ମାର୍ଚ୍ଚ 16ରେ ହେବ ରାଜ୍ୟସଭା ନିର୍ବାଚନ l ଚାରୋଟି ଆସନ ପାଇଁ ହେବାକୁ ଥିବା ନିର୍ବାଚନ ଲାଗି ନୋମିନେସନ ଶେଷ ତାରିଖ ମାର୍ଚ୍ଚ 5 ତାରିଖ | ପ୍ରାର୍ଥୀପତ୍ର ଯାଞ୍ଚ ତାରିଖ ମାର୍ଚ୍ଚ 6, ପ୍ରାର୍ଥୀପତ୍ର ପ୍ରତ୍ୟାହାର 9 ତାରିଖ ଏବଂ 16 ତାରିଖରେ ରାଜ୍ୟସଭା ପାଇଁ ଭୋଟ ଏବଂ ସେହିଦିନ ହିଁ ଗଣତି ହେବ l ଏନେଇ ନିର୍ବାଚନ କମିଶନ ପ୍ରେସ ବିଜ୍ଞପ୍ତି ପ୍ରକାଶ କରିବା ପରେ ରାଜ୍ୟସଭା ନିର୍ବାଚନ ନେଇ ଉଷ୍ମତା ବୃଦ୍ଧି ପାଇଛି ଓଡ଼ିଶାରେ l ରାଜ୍ୟସଭା ଗଣିତ କହୁଛି ଖାଲି ପଡୁଥିବା 4ଟି ଆସନ ମଧ୍ୟରୁ 2ଟି ବିଜେପି ଓ ଗୋଟିଏ ବିଜେଡି ଦଖଲ କରିବା ନିଶ୍ଚିତ l ତେବେ 4ର୍ଥ ଆସନ କିଏ ଦଖଲ କରିବ ତାହା ସବୁଠାରୁ ଚର୍ଚ୍ଚାର ବିଷୟ l ବିଜେପି ବିଜେଡିକୁ 4ର୍ଥ ଆସନ ଛାଡିବ ନା ବିଜେଡି ବିଜେପିକୁ ପୁଣି ଛାଡିବ ତାହାକୁ ନେଇ ରାଜନୈତିକ ଚର୍ଚ୍ଚା ଲାଗିରହିଛି l ଅନ୍ୟପଟେ ସଂଖ୍ୟା ନଥାଇ କଂଗ୍ରେସ ରାଜ୍ୟସଭା ନିର୍ବାଚନ ଲଢ଼ିବା ପାଇଁ ଅଣ୍ଟା ଭିଡିଛି l ତେବେ ବିଜେପି ଓ ବିଜେଡିରୁ ରାଜ୍ୟସଭାକୁ ନେଇ କେଉଁ ନା ସବୁ ଚର୍ଚ୍ଚାରେ ଅଛି ନଜର ପକାନ୍ତୁ l

ବିଜେପି : ରାଷ୍ଟ୍ରୀୟ ସଭାପତି ନିତିନ ନବୀନ, ବିଜେପି ଓଡିଶା ପ୍ରଭାରୀ ବିଜୟ ସିଂହପାଲ ତୋମାର, ବିଜେପି ରାଜ୍ୟସଭାପତି ମନମୋହନ ସାମଲ, ବରିଷ୍ଠ ବିଜେପି ନେତା ବିଶେଶ୍ୱର ଟୁଡୁ, ସମୀର ମହାନ୍ତି,ବସନ୍ତ ପଣ୍ଡା,ଗୋଲକ ମହାପାତ୍ର ନାଁ ଚର୍ଚ୍ଚାରେ ରହିଛି l

ବିଜେଡି : ସୁଜାତା ପାଣ୍ଡିଆନ, ପ୍ରଣବ ପ୍ରକାଶ ଦାସ, ସଂତୃପ୍ତ ମିଶ୍ର, ଦେବୀ ପ୍ରସାଦ ମିଶ୍ର ନାଁ ଚର୍ଚ୍ଚାରେ ରହିଛି l

