ବ୍ୟାସନଗର: ଆଜିକୁ ବାଇସି ଦିନରେ ପହଞ୍ଚିଛି ଲକଡାଉନ୍ । ଯାଜପୁର ଜିଲ୍ଲା ପ୍ରଶାସନ ପକ୍ଷରୁ ଲକଡାଉନ୍ କୁ ବଳବତ୍ତର ପାଇଁ ପ୍ରାୟ ପ୍ରତିଦିନ ନୂଆ ନୂଆ ନିୟମ ମାନ ପ୍ରଚଳନ ହେଉଛି । କେତେବେଳେ ଅତ୍ଯାବଶ୍ଯକ ସାମଗ୍ରୀ ଦୋକାନ ଖୋଲିବା ନିୟମ ତ କେତେବେଳେ ଯାନବାହନ କଟକଣା । ଏହିପରି ଭାବେ ଜନସାଧାରଣଙ୍କ ସୁବିଧାକୁ ଦୃଷ୍ଟିରେ ରଖି ବହୁ ସମୟରେ ନିୟମକୁ ପରିବର୍ତ୍ତନ ମଧ୍ୟ କରାଯାଇଛି । ଏହି ପରିପ୍ରେକ୍ଷୀରେ ଯାନବାହାନ କଟକଣାକୁ ଗୁରୁତ୍ୱ ସହ ସାମାଜିକ ଦୂରତା ପ୍ରତି ମଧ୍ୟ ଯଥେଷ୍ଟ ଗୁରୁତ୍ବ ଦିଆଯାଉଥିବା ନଜରକୁ ଆସୁଛି ।କିନ୍ତୁ କିଛି ଅମାନିଆ ଯେପରି ଏହି ନିୟମକୁ ମାନିବାକୁ ଜମାରୁ ପ୍ରସ୍ତୁତ ନଥିବା ଭଳି ଲାଗୁଛି ।ଗତକାଲି ଲକଡାଉନ୍ ଅମାନ୍ଯର ଦୁଇଟି ମାମଲା ରୁଜ୍ଜୁ ହେବା ସହ ୩୯ଟି ଦୁଇ ଚକିଆ ଓ ୨ଟି ଚାରି ଚକିଆ ଜବତ୍ କରାଯାଇଥିଲା ।ସେହି ସବୁ ଗାଡି ଚାଳକଙ୍କଠାରୁ ୧୫୦୦୦ଟଙ୍କା ଜୋରିମାନା ଆଦାୟ କରାଯାଇଥିଲା ।ସେହିପରି ଆଜି ମଧ୍ୟ ନିୟମକୁ ଅବମାନନା କରୁଥିବା ୫୦ରୁ ଉର୍ଦ୍ଧ୍ବ ଦୁଇ ଚକିଆ ସହିତ ଗୋଟିଏ ଚାରି ଚକିଆ ଜବତ୍ କରାଯାଇଛି ।ଦୋକାନୀମାନଙ୍କ ପାଇଁ ହୋଇଥିବା ନିୟମକୁ ଖିଲାଫ କରିବା ଅଭିଯୋଗରେ ୫ଟି ଦୋକାନୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ତା ସହ ମୋଟର ଯାନ ନିୟମ ଅନୁଯାୟୀ ୨୫୦୦୦ରୁ ଉର୍ଦ୍ଧ୍ବ ଟଙ୍କା ଆଦାୟ କରାଯାଇଛି । ମତେ ଯେତେ ମାଠିବୁ ମାଠ୍ ମୁଁ ସେହି ଦରପୋଡା କାଠ ଉକ୍ତି ଅନୁସାରେ, ଅମାନିଆଙ୍କୁ ଯେତେ କଠୋର ନିୟମ ହେଲେ ମଧ୍ୟ କିଛି ଫରକ ପଡୁନଥିବା ପରି ପ୍ରତୀୟମାନ ହେଉଅଛି ।
