() ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ନିର୍ଦ୍ଦେଶକ୍ରମେ ପ୍ରବଳ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ରାଜ୍ୟର ସମସ୍ତ ଅଙ୍ଗନବାଡି କେନ୍ଦ୍ର ଗୁଡ଼ିକୁ ସକାଳ ୭ ଟା ରୁ ୯ ଟା ଯାଏଁ କରିବା ପାଇଁ ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ରାଜ୍ୟର ସମସ୍ତ ଜିଲ୍ଲାପାଳ ମାନଙ୍କୁ ଚିଠି କରାଯାଇଛି । ଆବଶ୍ୟକସ୍ଥଳେ ଅତ୍ୟଧିକ ଗ୍ରୀଷ୍ମ ପ୍ରବାହ ଯୋଗୁଁ ନିଜ ଜିଲ୍ଲାର ଅଙ୍ଗନବାଡି କେନ୍ଦ୍ର ଗୁଡିକୁ ଛୁଟି କରିବା ନିମନ୍ତେ ଜିଲ୍ଲାପାଳମାନଙ୍କୁ ପରାମର୍ଶ ଦିଆଯାଇଛି ।

()ଏପ୍ରିଲ 2 ରୁ ସକାଳୁଆ ସ୍କୁଲ। ସକାଳ 7 ରୁ 9 ଚାଲିବ ଅଙ୍ଗନବାଡି କେନ୍ଦ୍ର। ତାତି ବଢିଲେ ଅଙ୍ଗନବାଡି କେନ୍ଦ୍ର ଛୁଟି ସହିତ ଛୁଆ ଙ୍କ ପାଇଁ ହୋମ୍ ଡେଲିଭର କରାଯିବ ଖାଦ୍ୟ। ଦିନ 11 ରୁ 3 ଯାଏ ଶ୍ରମିକ ମାନଙ୍କ କାମ ବନ୍ଦ। ଖିଲାପ କଲେ ମାଲିକ ଙ୍କ ବିରୋଧରେ କାର୍ଯ୍ୟାନୁଷ୍ଠାନ। ବନ୍ୟା ବାତ୍ୟା ଭଳି ଗ୍ରୀଷ୍ମ ପ୍ରବାହ ରେ ବି ଜିରୋ ଆକସ୍ମିକ ଲକ୍ଷ୍ୟ। ରାସ୍ତା ରେ ବିଭିନ୍ନ ସ୍ଥାନରେ ଛାମୁଡ଼ିଆ ଲାଗିବ ଛାଇ ପାଇଁ। ଜଳ ଛତ୍ର ଖୋଲାଯିବ। 300 କୋଟି ଦିଆଯାଇଛି ନଳକୂପ ଖନନ ପାଇଁ ଜିଲା ଗୁଡି କୁ ଦିଆଯାଇଛି। ଅଘୋଷିତ ବିଜୁଳି କାଟ୍ ହେବନି। ଦିନ 11 ରୁ 3 ଓ ରାତିରେ ବିଦ୍ୟୁତ୍ କାଟ ହେବନି। କିନ୍ତୁ ଘୋଷିତ ବିଦ୍ୟୁତ୍ କାଟ ହେବ।ଗ୍ରୀଷ୍ମ ରୁତୁ ଗୋଟିଏ ମାସ ଆଗରୁ ଆବିର୍ଭାବ ହୋଇଛି। ଦୁଇ ଦିନ ତଳେ ବୌଦ୍ଧ ହେଉଛି ଭାରତର ସବୁଠୁ ଉତ୍ତପ୍ତ ଜିଲ୍ଲା। ସମ୍ବଲପୁର ସୁନ୍ଦରଗଡ଼, ଝାରସୁଗୁଡ଼ା, ବଲାଙ୍ଗିର ରେ ମଧ୍ୟ ଅସହ୍ଯ ଗରମ ଅନୁଭୂତ ହେଲାଣି। ଉପକୁଳରେ ବି ତାପମାତ୍ରା ବଢ଼ିଲାଣି। ଆର୍ଦ୍ରତା ବଢୁଛି। ଆଗୁଆ ପଦକ୍ଷେପ ସ୍ଵରୂପ ନିର୍ଦ୍ଦେଶାବଳୀ ଜିଲ୍ଲା ଗୁଡି କୁ ଦିଆଯାଇଛି। ମୁଖ୍ୟମନ୍ତ୍ରୀ ଙ୍କ ସଭାପତିତ୍ବରେ ଗତକାଲି ବୈଠକ ବସିଥିଲା। ଗଣଶିକ୍ଷା, ଉଚ୍ଚଶିକ୍ଷା, ପଞ୍ଚାୟତିରାଜ, ଜଳସମ୍ପଦ, ମହିଳା ଓ ଶିଶୁ ବିକାଶ, ନଗର ଉନ୍ନୟନ ବିଭାଗ ର ଅଧିକାରୀ ମାନେ ଉପସ୍ଥିତ ଥିଲେ। ରାଜସ୍ଵ ବିଭାଗ ନିର୍ଦ୍ଦେଶାବଳୀ ପାଳନ ପାଇଁ କୁହାଯାଇଛି। ଯେଉଁ ଜିଲ୍ଲାରେ ଅଧିକ ତାପମାତ୍ରା ବଢିଲେ ଜିଲ୍ଲାପାଳ ମାନେ ଆବଶ୍ୟକ ମୁତାବକ ପଦକ୍ଷେପମାନ ନେବେ ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି ।