ସ୍ୱାଧୀନ : ଡି. ଆର ପଟନାୟକ, ଦିଲ୍ଲୀପ ରାୟଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି l ତେବେ ଏଯାଏ ଉଭୟ ବିଜେଡି ଓ ବିଜେପି ରାଜ୍ୟସଭା କାର୍ଡ ଖୋଲିନାହାନ୍ତି l

ବିଜେଡିରୁ ନିଲମ୍ବନ ହେବା ପରେ ଦୁଇ ବିଧାୟକ ସନାତନ ମହାକୁଡ଼ ଓ ଅରବିନ୍ଦ ମହାପାତ୍ର ଚର୍ଚାରେ l ବଜେଟ ଅଧିବେଶନର ପ୍ରଥମ ଦିନରେ ବିଧାନସଭାରେ ଦୁଇ ବିଧାୟକ ଆସନ ପରିବର୍ତ୍ତନ ହୋଇଛି l ଅରବିନ୍ଦ ମହାପାତ୍ରଙ୍କ ସିଟ ଆଗରୁ ଥିଲା G19, ଏବେ ହେଲା F19 । ସନାତନ ମହାକୁଡଙ୍କ ସିଟ ଆଗରୁ ଥିଲା F14, ହେଲା F21 । ଅରବିନ୍ଦ ମହାପାତ୍ରଙ୍କ ସିଟ ସୁନିଲ ମହାନ୍ତିଙ୍କ ସହ ପରିବର୍ତ୍ତନ ହେଲା । ମାଧବ ଧଡାଙ୍କ ସିଟ ସହ ପରିବର୍ତ୍ତନ ହେଲା ସନାତନ ମହାକୁଡଙ୍କ ସିଟ ।ଏବେ ଏହି ଦୁଇ ଜଣ ହେଉଛନ୍ତି ସ୍ୱାଧୀନ ବିଧାୟକ l ତେବେ ଆଜି ଉଭୟ ବିଧାୟକଙ୍କ ଭବିଷ୍ୟତ ରାଜନୈତିକ ଅଭିମୁଖ୍ୟର ସଂକେତ ମିଳିଛି l ରାଜ୍ୟପାଳ ଅଭିଭାଷଣକୁ ବିରୋଧ କରି କଂଗ୍ରେସ ଓ ବିଜେଡି କକ୍ଷତ୍ୟାଗ କରିଥିବା ବେଳେ ଏହି ଦୁଇ ବିଧାୟକ ନିଜ ଆସନରେ ବସି ରହିଥିଲେ l ଯାହା ଏବେ ରାଜ୍ୟ ରାଜନୀତିକୁ ଉଷ୍ମ କରିଛି l ବିଜେଡିରୁ ନିଲମ୍ବିତ ଦୁଇ ବିଧାୟକ ବିଜେପି ଆଡକୁ ଢଳୁଥିବା ଚର୍ଚ୍ଚା ହେଉଛି l ତେବେ ଦୁଇ ବିଧାୟକ କିନ୍ତୁ ଏନେଇ ମୁହଁ ଖୋଲିଛନ୍ତି l ସନା ମହାକୁଡ଼ ବିଜେଡି କୁ ଆଉ ଫେରିବେ ନାହିଁ ବୋଲି ଖୋଲା ଖୋଲି କହିଥିବା ବେଳେ ଅରବିନ୍ଦ କହିଛନ୍ତି ସ୍ୱାଧୀନ ବିଧାୟକ ଭାବେ ଯାହା ତାଙ୍କର କର୍ତ୍ତବ୍ୟ ସେ କରିବେ l

ବିଧାନସଭାରେ ସରକାରଙ୍କୁ ଘେରିବାକୁ କଂଗ୍ରେସ ପ୍ରସ୍ତୁତ କଲା ରଣନୀତି। ଦଳ ପକ୍ଷରୁ କୁହାଯାଇଛି ଯେ.

