ୍ପାନୀଗୁଡ଼ିକରେ ନିଯୁକ୍ତି ସୁଯୋଗ ପାଇଛନ୍ତି ।

ତିରିଶ ପ୍ରତିଶତ ଛାତ୍ରଛାତ୍ରୀ ଡେ ଜିରୋ, ଅର୍ଥାତ୍ ପ୍ରଥମ ଦିନର ନିଯୁକ୍ତି ପ୍ରକ୍ରିୟାରେ, ଅଧିକ ଦରମା ପ୍ରଦାନ କରୁଥିବା କମ୍ପାନୀଗୁଡ଼ିକ ଦ୍ୱାରା ବାର୍ଷିକ ହାରାହାରି ସାଢ଼େ ୬ ଲକ୍ଷ ଟଙ୍କା ପ୍ୟାକେଜ୍‌ରେ ନିଯୁକ୍ତି ପାଇଛନ୍ତି । ଚଳିତ ଶିକ୍ଷାବର୍ଷରେ ଆଇଟିଇଆରକୁ କ୍ୟାମ୍ପସ୍ ଚୟନରେ ୧୦୪ଟି କମ୍ପାନୀ ଆସିଥିବା ବେଳେ ୨୨୬୪ ଜଣ ଛାତ୍ରଛାତ୍ରୀଙ୍କୁ ଚାକିରୀ ସୁଯୋଗ ମିଳିଛି । ଏମାନଙ୍କ ମଧ୍ୟରୁ ସର୍ବାଧିକ ବାର୍ଷିକ ୩୧ ଲକ୍ଷ ଟଙ୍କା ପ୍ୟାକେଜ୍‌ର ଅଫର ପାଇଛନ୍ତି ।

ଅଲ୍ ଇଣ୍ଡିଆ କାଉନ୍‌ସିଲ ଫର ଟେକ୍ନିକାଲ୍ ଏଜୁକେସନ୍ (ଏଆଇସିଟିଇ) ଦ୍ୱାରା ସ୍ୱୀକୃତିପ୍ରାପ୍ତ ଆଇଟିଇଆର୍ ହିଁ ପୂର୍ବଭାରତର ଏକମାତ୍ର ଇଞ୍ଜିନିୟରିଂ କଲେଜ ଯିଏ କି ମାଇକ୍ରୋସଫ୍‌ଟ ଏବଂ ଇନଫୋସିସ୍ ଭଳି ପ୍ରମୁଖ କମ୍ପାନୀରୁ ସର୍ବାଧିକ ପ୍ଲେସ୍‌ମେଂଟ ଅଫର ପାଇଛି । ସେହିପରି କଗନିଜାଂଟ ଭଳି କମ୍ପାନୀ ମଧ୍ୟ ଆଇଟିଇଆର୍ ଛାତ୍ରଛାତ୍ରୀମାନଙ୍କୁ ଓଡ଼ିଶାରେ
ସର୍ବାଧିକ ନିଯୁକ୍ତି ସୁଯୋଗ ଦେଇଛି ।