( ) ଆଜି ପ୍ରଦେଶ ଛାତ୍ର କଂଗ୍ରେସ ପକ୍ଷରୁ ଡ୍ରାଫ୍‌ଟ୍ ୟୁଜିସି ରେଗୁଲେସନ ୨୦୨୫ ପ୍ରତିବାଦରେ ଏବଂ ବିଶେଷ କରି ଛାତ୍ରମାନଙ୍କର ସମସ୍ୟା ପ୍ରସଙ୍ଗରେ ପ୍ରଦେଶ ଛାତ୍ର କଂଗ୍ରେସ ସଭାପତି ଉଦିତ୍ ପ୍ରଧାନଙ୍କ ନେତୃତ୍ବରେ ବିଧାନସଭା ଘେରାଉ କରିଥିଲେ। ପ୍ରଦେଶ କଂଗ୍ରେସ କାର୍ଯ୍ୟାଳୟରୁ ଛାତ୍ର କଂଗ୍ରେସ ବାହାରି ବିଧାନ ସଭା ଅଭିମୁଖେ ଅଗ୍ରସର ହେଉଥିବାବେଳେ ଲୋୟର ପିଏମ୍‌ଜି ଠାରେ ପୁଲିସ୍ ସହିତ ଧସ୍ତାଧସ୍ତି ହୋଇଥିଲା । ଛାତ୍ର କଂଗ୍ରେସ କର୍ମୀମାନେ ପୁଲିସ୍ ବାରିକେଟ ଭାଙ୍ଗି ବିଧାନସଭାରୁ ଅଗ୍ରସର ହେଉଥିଲା ସମୟରେ ପୁଲିସ୍ ଛାତ୍ରକଂଗ୍ରେସ କର୍ମକର୍ତା ଏବଂ ନେତୃମଣ୍ଡଳିକୁ ଭ୍ୟାନ ଯୋଗେ ଉଠାଇନେଇଥିଲେ। ଏହି କାର୍ଯ୍ୟକ୍ରମରେ ଯୋଗ ଦେଇ ପିସିସି ସଭାପତି ଶ୍ରୀ ଭକ୍ତଚରଣ ଦାସ କହିଥିଲେ ଯେ ୨୦୧୪ ମସିହା ଠାରୁ କ୍ରମାଗତ ଭାବରେ ଶିକ୍ଷା ଏବଂ ଶିକ୍ଷାନୁଷ୍ଠାନ ଉପରେ ମୋଦୀ ସରକାରଙ୍କ ଆକ୍ରମଣ ହେଉଛି । ଜାତୀୟ ଶିକ୍ଷା ନୀତି ୨୦୨୦ ଯାହାକି ମୋଦୀ ସରକାରଙ୍କ ଦ୍ୱାରା ପ୍ରଣୟନ କରାଯାଇଛି ତାହା କେବଳ ଶିକ୍ଷାର ଘରୋଇକରଣ ଏବଂ କେନ୍ଦ୍ରୀକରଣକୁ ପ୍ରୋତ୍ସାହିତ କରିବା ପାଇଁ ଉଦ୍ଦିଷ୍ଟ । ଏହି ନୀତି କାର୍ଯ୍ୟକାରୀ ହେବା ପରେ ସ୍କୁଲ ଫି ବୃଦ୍ଧି, ବଳେଟରେ ଉଚ୍ଚଶିକ୍ଷାର ଅନୁଦାନ କାଷ୍ଟ, ସଂରକ୍ଷଣରେ ଉଦାସିନତା, ଯଥାର୍ଥ ଓ ଶାନ୍ତିପୂର୍ଣ୍ଣ ପ୍ରତିବାଦକୁ ଦମନ ଏବଂ ଶିକ୍ଷାନୁଷ୍ଠାନରେ ଆରଏସ୍ଏସ୍ ନୀତିର ପ୍ରଭାବ ବୃଦ୍ଧି ପାଉଥିବାର ପରିଲେକ୍ଷିତ ହେଉଛି। ଯାହାଫଳରେ ଗରୀବ ଏବଂ ଅସହାୟ ଛାତ୍ରମାନଙ୍କ ପାଇଁ ଶିକ୍ଷାନୁଷ୍ଠାନମାନଙ୍କର ବନ୍ଦ ହୋଇଯାଉଛି।

ଏହି ସରକାରର ନୀତି ଏବଂ ଉଦ୍ଦେଶ୍ୟ ବିଷୟରେ ଆମେ ସମସ୍ତେ ଅବଗତ । ସରକାରୀ ଉଦ୍ୟୋଗ, ରେଳବାଈ, ବିମାନବନ୍ଦର, ବନ୍ଦର, ଜଙ୍ଗଲ, ପାହାଡ଼ ଏବଂ ଖଣିକୁ ଆଦାନୀ ଓ ଅମାନୀ ହାତରେ ଶାଗମାଛ ଦରରେ ଟେକିଦିଆଯାଉଛି। ସେହିଭଳି ସରକାରୀ ଚାକିରୀରେ ବିକ୍ରୟ ମଧ୍ଯ ହେଉଛି। ପରୀକ୍ଷା ପ୍ରଶ୍ନପତ୍ର ପ୍ରଘଟ ସୀମା ଟପିଛି। ଏହିଭଳି ନୀତିର ପରିଣାମରେ ବେକାରୀ ବୃଦ୍ଧି ହେଉଛି, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ଗୁଡ଼ିକ ବନ୍ଦ ହୋଇଯାଉଛି ଏବଂ ଆତ୍ମହତ୍ୟା ବଢ଼ିଚାଲିଛି। ପ୍ରଦେଶ ଛାତ୍ର କଂଗ୍ରେସ ସଭାପତି ଉଦିତ ପ୍ରଧାନ କହିଲେ ଯେ ଆରସ୍ଏସ୍ ଏବଂ ବଡ଼ବଡ଼ ଉଦ୍ୟୋଗ ପତି ହାତରେ ଆମର ବିଶ୍ଵବିଦ୍ୟାଳୟଗୁଡ଼ିକୁ ଟେକି ଦେବା ପାଇଁ ସରକାର ଷଡ଼ଯନ୍ତ୍ର କରୁଛନ୍ତି । ସେଥୁନିମନ୍ତେ ଡ୍ରାଫ୍‌ଟ ୟୁଜିସି ରେଗୁଲେସନ-୨୦୨୫ ପ୍ରସ୍ତୁତ ହୋଇଛି। ଯାହାର ଉଦ୍ଦେଶ୍ୟ ହେଉଛି ବିଶ୍ଵବିଦ୍ୟାଳୟଗୁଡ଼ିକ ଉପରେ କିପରି ଆରଏସ୍ଏସ୍ ଏବଂ ଉଦ୍ୟୋଗ ପତିମାନଙ୍କର ପ୍ରଭୂତ୍ଵ ଜାହିର ହେବ । ଏହା ପ୍ରଣୟନ ହେଲେ ବହୁତ ପରିବର୍ତନ ହୋଇଯିବ।