*ଧାନ ମଣ୍ଡି ଅଭାବି ବିକ୍ରି, କଟନୀ ଛଟନୀ*
*ନାରୀ ନିର୍ଯାତନା*
*ଆଇନ ଶୃଙ୍ଖଳା ବିପର୍ଯ୍ୟସ୍ତ*
*ବଜେଟର ଅର୍ଥ ଜିଲ୍ଲାୱାରୀ ଖର୍ଚ ନହେବା*
*ଜିଲ୍ଲା ଯୋଜନା ବୋର୍ଡ ଗଠନ ନହେବା ଦ୍ବାରା ଜିଲ୍ଲା ଗୁଡିକରେ ଅର୍ଥ ପଡ଼ିରହିଛି*
*ରାଜ୍ୟରେ ସ୍ବାସ୍ଥ୍ୟ ସମସ୍ୟା*
*ନୂତନ ପଞ୍ଚାୟତ ଓ ବ୍ଲକ ଗଠନ*
*MGNREGA Bachao VB G-RAM-G Hatao*
*ଶିକ୍ଷା ଓ ଶିକ୍ଷକ ଅଭାବ*
*ରାଜ୍ୟକୁ ସ୍ବତନ୍ତ୍ର ପାହ୍ୟା*
*ସାମାଜିକ ବାଛନ୍ଦ ଜାତି ବିଭେଦ – ଅଙ୍ଗନବାଡି*
*ପେସା ଆଇନ*
*ଅନୁସୂଚିତ ଜାତି ଓ ଜନଜାତି କମିଶନ*
*ଅନୁସୂଚିତ ଜାତି/ଜାତୀୟ ଜନଜାତି/ସଂଖ୍ୟାଲଘୁ ସମ୍ପ୍ରଦାୟ ପ୍ରତି ଅତ୍ୟାଚାର*
*ମହାନଦୀ ଜଳ ବିବାଦ*
*ରତ୍ନ ଭଣ୍ଡାର ପ୍ରସଙ୍ଗ*
*କେନ୍ଦ୍ରାପଡ଼ା ରାଜନଗର ଅଙ୍ଗନବାଡ଼ିଙ୍କୁ ଜାତି ଆକ୍ଷେପ”କୁ ପ୍ରସଙ୍ଗ କରିବ କଂଗ୍ରେସ ବୋଲି ପ୍ରତିକ୍ରିୟା ରଖିଛନ୍ତି ରାମଚନ୍ଦ୍ର କାଡ଼ାମ । ଏହା ସହ ଲୋକଙ୍କ ସ୍ବାର୍ଥ ଆମର ପ୍ରସଙ୍ଗ ବୋଲି କହିଛନ୍ତି ଭକ୍ତ ଚରଣ ଦାସ।