ଆଇଟିଇଆର୍ ୨୦୧୯ର ନ୍ୟାସ୍‌ନାଲ୍ ଇନ୍‌ଷ୍ଟିୁଚ୍ୟୁସ୍‌ନାଲ୍ ର‌୍ୟାଙ୍କିଙ୍ଗ ଫ୍ରେମ୍ ୱାର୍କ (ଏନ୍‌ଆଇଆର୍‌ଏଫ୍‌) ର‌୍ୟାଙ୍କିଙ୍ଗ୍‌ରେ ଦେଶର ଇଞ୍ଜିନିୟରିଂ କଲେଜଗୁଡ଼ିକ ମଧ୍ୟରେ ୩୨ତମ ସ୍ଥାନ ହାସଲ କରିବାରେ ସଫଳ ହୋଇଛି । ୨୦୧୯ ଏନ୍‌ଆଇଆର୍‌ଏଫ୍ ର‌୍ୟାଙ୍କିଙ୍ଗରେ ସାରା ଦେଶରେ ବିଶ୍ୱବିଦ୍ୟାଳୟଗୁଡ଼ିକ ମଧ୍ୟରେ ସୋଆ ୨୪ତମ ସ୍ଥାନ ହାସଲ କରିଛି । ଏହି ଶିକ୍ଷାନୁଷ୍ଠାନ ଅନ୍ୟ ଏକ ସଫଳତା ସାଉଁଟିଥିଲା ଯେତେବେଳେ ଟାଇମ୍ସ ହାୟର୍ ଏଜୁକେସନ୍ ୱାର୍ଲ୍ଡ ୟୁନିଭର୍ସିଟି ର‌୍ୟାଙ୍କିଙ୍ଗରେ ୬୦୧ ରୁ ୮୦୦ କ୍ୟାଟେଗୋରିରେ ସ୍ଥାନୀତ ହୋଇଥିଲା ଏବଂ ଏହାର କମ୍ପ୍ୟୁଟର ସାଇନ୍ସ ପ୍ରୋଗ୍ରାମ ୬୦୦ ପ୍ଲସ୍‌ କ୍ୟାଟେଗୋରୀରେ ସ୍ଥାନ ପାଇଥିଲା ।
ଏହି ବର୍ଷ ଆଇଆଇଟି, ଭୁବନେଶ୍ୱର ଓ ଏନଆଇଟି, ରାଉରକେଲା ବ୍ୟତିତ ଓଡ଼ିଶାରେ ଆଇଟିଇଆର ଏକମାତ୍ର ବୈଷୟିକ ଶିକ୍ଷାନୁଷ୍ଠାନ ଅଟେ ଯେଉଁଠାରୁ ମାଇକ୍ରୋସଫ୍ଟ କ୍ୟାମ୍ପସ ଚାଳନା କରିଛି ।

ଆଇଟିଇଆର୍‌ର ଇଞ୍ଜିନିୟରିଂ ପ୍ରୋଗ୍ରାମ ନ୍ୟାସ୍‌ନାଲ୍ ବୋର୍ଡ ଅଫ୍ ଆକ୍ରିଡିସନ୍ (ଏନ୍‌ବିଏ)ରୁ ସ୍ୱୀକୃତି ପାଇଥିବା ବେଳେ ସମ୍ମାନସୂଚକ ଯୁକ୍ତରାଷ୍ଟ୍ର ଆମେରିକାର ଆକ୍ରିଡିସନ୍ ବୋର୍ଡ ଫର୍ ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜି (ଆବେଟ୍‌) ରୁ ମଧ୍ୟ ମାନ୍ୟତା ପାଇଛି । ମାଇକ୍ରୋସଫ୍ଟ ଏବଂ ଆମାଜନ୍ ଭଳି ବିଶ୍ୱସ୍ତରୀୟ ବ୍ରାଣ୍ଡ ଆଇଟିଇଆର୍‌କୁ ଗତ ଜୁନ ମାସରେ କ୍ୟାମ୍ପସ୍ ଚୟନରେ ଆସିଥିବା ବେଳେ ରାପ୍ୟୁଟା ରୋବୋଟିକ୍ସ, ଇନ୍‌ଫର୍‌ମାଟିକା, ଡେଲଏଟ୍‌, ଟେକ୍‌ସିଷ୍ଟମ୍ସ, କ୍ୟାପ୍‌ଜେମିନି ଡିଜିଟାଲ୍‌, ଇନ୍‌ଫୋସିସ୍‌ ଡିଜିଟାଲ୍‌, ମୁ ସିଗ୍‌ମା, ରବଟ ର୍ ବୋସ୍‌, ମ୍ୟାକ ସଫ୍ଟୱେୟାର, ଗ୍ଲୋବାଲ୍ ଲଜିକ୍‌, ଅପ୍‌ଟମ୍‌, ରିଲାୟନ୍ସ ଇଣ୍ଡଷ୍ଟ୍ରିଜ୍‌, ସିଗ୍‌ମଏଡ୍‌, ଓଡେଶା ଆଇଏନ୍‌ସି, ଭାଲ୍ୟୁଲାବ୍ସ, କ୍ଲାଉଡ୍‌ଗିନ୍ ଏବଂ ହୁଣ୍ଡାଇ ମୋବିସ୍ ଭଳି କମ୍ପାନୀ ଡେ ଜିରୋ ସ୍ଲଟ୍‌ରେ ଛାତ୍ରଛାତ୍ରୀମାନଙ୍କୁ ନିଯୁକ୍ତି ଦେଇଛନ୍ତି । ଏହି କମ୍ପାନୀଗୁଡ଼ିକ ବାର୍ଷିକ ସାଢ଼େ ୬ ଲକ୍ଷ ଏବଂ ତଦୁର୍ଦ୍ଧ୍ୱ ଦରମାର ଅଫର ଦେଇଥିବା ଜଣାପଡ଼ିଛି ।