ନୂଆ ୟୁଜିସି ଡ୍ରାଫ୍‌ଟ ଅନୁଯାୟୀ ଆବଶ୍ୟକୀୟ ଶିକ୍ଷା ଯୋଗ୍ୟତା ନ ଥାଇ ଜଣେ କଲେଜ କିମ୍ବା ବିଶ୍ଵବିଦ୍ୟାଳୟରେ ଅଧ୍ୟାପକ ଭାବେ ନିଯୁକ୍ତି ପାଇପାରିବ। ଏହାର ଅର୍ଥ ଜଣେ ପିଏଚଡ଼ି କିମ୍ବା ରିସର୍ଚ୍ଚ ଅଭିଜ୍ଞତା ବିନା ଚୟନ ହୋଇ ପ୍ରାଧ୍ୟାପକ ଭାବେ କାର୍ଯ୍ୟ କରିବ । କଠିନ ପରିଶ୍ରମ ସତ୍ତ୍ୱେ ଅବହେଳିତ ବର୍ଗର ଛାତ୍ରଛାତୀମାନେ ସେମାନଙ୍କର ନ୍ୟାର୍ଯ୍ୟ ଅଧୁକାର ସିଟ୍ ପାଇବାରୁ ବଂଚିତ ହେବେ। ଆର୍ଏସ୍ଏସ୍‌ର କର୍ମକର୍ତା ଓ କର୍ପୋରେଟ୍ ଚାକିରୀରେ ଲାଭବାନ ହେବେ। ଏହି ଡ୍ରାଫ୍‌ଟରେ ସ୍ଥାନ ସଂରକ୍ଷଣ ସଂପର୍କରେ ସୂଚନା ନାହିଁ ଏବଂ ଅମେ ସମସ୍ତେ ଜାଣୁଯେ ଆଦିବାସୀ, ଦଳୀତ ଓ ପଛୁଆବର୍ଗର ପ୍ରତିନିଧିତ୍ କର୍ପୋରେଟ ଜଗତରେ ଆଦୌନାହିଁ । ଏଥିସହ ଏହି ନିୟମ ଦୃଷ୍ଟାନ୍ତମୂଳକ ଭାବେ ଶିକ୍ଷାର ମାନଙ୍କୁ କ୍ଷୁର୍ଣ୍ଣ କରିବ ।

ପୂର୍ବରୁ ଭାଇସ୍‌ଚାନସେଲର ନିଯୁକ୍ତିରେ ପ୍ରମୁଖ ଭାବେ ଶିକ୍ଷା ଅଭିଜ୍ଞତା ଗୁରୁତ୍ୱ ଯାଉଥିବାବେଳେ ଏହି ଚାଫ୍‌ଟ୍ ସେହି ପ୍ରକ୍ରିୟାକୁ ଉଚ୍ଛେଦ କରୁଛି। ଏବେ ଯେ କୌଣସି କର୍ପୋରେଟ୍‌ରର ନାମୀ ବ୍ୟକ୍ତି ଭାଇସ୍‌ଚାନ୍‌ସେଲର ଭାବେ ନିଯୁକ୍ତି ରହିପାରିବେ । ଏବଂ ସେମାନଙ୍କ ହାତରେ ବିଶ୍ଵବିଦ୍ୟାଳୟ ଗୁଡ଼ିକର ସମସ୍ତ ଦାୟିତ୍ଵ ଦିଆଯିବ। ଏପରିକି ବିଭିନ୍ନ ରାଜ୍ୟସରକାର ନିଜ ବିଶ୍ଵବିଦ୍ୟାଳୟମାନଙ୍କରେ ଭାଇଚାନସେଲର ନିଯୁକ୍ତି ଦେଇପାରିବେ ନାହିଁ । ସବୁ କିଛି ରାଜ୍ୟପାଳଙ୍କ ହାତରେ ରହିବ। ଉଚ୍ଚ ପ୍ରଶାସନିକ ପଦବୀରେ ବିଭିନ୍ନ କର୍ପୋରେଟର କାର୍ଯ୍ୟନିର୍ବାହୀମାନେ ସିଧାସଳଖ ନିଯୁକ୍ତି ପାଇବାର ନିୟମ ପ୍ରଣୟନ ହୋଇସାରିଛି। ଏପରିକି ଚାରୋଟି ବଡ଼ କର୍ପୋରେସନ ଗୁଡ଼ିକ ଆମର ମନ୍ତ୍ରଣାଳୟଗୁଡ଼ିକୁ ପରିଚାଳନା କରୁଥିବାର ଉଦାହରଣ ରହିଛି। ଯେତେବେଳେ ସରକାରୀ ନୀତି ଘରୋଇ କମ୍ପାନୀ ଦ୍ୱାରା ପ୍ରସ୍ତୁତ ହେବ, ସେଥ‌ିରେ କାହାର ସ୍ୱାର୍ଥ ପ୍ରାଧାନ୍ୟ ପାଇବ, ତାହା ଜଳଜଳ ହୋଇ ଦିଶୁଛି। ୟୁଜିସି ଏହା ତାଲିକାର ଉଚ୍ଛେଦ କରାଯାଇଛି। ଯାହାକି ଭାରତୀୟ ଶିକ୍ଷାନୁଷ୍ଠାନଗୁଡ଼ିକରେ ଗୁଣାତ୍ମକ ଗବେଷଣାମୂଳକ ପତ୍ରିକାର ଏକ ଚିଠା କରାଯାଇଥିଲା। ଯାହାଫଳରେ ଗୁଣାତ୍ମକ ଗବେଷଣାମୂଳକ ପତ୍ରିକାକୁ ଚାପି ଦିଆଯାଇ ଅର୍ଥବିନିମୟରେ ନକଲି ପତ୍ରିକା ସବୁ ବାହାର କରାଯାଉଛି। ଏହାର ଦେଶର ଗବେଷଣା ବ୍ୟବସ୍ଥାକୁ ସଂପୂର୍ଣ ଭାବରେ କ୍ଷତି ପହଂଚାଇବ।