ପ୍ରଣବ ପ୍ରକାଶ ଦାସ (ବବି ଦାସ) l ଓଡିଶା ରାଜନୀତିର ଜନମାନସର ବିଶ୍ୱସ୍ତ ନେତା ଭାବେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି l ଭିଡ ଭିତର ନେତା ସେ l ଲୋକେ ଯେଉଁଠି ବବି ଦାସ ସେଇଠି l ସଭାସମିତି କି ରାଜନୈତିକ କାର୍ଯ୍ୟକ୍ରମ ହେଉ ଅବା ସାମାଜିକ କାର୍ଯ୍ୟକ୍ରମ l ସବୁଠି ସବୁବେଳେ ଲୋକଙ୍କ ସହ ରହିବାକୁ ପସନ୍ଦ କରନ୍ତି ବବି l ଜନସେବାକୁ ଜୀବନର ମୂଳମନ୍ତ୍ର କରି ସେ ଜନସେବା ଜାରି ରଖିଛନ୍ତି l କ୍ଷମତାରେ ଥିବା ବେଳେ ଯେମିତି କ୍ଷମତାରେ ନଥିବା ବେଳେ ବି ସେମିତି l ପୁରା ଓଡ଼ିଶାରେ ବବି ଦାସଙ୍କ ପ୍ରତି ଲୋକଙ୍କ ଭଲ ପାଇବା ଓ ଆଶୀର୍ବାଦ ଭରିରହିଛି l ଯାଜପୁର ଜିଲ୍ଲାରେ ତ ସେ ନେତା ନୁହେଁ ବରଂ ପରିବାରର ସଦସ୍ୟ l ଭାଇ ପରି ଭାଇ ଟିଏ ସେ ସାଧାରଣ ଲୋକଙ୍କର l ସୁଖ ଓ ଦୁଃଖରେ କାନ୍ଧରେ କାନ୍ଧ ମିଶାଇଚଳନ୍ତି l ଜାତି, ଧର୍ମ କି ଧନୀ ଗରିବର ଭେଦଭାବ ନଥାଏ ବବିଙ୍କ ଭଲ ପାଇବାରେ l ସେଥିପାଇଁ କେବଳ ପଦବୀ ଦ୍ୱାରା ଜନମାନସରେ ଏକ ବିଶ୍ୱସ୍ତ ନେତା ନୁହେଁ, ବରଂ ଲୋକମାନଙ୍କ ହୃଦୟରେ ସ୍ଥାନ କରି ନିଜ ପରିଚୟ ଗଢିଛନ୍ତି ସେ l 2024 ନିର୍ବାଚନ ରେ ଦଳର ନିର୍ଦେଶକୁ ମାନି ବବି ସମ୍ବଲପୁର ସାଂସଦ ପ୍ରାର୍ଥୀ ଭାବେ ନିର୍ବାଚନ ଲଢ଼ି ପରାଜିତ ହୋଇଛନ୍ତି ସତ, ହେଲେ ଲୋକଙ୍କ ହୁଦୟରେ ଆଜି ବି ସେ ରାଜ କରୁଛନ୍ତି l ଶନିବାର ଓ ରବିବାର ଯାଜପୁରରେ ବବିଙ୍କ ଅଭିଯୋଗ ଶୁଣାଣିରେ ଲୋକଙ୍କ ଭଡ଼ି ଦେଖିଲେ ଜଣାପଡେ ନେତାଙ୍କ ପ୍ରତି ଜନତାଙ୍କ କେତେ ବିଶ୍ୱାସ, ଭଲ ପାଇବା l କାରଣ ସେ ସଭିଙ୍କ ଆସ୍ଥା ଓ ଭରଷା ର ପ୍ରତୀକ l ସବୁବେଳେ ଲୋକମାନଙ୍କ ଦୁଃଖ–ସୁଖକୁ ନିକଟରୁ ଦେଖିଛନ୍ତି ସେ। ଜଣେ ବିଧାୟକ ଓ ଜନମାନସର ନେତାର କର୍ତ୍ତବ୍ୟ କଣ ତାହା ଯାଜପୁର ଜିଲ୍ଲାରେ ବିକାଶର ନୂଆ ଅଧ୍ୟାୟ ଆରମ୍ଭ କରି ପୁରା ଓଡ଼ିଶାରେ ନବୀନ ପଟନାୟକ ବିକାଶ ଛାପ ସେ ନିଜ ଜିଲ୍ଲାରେ ଦେଖାଇଛନ୍ତି l ଓଡ଼ିଶାର ବିକାଶ ରାଜନୀତିକୁ ଆଗକୁ ନେବାରେ ଭୂମିକାରେ ସେ ଥିଲେ ନବୀନ ସାରଥୀ । ବିଧାୟକ ଭାବେ ତାଙ୍କର କାର୍ଯ୍ୟକାଳରେ ରାସ୍ତା, ପାନୀୟଜଳ, ସ୍ୱାସ୍ଥ୍ୟ ଓ ଶିକ୍ଷା ଭଳି ମୌଳିକ ସମସ୍ୟା ଉପରେ ସେ ବିଶେଷ ଗୁରୁତ୍ୱ ଦେଇଥିଲେ। ଲୋକମାନଙ୍କ ସହିତ ସିଧାସଳଖ ସମ୍ପର୍କ, ଗାଁ ଗାଁକୁ ଯାଇ ସମସ୍ୟା ଶୁଣିବା—ଏହା ତାଙ୍କର ରାଜନୀତିର ମୂଳମନ୍ତ୍ର ଥିଲା। ସଫଳତା ସହିତ ବିବାଦ ଓ ସମାଲୋଚନାକୁ ମଧ୍ୟ ବବି ଦାସ ସାମ୍ନା କରିଛନ୍ତି। କିନ୍ତୁ ଏସବୁ ମଧ୍ୟରେ ସେ ନିଜକୁ ଏକ ଲଢ଼ୁଆ ନେତା ଭାବେ ପ୍ରତିଷ୍ଠିତ କରିଛନ୍ତି ଓଡିଶା ରାଜନୀତିରେ l