ଛାତ୍ରଛାତ୍ରୀମାନଙ୍କର କ୍ୟାମ୍ପସ୍ ଚୟନ ପ୍ରକ୍ରିୟାରେ ଆଇଟିଇଆର୍‌ର ୧୧୬୪ ଜଣ ଛାତ୍ରଛାତ୍ରୀଙ୍କୁ ଇନ୍‌ଫୋସିସ୍‌, ୱିପ୍ରୋ ଓ କଗ୍‌ନିଜାଂଟ ଭଳି କମ୍ପାନୀ ଡେ ୱାନ୍ ହାୟରି ପ୍ରକ୍ରିୟାରେ ନିଯୁକ୍ତି ଦେଇଛନ୍ତି ଯାହା ଷ୍ଟୁଡେଂଟ ଇନ୍‌ଟେକ୍ ରାସିଓ ଅନୁଯାୟୀ ପୂର୍ବଭାରତରେ ସର୍ବୋତ୍କୃଷ୍ଟ ବୋଲି ଜଣାପଡ଼ିଛି । କ୍ୟାପ୍‌ଜେମିନି, ଆଇବିଏମ୍‌, ମାଇଣ୍ଡଟ୍ରି, ଏନ୍‌ସିଆର୍ କର୍ପ, ଆଇବିଏସ୍‌ ସଫ୍ଟୱେୟାର, ଏକ୍ସପାନ୍ସନ୍‌, ସିଅର୍ ହୋଲ୍ଡିଙ୍ଗ୍‌, ରାମ୍‌କି, ଇନ୍‌ଫୋଗେନ୍‌, ଜେଡ୍ ଗ୍ଲୋବାଲ, ସିଜିଆଇ, ଭୋଲଟାସ୍ , ଡିଏକ୍ସସି ଟେକ୍ନୋଲୋଜି, ଆଇଟିସି ଇନ୍‌ଫୋଟେକ୍‌, ହେକ୍ସାୱେର୍‌, ଭାଲ୍ୟୁ ମୋମେନ୍‌ଟମ୍ ଏବଂ ଏଚ୍‌ପି ଭଳି ପ୍ରମୁଖ କମ୍ପାନୀ କ୍ୟାମ୍ବସ୍‌ ପରିଦର୍ଶନରେ ଆସି ନିଯୁକ୍ତି ପ୍ରକ୍ରିୟା ଜାରି ରଖିଛନ୍ତି । ଉଚ୍ଚକୋଟୀର ଶିକ୍ଷା ବ୍ୟବସ୍ଥା ପ୍ରକ୍ରିୟା ଏବଂ ଜ୍ଞାନ କୌଶଳ ପର୍ଯ୍ୟବେସିତ ଶିକ୍ଷା ପ୍ରଣାଳୀକୁ ନେଇ ଖ୍ୟାତି ଅର୍ଜନ କରିଥିବା ସୋଆ କୋଭିଡ-୧୯ ମହାମାରୀ ଦ୍ୱାରା ଉଦ୍ଭବ ହୋଇଥିବା ପରିସ୍ଥିତିରେ ୨୦୨୧ ବ୍ୟାଚର ଛାତ୍ରଛାତ୍ରୀମାନଙ୍କର ନିଯୁକ୍ତି ନିମନ୍ତେ ବିଶ୍ୱବିଦ୍ୟାଳୟର ଟ୍ରେନିଂ ଏବଂ ପ୍ଲେସ୍‌ମେଂଟ ୱିଙ୍ଗ୍ କ୍ୟାମ୍ପସ୍ ଡେ-ଜିରୋ ଚୟନ ସମ୍ବନ୍ଧୀୟ କାର୍ଯ୍ୟ ହାତକୁ ନେବା ଆରମ୍ଭ କରିଛି ।