ପରୀକ୍ଷା ପ୍ରଶ୍ନପତ୍ର ପ୍ରଘଟ ଓ ନିଯୁକ୍ତି ଦୁର୍ନୀତିରେ ଏଭଳି ବ୍ୟାପକ ହୋଇଛି ଯେ ତାହା ଭାରତର ଅଗଣିତ ଛାତ୍ରମାନଙ୍କର ଭବିଷ୍ୟତକୁ ଅନ୍ଧକାରକୁ ଠେଲି ଦେଇଛି। ପରିଶ୍ରମ ଛାତ୍ରଛାତ୍ରୀମାନଙ୍କର ସ୍ୱପ୍ନ ଏ ସରକାର ଧୂଳିସାତ କରିଦେଉଛି । ପରୀକ୍ଷା ପୂର୍ବରୁ ସରକାରୀ ଚାକିରୀ ବିକ୍ରି କରିଦେଉଛି । ଜାତୀୟ ଶିକ୍ଷାନିତି ୨୦୨୦ ଏବଂ ୟୁଜିସି ଡ୍ରାଫ୍‌ଟ୍ ରେଗୁଲେସନ ୨୦୨୫ କେବଳ ଛାତ୍ରଛାତ୍ରୀମାନଙ୍କ ଠାରୁ ବିଶ୍ଵବିଦ୍ୟାଳୟକୁ ଦୂରେଇ ଦେବ ନାହିଁ। ଏହା ସାମ୍ବିଧାନିକ ମୂଲ୍ୟବୋଧ ନୀତିକୁ ମଧ୍ୟ ଆଘାତ କରିବ। ଛାତ୍ର କଂଗ୍ରେସର ଆହ୍ୱାନ ଓ ବାର୍ତାକୁ ଓଡ଼ିଶାର ଛାତ୍ରଛାତ୍ରୀମାନେ ବୁଝନ୍ତୁ ଏବଂ ପ୍ରତିକ୍ରିୟା ଦିଅନ୍ତୁ । ଏହି ସବୁ ବିଶ୍ଵବିଦ୍ୟାଳୟ ଆମର ଏହାକୁ ସୁରକ୍ଷା କରିବା ମଧ୍ୟ ଆମର ଦାୟିତ୍ଵ । ଛାତ୍ର କଂଗ୍ରେସ ‘ଆମେ ବଦେଳିବା’ ନାମରେ ଏକ ଅଭିଯାନ ଆରମ୍ଭ ହୋଇଛି। ଯେଉଁ ଅଭିଯାନର ଛାତ୍ର କଂଗ୍ରେସ କ୍ୟାମ୍ପସ ଆମ୍ବାସେତର ଭାବେ ଛାତ୍ରଛାତ୍ରୀମାନେ କାର୍ଯ୍ୟକରିବେ । ସେମାନଙ୍କର ସ୍ୱରକୁ ନିଜର ଶିକ୍ଷାନୁଷ୍ଠାନର ବ୍ୟକ୍ତ କରିପାରିବେ। ଛାତ୍ରଛାତ୍ରୀମାନେ ଏହି ଆନ୍ଦୋଳନର ଅଂଶିଦାର ହୋଇ humbadlenge.in ନିଜର ନାମକରଣ ପଞ୍ଜିକରଣ କରିପାରିବେ । ରାଷ୍ଟ୍ରୀୟ ଛାତ୍ର କଂଗ୍ରେସ ପକ୍ଷରୁ ଆମର ଶିକ୍ଷା, ବିଶ୍ଵବିଦ୍ୟାଳୟ ଏବଂ ସାମ୍ବିଧାନିକ ଅଧିକାର ପାଇଁ ଲଢ଼େଇ କରିବାକୁ ଆହ୍ୱାନ ଦିଆଯାଇଛି ।