ଓଡ଼ିଶାର 4ଟି ରାଜ୍ୟସଭା ଆସନ ଖାଲି ପଡୁଛି l ଏପ୍ରିଲ 2ତାରିଖ ପୂର୍ବର  ପଡିଥିବା ଆସନ ପାଇଁ ନିର୍ବାଚନ ହେବ l ଓଡିଶାର 4ଜଣ ସାଂସଦ ହେଲେ ମମତା ମହନ୍ତ, ନିରଞ୍ଜନ ବିଶି, ସୁଜିତ କୁମାର ଓ ମୁନା ଖାଁ ଙ୍କ କାର୍ଯ୍ୟକାଳ ଶେଷ ହେଉଛି l ଏହି ଆସନରେ ହେବାକୁ ଥିବା ନିର୍ବାଚନରେ ସଂଖ୍ୟା ଦୃଷ୍ଟିରୁ 2ଟି ବିଜେପି ଯିବା ନିଶ୍ଚିତ ଥିବା ବେଳେ ଗୋଟିଏ ବିଜେଡିର l 4ର୍ଥ ଆସନ ପାଇଁ 3ପ୍ରମୁଖ ଦଳ ପାଖରେ ସଂଖ୍ୟା ନାହିଁ l ବିଜେଡିର ନିଶ୍ଚିତ ଗୋଟିଏ ଆସନରୁ କିଏ ଯିବ? ତାହା ଏବେ ସବୁଠୁ ଅଧିକ ଚର୍ଚ୍ଚା l ଦଳର ପାୱାର ଫୁଲ ନେତା ପ୍ରଣବ ପ୍ରକାଶ ଦାସ ଓ ଦେବୀ ମିଶ୍ରଙ୍କ ନାଁ ଚର୍ଚ୍ଚାରେ ଆଗରେ ଅଛି l ଦୁଇ ନେତାଙ୍କ ମଧ୍ୟରୁ କାହାର ଦଳ ପ୍ରତି ଆନୁଗତ୍ୟ ଅଛି ତାହାକୁ ନେଇ ନବୀନ ନିବାସରେ ଆରମ୍ଭ ହୋଇଛି ଅଙ୍କ କଷା l