ଭୁବନେଶ୍ୱର:ଓଡିଶା ପାଇଁ ଏକ ଭଲ ଖବର ।ରାଜ୍ୟରେ ସୁସ୍ଥ ହେଲେ ଆଉ ୭୯ କରୋନା ପଜିଟିଭ ।ସେମାନେ ଗଞ୍ଜାମରୁ ୧୧, ଯାଜପୁରରୁ ୫, ବାଲେଶ୍ୱରରୁ ୧୭, କଟକରୁ ୪, ଭଦ୍ରକରୁ ୨୮, କେନ୍ଦୁଝରରୁ ୩, ଖୋର୍ଦ୍ଧାରୁ ୨, ବଲାଙ୍ଗିରରୁ ୨ ଓ ପୁରୀରୁ ୭ ଜଣ ।ଏନେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଟ୍ୱିଟ କରି ସୂଚନା ଦିଆ ଯାଇଛି ।ଏହାକୁ ମିଶାଇ ରାଜ୍ୟରେ କରୋନା ସୁସ୍ଥତା ସଂଖ୍ୟା ୮୧୨ ରେ ପହଁଚିଲା। ଏହାସହ ୧୫୯୩ପଜିଟିଭ୍‌ଙ୍କ ଭିତରୁ ୭ ମୃତ, ୭୮୧ଚିକିତ୍ସିତ ହେଉଛନ୍ତି।

ଭୁବନେଶ୍ୱର () ଚଳିତ ଖରିଫରେ ଚାଷୀମାନଙ୍କୁ ଉନ୍ନତ ବିହନ, ସାର ଏବଂ କୃଷି ସାମଗ୍ରୀ ଯୋଗାଇବା ନିମନ୍ତେ ଆବଶ୍ୟକ ପଦକ୍ଷେପ ନିଆଯାଇଛି । ଚାଷୀମାନେ ଯେପରି ସୁବିଧାରେ ବିହନ ଓ ସାର ଆବଶ୍ୟକ ଅନୁସାରେ ପାଇପାରିବେ ସେଥିନିମନ୍ତେ ତଦାରଖ କାର୍ଯ୍ୟକୁ ବ୍ୟାପକ କରିବା ପାଇଁ ଜିଲ୍ଲା ଦାୟୀତ୍ୱରେ ଥିବା ନୋଡାଲ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ବୋଲି କୃଷି ଓ କୃଷକ ଶସକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ ବିକାଶ, ଉଚ୍ଚ ଶିକ୍ଷା ମନ୍ତ୍ରୀ ଡ଼ଃ ଅରୁଣ କୁମାର ସାହୁ କହିଛନ୍ତି । ଏଥିସହିତ କୋଭିଡ଼-୧୯ ସଂକ୍ରମଣ ପରିପ୍ରେକ୍ଷୀରେ ଖରିଫ ଚାଷର ଗୁରୁତ୍ୱକୁ ଦୃଷ୍ଟିରେ ରଖି କୃଷି ଅଧିକାରୀ ଓ କର୍ମଚାରୀମାନଙ୍କୁ ସଦର ମହକୁମା ଛାଡି ନ ଯିବାପାଇଁ ନିର୍ଦ୍ଦେଶ ଦିଆଯାଇଛି ଏବଂ ଖିଲାପକାରୀଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମନ୍ତ୍ରୀ ଡ଼ଃ ସାହୁ କହିଛନ୍ତି ।