ଏହି କାର୍ଯ୍ୟକ୍ରମରେ ମାନସ ଚୌଧୁରୀ, ୟାସିର ନୱାଜ, ରଞ୍ଜିତ ପାତ୍ର, ନିହାର ବେହେରା, ସାହାରୁଖ୍ ଖାନ୍, ସୁନିଲ କୁମାର ଗାନ୍ଧୀ, ସନ୍ଦିପ ରାଉତରାୟ, ସିଦ୍ଧାନ୍ତ ଓମ୍‌ପ୍ରକାଶ, ଆଦିତ୍ୟ ଅଂଶୁମାନପାତ୍ର, ପ୍ରତିକ ଦାସ, ଜଗଦିଶ ରାଉତ, ସାହିଲ ମହାନ୍ତି, ହେମନ୍ତ ପ୍ରଧାନ, ଶିବରଞ୍ଜନ ସାହୁ, ଓମ୍‌ ପ୍ରକାଶ ପ୍ରଧାନ, ଚଣ୍ଡିପ୍ରସାଦ ମହାପାତ୍ର, ବିଶ୍ଵସି ରାଜପୁତ, ରୁଦ୍ରପ୍ରସାଦ ଖଟୁଆ, ବିଜୟ ବିଶ୍ଵାଳ, ସାର୍ଥକ ସୌରଭ ପରିଡ଼ା, ଅନନ୍ତ କୁମାର ଜେନା, ଅଙ୍କିତ ହରିଚନ୍ଦନ, ଦେବାଶିଷ ଖଟୁଆ, ଓମ୍ ପ୍ରକାଶ ସାହୁ, ଚନ୍ଦନ ସାହୁ, ଓମ୍ ପ୍ରକାଶ ପରିଡ଼ା, ଆଦର୍ଶ ଗାନ୍ଧୀ, ତାପସ ଦେ, ଅଭିଶେକ୍ ଠୁଙ୍ଗ, କୃଷ୍ଣଚନ୍ଦ୍ର ପ୍ରଧାନ ପ୍ରମୁଖ ବହୁ ଛାତ୍ର ନେତା ଯୋଗ ଦେଇ ଆନ୍ଦୋଳନକୁ ସଫଳ କରିଥିଲେ ।

() ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ସେଂଟର ଫର ପ୍ରିଜରଭେସନ୍‌, ପ୍ରୋପାଗେସନ୍ ଆଣ୍ଡ ରେଷ୍ଟୋରେସନ୍ ଅଫ୍ ଆନ୍‌ସିଏଂଟ କଲ୍‌ଚର ଆଣ୍ଡ ହେରିଟେଜ ଅଫ୍ ଇଣ୍ଡିଆ (ପ୍ରାଚୀନ) ଓ କଟକସ୍ଥିତ ଓଡିଆ ଗବେଷଣା ପରିଷଦର ମିଳିତ ଆନୁକୂଲ୍ୟରେ ମଙ୍ଗଳବାର ଦିନ ବିଶ୍ୱବିଦ୍ୟାଳୟ ପରିସରରେ ଜଗନ୍ନାଥ ଦାସଙ୍କ ମହାଭାରତ ଶୀର୍ଷକର ପ୍ରଥମ ‘ପ୍ରାଚୀନ’ ସମ୍ପାନ ଅନୁଷ୍ଠିତ ହୋଇଯାଇଛି ।ଏହି ସମ୍ପାନର ମୁଖ୍ୟ ଆଲୋଚକ ଭାବେ ବିଶିଷ୍ଟ ଭାଷାବିଜ୍ଞାନୀ ପ୍ରଫେସର ବିବୁଧେନ୍ଦ୍ର ନାରାୟଣ ପଟ୍ଟନାୟକ ଯୋଗଦେଇ ଜଗନ୍ନାଥ ଦାସଙ୍କ ମହାଭାରତର ସ୍ୱତନ୍ତ୍ରତା ସମ୍ପର୍କରେ ଆଲୋକପାତ କରିଥିଲେ ।

ଜଗନ୍ନାଥ ଦାସଙ୍କ ‘ମହାଭାରତ’ ଏକ ଗୁରୁତ୍ୱପୂର୍ଣ୍ଣ ପାଠ । ଜଗନ୍ନାଥ ଦାସ ଓଡ଼ିଆ ନବାକ୍ଷରୀ ଭାଗବତ ରଚନା କରିବା ପୂର୍ବରୁ ରାମାୟଣ ଓ ମହାଭାରତ ରଚନା କରିଥିଲେ ବୋଲି ଦିବାକର ଦାସ ତାଙ୍କ ‘ଜଗନ୍ନାଥ ଚରିତାମୃତ’ରେ ଲେଖିଛନ୍ତି । କିନ୍ତୁ କେତେକ ଗବେଷକ ନବାକ୍ଷରୀ ‘ମହାଭାରତ’ର ରଚନାକାର ଭାବରେ ତାହାକୁ ସ୍ୱୀକାର କରି ନାହାନ୍ତି । ତାହା ସତ୍ୱେ ତାଙ୍କ ନାମରେ ଭଣିତା ଥିବା ‘ମହାଭାରତ’ର ଗୁରୁତ୍ୱକୁ ଅସ୍ୱୀକାର କରାଯାଇପାରିବ ନାହିଁ ବୋଲି ଗବେଷକ ତଥା କାନପୁର ଆଇଆଇଟିର ପ୍ରାକ୍ତନ ଇଂରାଜୀ ପ୍ରଫେସର ଡକ୍ଟର ପଟ୍ଟନାୟକ କହିଛନ୍ତି । ଏହି ସମ୍ପାନରେ ବକ୍ତବ୍ୟ ଉପସ୍ଥାପନ କରି ପ୍ରଫେସର ପଟ୍ଟନାୟକ କହିଥିଲେ ଯେ ମହାଭାରତର ଏହି ପାଠରେ ବ୍ୟାସଦେବଙ୍କ ସଂସ୍କୃତ ମହାଭାରତ, ସାରଳା ଦାସଙ୍କ ଓଡ଼ିଆ ମହାଭାରତ ଓ ଶ୍ରୀମଦ୍‌ଭଗବତ୍ ଗୀତାର ସମନ୍ୱୟ ରହିଛି । ମହାଭାରତର ବିଷୟବସ୍ତୁକୁ ସଂକ୍ଷେପରେ ଏବଂ ଅତ୍ୟନ୍ତ ବିଚାରବନ୍ତ ଭାବରେ ଏଥିରେ ଉପସ୍ଥାପନ କରାଯାଇଛି ।