ବିଜେଡିର ପୂର୍ବତନ ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି ) ନବୀନଙ୍କ ଅତି ଘନିଷ୍ଠ l 2024 ନିର୍ବାଚନରେ ନବୀନଙ୍କ ନିର୍ଦେଶରେ ନିଜ ନିର୍ବାଚନ ମଣ୍ଡଳୀ ଛାଡି ସମ୍ବଲପୁର ସାଂସଦ ଭାବେ ନିର୍ବାଚନ ଲଢ଼ି ପରାଜିତ ହୋଇଛନ୍ତି l ଏହା ସହ ଯାଜପୁରରେ ବିଧାନସଭା ଆସନରେ ଜଣେ ମିଶନ ଶକ୍ତି ମହିଳାଙ୍କୁ ପ୍ରାର୍ଥୀ କରି ବିଧାନସଭାକୁ ପଠାଇବାରେ ବବି ଅବଦାନ କାହା ଅଛପା ନାହିଁ l ଦଳର ସଙ୍କଟ ସମୟରେ ପ୍ରଣବ ସଂକଟମୋଚନ ସାଜି ଦଳକୁ ସବୁ ମ୍ୟାନେଜ କରିଦିଅନ୍ତି l ଜଣେ ଯୁବ ନେତା ଭାବେ ପ୍ରଣବ ନବୀନ ପୁଣି କେମିତି କ୍ଷମତାକୁ ଫେରିବେ ସେଥିପାଇଁ ଦିନରାତି ଏକ କରି କାମ କରୁଛନ୍ତି l ଦିଲ୍ଲୀ ପ୍ରଣବ ଗଲେ ଜାତୀୟ ସ୍ତରର ନେତାଙ୍କ ସହ ସୁସମ୍ପର୍କ ରଖିବା ସହ ଦଳକୁ ପୁଣି କ୍ଷମତାକୁ ଫେରାଇ ଆଣିବାରେ ତାଙ୍କର ରାଜନୈତିକ ଗୋଟି ଚାଳନ ଦଳକୁ ସଫଳତା ଦେବ ଅନେକ ନେତା ଯୁକ୍ତି ବାଢୁଛନ୍ତି l

ଅନ୍ୟପଟେ 2024 ନିର୍ବାଚନ ପରାଜୟ ପରେ ଦଳ ପ୍ରତି ଅଧିକ ଆନୁଗତ୍ୟ ଦେଖାଇ ଦଳର ବରିଷ୍ଠ ନେତା ଦେବୀ ମିଶ୍ର ମଧ୍ୟ ରାଜ୍ୟସଭା ଯିବାକୁ ମନ ବଳାଇଛନ୍ତି l ନବୀନ ନିବାସର ଆଜ୍ଞାଧିନ ନେତା ଭାବେ ଶଙ୍ଖ ଭବନରେ ଦେବୀ ବାବୁ ବର୍ତମାନ ଦଳୀୟ କାମରେ ଲାଗିଛନ୍ତି l ତେଣୁ ସେ ଆଶା ବାନ୍ଧିଛନ୍ତି ଏଥିପାଇଁ ପୁରସ୍କାର ଦେବେ ରାଜ୍ୟସଭା l

ବବି ଓ ଦେବୀ ନାଁ ଚର୍ଚ୍ଚା ଭିତରେ ବିଜେଡି ସଭାପତି ନବୀନ ପଟନାୟକ ନାଁ ମଧ୍ୟ ଏବେ ରାଜ୍ୟସଭା ଯିବା ତାଲିକାରେ ଯୋଡି ହୋଇଯାଇଛି l ବିଜେଡିର ଭବିଷ୍ୟତ ଓ ବଡ ରାଜନୈତିକ ଗୋଟି ଚାଳନ କରି ନବୀନ ନିଜେ ରାଜ୍ୟସଭା ଯିବେ ବୋଲି ବିଜେଡି ରାଜନୀତିରେ ବେଶ ଚର୍ଚ୍ଚା ହେଉଛି l

ଶେଷରେ ଏତିକି କୁହାଯାଇ ପାରେ ନବୀନଙ୍କ ନିଷ୍ପତି ସବୁବେଳେ କାହାକୁ ଜଣା ନଥାଏ, କେବେ ନବୀନ ଘୋଷଣା କଲେ ଜଣା ପଡିବ ନବୀନ କାହାକୁ ରାଜ୍ୟସଭା ପଠାଉଛନ୍ତି l ଏବେ କେବଳ ଚର୍ଚ୍ଚା ଓ ଆଲୋଚନା ଭିତରେ ରାଜ୍ୟସଭା ଓ ବିଜେଡି ନେତାଙ୍କ ନାଁ ଯୋଡି ହୋଇଚାଲିଛି l