ଆଜି ପୂର୍ବାହ୍ନରେ କୃଷି ଭବନଠାରେ ଆୟୋଜିତ ବିଭାଗର ବରିଷ୍ଠ ଅଧିକାରୀ ଏବଂ ଜିଲ୍ଲା ଦାୟିତ୍ୱରେ ଥିବା ନୋଡାଲ ଅଧିକାରୀମାନଙ୍କ ବୈଠକରେ ଅଧ୍ୟକ୍ଷତାକରି ମନ୍ତ୍ରୀ ଡ଼ଃ ସାହୁ ବିହନ ଓ ସାର ଯୋଗାଣ ସଂପର୍କରେ ସମୀକ୍ଷା କରିଥିଲେ ।ସାମ୍ପ୍ରତିକ ପରିସ୍ଥିତିରେ ରାଜ୍ୟରେ ଖରିଫ ଚାଷକୁ ପ୍ରାଥମିକତା ପ୍ରଦାନ କରି କୃଷିକାର୍ଯ୍ୟକୁ ଆଗେଇ ନେବାପାଇଁ କୃଷି ଅଧିକାରୀମାନଙ୍କୁ ଅଧିକ ତତ୍ପରତା ପ୍ରକାଶ କରିବାକୁ ପଡ଼ିବ ବୋଲି ମନ୍ତ୍ରୀ ଡ଼ଃ ସାହୁ କହିଥିଲେ । ଜୁନ ୧ ତାରିଖରୁ ୧୦ ତାରିଖ ମଧ୍ୟରେ ସମସ୍ତ ନୋଡାଲ ଅଧିକାରୀ ସେମାନଙ୍କ ଦାୟିତ୍ୱରେ ଥିବା ଜିଲ୍ଲା ପରିଦର୍ଶନ କରି ତୃଣମୂଳ ସ୍ତରରେ ଚାଷ କାର୍ଯ୍ୟରେ ଉପୁଜୁଥିବା ସମସ୍ୟାର ସମାଧାନ କରିବା ପାଇଁ ବୈଠକରେ ନିର୍ଦ୍ଦେଶ ଦିଆଯାଇଛି । ଏଥି ସହିତ ବିହନ, ସାର ଓ ଅନ୍ୟାନ୍ୟ କୃଷି ସାମଗ୍ରୀର ଯୋଗାଣକୁ ନିଶ୍ଚିତ କରିବା ପାଇଁ ନୋଡାଲ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ।

ବୈଠକରେ ସୋସିଆଲ୍ ମିଡିଆର ବହୁଳ ଉପଯୋଗ କରି ଚାଷୀମାନଙ୍କୁ ସିଧାସଳଖ ସୂଚନା ପ୍ରଦାନ ଓ ପରାମର୍ଶ ଦେବା ଉପରେ ଗୁରୁତ୍ୱାରୋପ କରାଯାଇଥିଲା । ପ୍ରତି ପଂଚାୟତରେ ହ୍ୱାଟ୍‌ସ୍‌ଆପ୍ ଗ୍ରୁପ ଗଠନ କରି ଏଥିରେ ଅଧିକରୁ ଅଧିକ ଚାଷୀମାନଙ୍କୁ ସାମିଲ କରିବା ପାଇଁ ମନ୍ତ୍ରୀ ଡ଼ଃ ସାହୁ ନିର୍ଦ୍ଦେଶ ଦେଇଥିଲେ । ଏଥିସହିତ କୋଭିଡ଼୍‌-୧୯ ସଂକ୍ରମଣ ପରିପ୍ରେକ୍ଷୀରେ ଅଧିକାରୀ ଓ କର୍ମଚାରୀମାନେ କାର୍ଯ୍ୟକ୍ଷେତ୍ରରେ ସାମାଜିକ ଦୁରତ୍ୱ, ମାସ୍କ ପରିଧାନ ଏବଂ ସାନିଟାଇଜେସନ୍ କୁ କଡାକଡ଼ି ଭାବରେ ଅନୁପାଳନ କରିବାକୁ ମନ୍ତ୍ରୀ ଡ଼ଃ ସାହୁ କହିଥିଲେ ।

ବୈଠକରେ କୃଷି ଓ କୃଷକ ସଶକ୍ତିକରଣ ବିଭାଗର ସ୍ୱତନ୍ତ୍ର ଶାସନ ସଚିବ ଶ୍ରୀ ସୁରେଶ କୁମାର ବଶିଷ୍ଠ, କୃଷି ଓ ଖାଦ୍ୟଉତ୍ପାଦନର ନିର୍ଦ୍ଦେଶକ ଡ଼ଃ ଏମ୍‌. ମୁଥୁ କୁମାରଙ୍କ ସମେତ ବିଭାଗର ବରିଷ୍ଠ ପଦାଧିକାରୀମାନେ ଉପସ୍ଥିତ ଥିଲେ ।