ଏହି ସମ୍ପାନରେ ଓଡିଆ ଗବେଷଣା ପରିଷଦର ଉପସଭାପତି ତଥା ବିଶିଷ୍ଟ ଗବେଷକ ଡକ୍ଟର ଅସିତ ମହାନ୍ତି ସଭାପତିତ୍ୱ କରି ଗବେଷଣା ପରିଷଦର ଆଭିମୁଖ୍ୟ ଏବଂ ସମ୍ପାନ ସଂପର୍କରେ ସୂଚନା ଦେଇ୍‌ଥିଲେ । ଏହି ସମ୍ପାନରେ ପ୍ରାଚୀନର ମୁଖ୍ୟ ପ୍ରଫେସର ପ୍ରଫେସର ଗାୟତ୍ରୀବାଳା ପଣ୍ଡା ଅତିଥିମାନଙ୍କୁ ସ୍ୱାଗତ କରିବା ସହ ପ୍ରାଚୀନ ସଂପର୍କରେ ସୂଚନା ଦେଇ କହିଥିଲେ ଯେ ସୋଆ ବିଶ୍ୱବିଦ୍ୟାଳୟର ‘ପ୍ରାଚୀନ’ ବିଭାଗ ଭାଷା, ସାହିତ୍ୟ ଓ ସଂସ୍କୃତି କ୍ଷେତ୍ରରେ ଗବେଷଣା ଓ ଅଧ୍ୟୟନର ଲକ୍ଷ୍ୟ ନେଇ ସ୍ଥାପିତ ହୋଇଛି । ପ୍ର୍ରାଚୀନ ଜରିଆରେ ବର୍ତମାନ ସାରୋଳଦାସ ମହାଭାରଥର ପାଠ ଆଧାରିତ ସଂସ୍କରଣ ପ୍ରସ୍ତୁତି, ବିରଳ ପୁସ୍ତକର ଡିଜିଟାଇଜେସନ୍‌, ନୃତତ୍ୱ ଓ ଆଦିବାସୀ ସଂସ୍କୃତି, ଯୋଗ ଓ ସଂସ୍କୃତି ଅଧ୍ୟୟନ ବିଭାଗରେ ଅଧିକ ଗବେଷଣା ଜାରି ରହିଥିବା ସେ ସୂଚନା ଦେଇଥିଲେ ।ସମ୍ପାନର ପ୍ରାରମ୍ଭରେ କବି ପଦ୍ମଭୂଷଣ ରମାକାନ୍ତ ରଥଙ୍କ ସ୍ୱର୍ଗତ ଆତ୍ମାର ସଦ୍‌ଗତି ପାଇଁ ନୀରବ ପ୍ରାର୍ଥନା କରାଯାଇଥିଲା ।

ପରିଷଦର ସମ୍ପାଦକ ଡକ୍ଟର ଗୌରାଙ୍ଗ ଚରଣ ଦାଶ, କୋଷାଧ୍ୟକ୍ଷ ଶ୍ରୀ ସୁବାଷ ପଟ୍ଟନାୟକ, ଓଡ଼ିଆ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସବିତା ପ୍ରଧାନ, ପ୍ରଫେସର ଯତୀନ୍ଦ୍ର କୁମାର ନାୟକ, ଓଡ଼ିଆ ଉତ୍କର୍ଷ କେନ୍ଦ୍ରର ନିର୍ଦ୍ଦେଶକ ପ୍ରଫେସର ବସନ୍ତ କୁମାର ପଣ୍ଡା, ପ୍ରଫେସର ସନ୍ତୋଷ କୁମାର ତ୍ରିପାଠୀ, ପ୍ରଫେସର ସନ୍ତୋଷ କୁମାର ରଥ, ପ୍ରଫେସର ମନୋରଞ୍ଜନ ପ୍ରଧାନ, କବି ଶ୍ରୀ ଶୈଳଜ ରବି, ଅନୁବାଦକ ଶ୍ରୀ ସୁଭାଷ ଶତପଥୀ, ଗାଳ୍ପିକା ଶ୍ରୀମତି ସୁନନ୍ଦା ପ୍ରଧାନ, ଗବେଷକ ଶ୍ରୀ ଫଣିନ୍ଦ୍ର ଭୂଷଣ ନନ୍ଦ ଓ ପ୍ରଫେସର ପ୍ରଦୀପ୍ତ କୁମାର ପଣ୍ଡା ପ୍ରମୁଖ ଉପସ୍ଥିତ ଥିଲେ ।

ବିଶ୍ୱବିଦ୍ୟାଳୟର ଗବେଷକ ଛାତ୍ରଛାତ୍ରୀଙ୍କ ସମେତ ଅନ୍ୟମାନେ ଆଲୋଚନାରେ ଅଂଶ ଗ୍ରହଣ କରିଥିଲେ । ପ୍ରାଚୀନ ପକ୍ଷରୁ ଆସୋସିଏଟ ପ୍ରଫେସର ଡକ୍ଟର ନିହାର ରଞ୍ଜନ ମିଶ୍ର ଧନ୍ୟବାଦ ଅର୍ପଣ କରିଥିବା ବେଳେ ଶ୍ରୀ ଜୀବନ କୁମାର ପଣ୍ଡା, ଶ୍ରୀ ସମ୍ବିତ ପଟ୍ଟନାୟକ ଓ ଶ୍ରୀ ବିଭୂତି ପ୍ରସାଦ ସାହୁ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ ।

()  ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ସେଂଟର ଫର ପ୍ରିଜରଭିସନ୍‌, ପ୍ରୋପାଗେସନ ଆଣ୍ଡ ରେଷ୍ଟୋରେସନ୍ ଅଫ୍ ଆନ୍‌ସିଏଂଟ କଲ୍‌ଚର ଆଣ୍ଡ ହେରିଟେଜ୍ ଅଫ୍ ଇଣ୍ଡିଆ (ପ୍ରାଚୀନ) ପକ୍ଷରୁ ସୋମବାର ଦିବଙ୍ଗତ କବି ପଦ୍ମଭୂଷଣ ରମାକାନ୍ତ ରଥଙ୍କ ଉଦ୍ଦେଶ୍ୟରେ ଏକ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଛି । ପ୍ରାଚୀନର ମୁଖ୍ୟ ପ୍ରଫେସର ଗାୟତ୍ରୀବାଳା ପଣ୍ଡାଙ୍କ ଅଧ୍ୟକ୍ଷତାରେ ଏହି ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଥିଲା ।