ଭୁବନେଶ୍ୱର : ଶୁକ୍ରବାରଠାରୁ ପୁନର୍ବାର ଆରମ୍ଭ ହେବ ପୁରୀ ଓ ଭୁବନେଶ୍ୱରର ରେ ଚାଲିଥିବା ବିଭିନ୍ନ ଉନ୍ନୟନ ମୂଳକ କାର୍ଯ୍ୟ l  ଭିଡ଼ିଓ କନ୍ଫରେନ୍ସିଂରେ କାର୍ଯ୍ୟର ସମୀକ୍ଷା କରିବା ସହ ପୁନଃ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ l  ପୁରୀ ଶ୍ରୀମନ୍ଦିର ଓ ଭୁବନେଶ୍ୱର ଲିଙ୍ଗରାଜ ମନ୍ଦିର ଚତୁପାର୍ଶ୍ୱ ସୌନ୍ଦର୍ଯ୍ୟକରଣ କାର୍ଯ୍ୟ ପୁଣି ଶୁକ୍ରବାର ଠାରୁ ଆରମ୍ଭ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି l କୋରନା ଭାଇରସ ଯୋଗୁଁ 2 ମାସ ବନ୍ଦ ରହିଥିଲା ଉନ୍ନୟନ କାର୍ଯ୍ୟ l ବୈଠକରେ ମୁଖ୍ୟଶାସନ ସଚିବ, ଅସିତ ତ୍ରିପାଠୀ, ଉନ୍ନୟନ କମିଶନ ସୁରେଶ ମହାପାତ୍ର, 5 ଟି ସଚିବ ଭି. କେ ପାଣ୍ଡିଆନ, ପୁର୍ତ୍ତ ସଚିବ କ୍ରିଷନ କୁମାର, ବିଏମ୍ସି କମିଶନର ପ୍ରେମଚନ୍ଦ୍ର ଚୌଧୁରୀ, ପୁରୀ ଜିଲ୍ଲାପାଳ ଏବଂ ଏସ୍ପି ଉପସ୍ଥିତ ଥିଲେ l  ପୁରୀ ଏବେ ନୂଆ ରୂପ ନେଇଛି l ଏହି ସୌନ୍ଦର୍ଯ୍ୟ କାମ ପୁଣି ଥରେ ଜୋରଦାର କରିବା ଉପରେ ମୁଖ୍ୟମନ୍ତ୍ରୀ ଫୋକସ କରିଛନ୍ତି l

ଯାଜପୁର : ରକ୍ତଦାନ ମହତ ଦାନ। କେହି କେହି ଏହି ବାଣୀକୁ ନିଜର ବ୍ରତ ଭାବେ ଗ୍ରହଣ କରିଛନ୍ତି। ଏହି ଧାରାରେ ସାମିଲ ହୋଇଛନ୍ତି ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ। ଆଜି ହେଉଛି ତାଙ୍କର ଜନ୍ମଦିନ। ତେଣୁ ଜନ୍ମଦିନରେ ସେ ରକ୍ତଦାନ କରି କରିଛନ୍ତି। ଏହାସହ ଅନେକ ଲୋକଙ୍କୁ ସ୍ୱଚ୍ଚାକୃତ ରକ୍ତଦାନ କରିବାକୁ ପରାମର୍ଶ ଦେଇଛନ୍ତି।
ଦେଶରେ କରୋନା ପ୍ରଭାବରେ ଲକ୍ ଡାଉନ ଚାଲିଛି। ଏହାର ସିଧାସଳଖ ପ୍ରଭାବ ରକ୍ତ ଭଣ୍ଡାର ଉପରେ ପଡିଛି। ସେଠାରେ ଗଚ୍ଛିତ ରକ୍ତର ପରିମାଣ ମଧ୍ୟ ହ୍ରାସ ପାଇଛି। ତେଣୁ ଯାଜପୁର ଜିଲ୍ଲାପାଳ ରକ୍ତଦାନ କରି ଜନ୍ମଦିନ ପାଳିବାକୁ ଅନେକ ଜିଲ୍ଲାବାସୀ ପ୍ରସଂଶା କରିଛନ୍ତି।ଯେଉଁଠି ଜିଲ୍ଲା ମୁଖିଆ ରକ୍ତଦାନ ପାଇଁ ଅଣ୍ଟା ଭିଡୁଛନ୍ତି ।ସେଠି କେବେ ରକ୍ତ ସଙ୍କଟ ଦେଖା ଯିବନାହିଁ ବୋଲି ଅନେକ ବୁଦ୍ଧିଜୀବୀ ମତ ରଖିଛନ୍ତି।

ଭୁବନେଶ୍ୱର : ରାଜ୍ୟରେ ପ୍ରଥମଥର ଜଣେ ଡାକ୍ତରଙ୍କ ଶରୀର ରେ କରୋନା ଭୂତାଣୁ ଚି଼ହ୍ନଟ ହେଇଛି l ଡାକ୍ତର ଜଣକ ହେଲେ ଶିଶୁ ବିଶେଷଜ୍ଞ ଏବଂ ସେ କଟକ ସିଟି ହସ୍ପିଟାଲରେ କାର୍ଯ୍ୟରତ ରହିଥିଲେ l ସବୁଠାରୁ ବଡ ବିଷୟ ହୋଉଛି ସେ କରୋନା ରୋଗୀ ଙ୍କୁ ଟ୍ରିଟମେଣ୍ଟ କରୁନଥିଲେ କିମ୍ବା ରୋଗୀଙ୍କ ସଂସ୍ପଶରେ ଆସିନଥିଲେ l ତଥାପି ତାଙ୍କ ଶରୀରରେ କରୋନା ପଜିଟିଭ ଚି଼ହ୍ନଟ ହେବା ଚିନ୍ତା ର ବିଷୟ l ଏବେ ସେ ଭୁବନେଶ୍ୱର ଅଶ୍ୱିନୀ କୋଭିଡ ହସ୍ପିଟାଲରେ ଆଡମିଟ ହୋଇ ଚିକିତ୍ସିତ ହୋଉଛନ୍ତି l ପୂର୍ବରୁ ଭାରତରେ ବିଭିନ୍ନ ସ୍ଥାନରେ ଡାକ୍ତର , ନର୍ସ ମାନଙ୍କ ଶରୀରରେ କରୋନା ପଜିଟିଭ ଚି଼ହ୍ନଟ ହୋଇଛି କିନ୍ତୁ ଓଡ଼ିଶାରେ ଆଜି ପ୍ରଥମ ଥର ଡାକ୍ତରଙ୍କ ଶରୀରରେ କରୋନା ପଜିଟିଭ ଚି଼ହ୍ନଟ ହୋଇଛି l ଯେହେତୁ ସେ ଜଣେ ଶିଶୁ ରୋଗ ବିଶେଷଜ୍ଞ ଏବଂ ସେ ଚିକିତ୍ସା କାର୍ଯ୍ୟରେ କାର୍ଯ୍ୟରତ ଥିଲେ ତେଣୁ ଅନେକ ରୋଗୀ ତାଙ୍କ ସଂସ୍ପର୍ଶ ରେ ଆସିଥିବେ ଏବଂ ତାଙ୍କୁ ମଧ୍ଯ କରୋନା ସଂକ୍ରମିତ ର ଆଶଙ୍କା ରହୁଛି ଯାହା ଏବେ ଚିନ୍ତା ବଢ଼ାଇଛି l ସିଟି ହସ୍ପିଟାଲର ସମସ୍ତ କର୍ମଚାରୀ ଯୋଉମାନେ ଡାକ୍ତରଙ୍କ ସଂସ୍ପର୍ଶ ରେ ଆସିଥିଲେ ସମସ୍ତଙ୍କୁ ଆଇସୋଲେସନ ରେ ରଖାଯାଇଛି l