ଏହି ଅବସରରେ ବିଶିଷ୍ଟ କବି ଅପର୍ଣ୍ଣା ମହାନ୍ତି, ଆଶୁତୋଷ ପରିଡ଼ା, ଅଶ୍ୱିନୀ କୁମାର ମିଶ୍ର, ସାହିତ୍ୟିକ ଅସିତ୍ ମହାନ୍ତି, ସନ୍ତୋଷ କୁମାର ରଥ, ଗୌରାଙ୍ଗ ଚରଣ ଦାଶ, ଫଣୀନ୍ଦ୍ର ଭୂଷଣ ନନ୍ଦ, ପ୍ରଦୀପ୍ତ କୁମାର ପଣ୍ଡା, କ୍ଷୀରୋଦ ପରିଡ଼ା, ମିହିର କୁମାର ସାହୁ, ବିଶିଷ୍ଟ ପ୍ରକାଶକ ବନୋଜ ତ୍ରିପାଠୀ ପ୍ରମୁଖ ଯୋଗ ଦେଇ କବି ରମାକାନ୍ତ ରଥଙ୍କ କବିତା ଓ ବ୍ୟକ୍ତିଗତ ଜୀବନର ସ୍ମୃତିଚାରଣ କରିଥିଲେ । ଦିବଙ୍ଗତ କବି କିପରି ଯୁବ କବିମାନଙ୍କୁ ଉତ୍ସାହିତ ଓ ପ୍ରେରିତ କରୁଥିଲେ ବୋଲି ପ୍ରାଚୀନର ମୁଖ୍ୟ ପ୍ରଫେସର ପଣ୍ଡା ନିଜ ବକ୍ତବ୍ୟରେ କହିଥିଲେ ।

୨୦୨୩ ମସିହା ନଭେମ୍ବର ୨୬ ତାରିଖରେ ଦ୍ୱିତୀୟ ସୋଆ ସାହିତ୍ୟ ଉତ୍ସବରେ ରମାକାନ୍ତ ରଥଙ୍କୁ ‘ସୋଆ ସାହିତ୍ୟ ସମ୍ମାନ’ରେ ସମ୍ମାନିତ କରାଯାଇଥିଲା ।

( ) ପ୍ରତ୍ୟେକ ଦିନ, ପ୍ରତ୍ୟେକ ମୁହୂର୍ତ ଏବଂ ପ୍ରତ୍ୟେକ କ୍ଷଣରୁ ଶିକ୍ଷା ଗ୍ରହଣ କରାଯାଇପାରିବ। ଶିକ୍ଷା ଗ୍ର୍ରହଣ ପ୍ରକ୍ରିୟା ସବୁବେଳେ ଜାରି ରଖିବା ଜରୁରୀ। ଏଥି ସହିତ ଜୀବନରେ ଶୃଙ୍ଖଳା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ମତ ବ୍ୟକ୍ତ କରିଛନ୍ତି ଜାତୀୟ ମାନବାଧିକାରୀ କମିଶନର ସଦସ୍ୟ ଡକ୍ଟର ଜଷ୍ଟିସ୍ ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ। ସୋମବାର ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ସୋଆ ନ୍ୟାସ୍‌ନାଲ୍ ଇନ୍‌ଷ୍ଟିଚ୍ୟୁଟ୍ ଅଫ୍ ଲ (ଏସ୍‌ଏନ୍‌ଆଇଏଲ୍‌)ର ୯ମ ବାର୍ଷିକ ଉତ୍ସବ ‘ଜଷ୍ଟିସିଆ ୩.୦-୨୦୨୫’ର ଉଦ୍‌ଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ଡକ୍ଟର ଜଷ୍ଟିସ୍ ଷଢ଼ଙ୍ଗୀ ଆଇନ୍ ଛାତ୍ରଛାତ୍ରୀଙ୍କ ଉଦ୍ଦେଶ୍ୟରେ ଏହି ଉପଦେଶ ଦେଇଛନ୍ତି।

ଝାଡ଼ଖଣ୍ଡ ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ତଥା ଓଡ଼ିଶା ହାଇକୋର୍ଟର ପୂର୍ବତନ ବିଚାରପତି ଥିବା ଜଷ୍ଟିସ୍ ଷଡ଼ଙ୍ଗୀ ଛାତ୍ରଛାତ୍ରୀମାନଙ୍କୁ ନିଜ ଆଇନ୍ ପେସାର ଅନୁଭୂତି ବଖାଣିବା ସହ ଏହି ବୃତିରେ ଧୈର୍ଯ୍ୟର ଯଥେଷ୍ଟ ଗୁରୁତ୍ୱ ରହିଛି ବୋଲି କହିଥିଲେ। ବୃତିଗତ ଯାତ୍ରା ବେଶ ଜଟିଳ। ତେଣୁ ନିଜକୁ ବଂଚାଇ ରଖିବାର କଳା ଆହରଣ କରିବା ଉଚିତ୍ ବୋଲି ସେ ଛାତ୍ରଛାତ୍ରୀଙ୍କୁ କହିଥିଲେ।

ସୋଆକୁ ଉଚ୍ଚ ପ୍ରଶଂସା କରି ଜଷ୍ଟିସ୍ ଷଢ଼ଙ୍ଗୀ କହିଛନ୍ତି ଯେ ଛାତ୍ରଛାତ୍ରୀମାନେ ଭବିଷ୍ୟତରେ ଏହି ବିଶ୍ୱବିଦ୍ୟାଳୟରେ ଅଧ୍ୟୟନ କରିଥିବାରୁ ଗର୍ବ ଅନୁଭବ କରିବା ଉଚିତ୍‌। ସାମାନ୍ୟ ସଫଳତାରେ ଉଲ୍ଲସିତ ନ ହୋଇ ଆହୁରି ଅଧିକ ସଫଳତା ସାଉଁଟିବା ଦିଗରେ ପ୍ରଚେଷ୍ଟା ଜାରି ରଖିବା ଆବଶ୍ୟକ ବୋଲି କହି ଜଣେ ଆଇନଜୀବିର ଯାତ୍ରା କେବେ ଶେଷ ହୁଏ ନାହିଁ ବୋଲି ସେ ମନ୍ତବ୍ୟ ଦେଇଥିଲେ। ଏସ୍‌ଏନ୍‌ଆଇଏଲ୍‌ର ୫ ଜଣ ଛାତ୍ରଛାତ୍ରୀ ଓଡ଼ିଶା ନ୍ୟାୟିକ ସେବା ପରୀକ୍ଷାରେ କୃତକାର୍ଯ୍ୟ ହୋଇଥିବା ନେଇ ବିଶ୍ୱବିଦ୍ୟାଳୟକୁ ସେ ଶୁଭେଚ୍ଛା ଜଣାଇଥିଲେ। ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ କାର୍ଯ୍ୟକ୍ରମରେ ଅଧ୍ୟକ୍ଷତା କରି ନିଜ ବୃତି ପ୍ରତି ଏକାଗ୍ରତା ଓ ଭଲ ପାଇବା ରହିଲେ ଛାତ୍ରଛାତ୍ରୀମାନେ ଆଗକୁ ଯାଇପାରିବେ ବୋଲି କହିଥିଲେ। ନିଜର ବୃତିଗତ ଯାତ୍ରା ବିଶ୍ୱବିଦ୍ୟାଳୟରୁ ହିଁ ଆରମ୍ଭ ହୋଇଥାଏ ବୋଲି ପ୍ରଫେସର ନନ୍ଦ କହିଥିଲେ।

କାର୍ଯ୍ୟକ୍ରମରେ ଏସ୍‌ଏନ୍‌ଆଇଏଲ୍‌ର ଡିନ୍ ପ୍ରଫେସର ଏସ.ଏ.କେ. ଆଜାଦ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଛାତ୍ରମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ମଧ୍ୟ ବକ୍ତବ୍ୟ ରଖିଥିଲେ। ଏହି ଅବସରରେ ବିଭିନ୍ନ ପ୍ରତିଯୋଗିତାରେ କୃତକାର୍ଯ୍ୟ ହୋଇଥିବା କୃତୀ ଛାତ୍ରଛାତ୍ରୀମାନଙ୍କୁ ମୁଖ୍ୟ ଅତିଥି ପୁରସ୍କୃତ କରିଥିଲେ। ଶେଷରେ ଏସ୍‌ଏନ୍‌ଆଇଏଲ୍‌ର ଆସିଷ୍ଟାଂଟ ପ୍ରଫେସର ଶ୍ରୀ ଆକାଶ ତ୍ରୀଖା ଧନ୍ୟବାଦ ଅର୍ପଣ କରିଥିଲେ।

ଏହି କାର୍ଯ୍ୟକ୍ରମରେ ସୋଆର ଉପକୁଳପତି ତଥା ରେଜିଷ୍ଟ୍ରାର ପ୍ରଫେସର ବିଭୁତି ଭୂଷଣ ପ୍ରଧାନ, ଇନ୍‌ଷ୍ଟିଚ୍ୟୁଟ ଅଫ୍ ଏଗ୍ରିକଲ୍‌ଚରାଲ୍ ସାଇନ୍‌ସେସ୍ (ଆଇଏଏସ୍‌)ର ଡିନ୍ ପ୍ରଫେସର ସନ୍ତୋଷ କୁମାର ରାଉତ, ଇନ୍‌ଷ୍ଟିଚ୍ୟୁଟ୍ ଅଫ୍ ଭେଟେରିନାରୀ ସାଇନ୍ସ ଆଣ୍ଡ ଆନିମଲ୍ ହଜ୍‌ବ୍ୟାଣ୍ଡରୀ (ଆଇଭିଏସ୍‌ଏଏଚ୍‌)ର ଡିନ୍ ପ୍ରଫେସର ସୁଶାନ୍ତ କୁମାର ଦାସ, ସ୍କୁଲ୍ ଅଫ୍ ହୋଟେଲ୍ ମ୍ୟାନେଜମେଂଟର ଡିନ୍ ପ୍ରଫେସର ସୁଶାନ୍ତ ରଞ୍ଜନ ଚଇନି, ସୋଆର ନିର୍ଦ୍ଦେଶକ ଇନ୍‌ଟରନ୍ୟାସ୍‌ନାଲ୍ ରିଲେସନ୍ସ ଶ୍ରୀ ମହେନ୍ଦ୍ର ପ୍ରସାଦ ଓ ବିଭିନ୍ନ ବିଭାଗୀୟ ନିର୍ଦ୍ଦେଶକ, ବରିଷ୍ଠ କର୍ମକର୍ତା, ଏସ୍‌ଏନଆଇଏଲ୍‌ର ବିଭିନ୍ନ ବିଭାଗର ମୁଖ୍ୟଙ୍କ ସମେତ ସିନିୟର ପ୍ରଫେସର ଡକ୍ଟର ମଧୁସୁଦନ ଦାସ, ଫ୍ୟାକଲ୍ଟି ଓ ଛାତ୍ରଛାତ୍ରୀମାନେ ଉପସ୍ଥିତ ଥିଲେ।