()ବିରୋଧୀ ଦଳ ନେତା ଶ୍ରୀ ନବୀନ ପଟନାୟକ ଆଜି ପୂର୍ବାହ୍ନ ରେ ଶଙ୍ଖ ଭବନ କୁ ଯାଇ ଦଳ ର ବରିଷ୍ଠ ନେତା ମାନଙ୍କ ଉପସ୍ଥିତିରେ ବିଜୁ ଜନତା ଦଳ ସଭାପତି ପଦ ପାଇଁ ପ୍ରାର୍ଥୀ ପତ୍ର ଦାଖଲ କରିଛନ୍ତି..ସୂଚନା ଯୋଗ୍ୟ ଯେ ବିଜୁ ଜନତା ଦଳ ର ସାଂଗଠନିକ ନିର୍ବାଚନ ଏଵେ ଚୂଡାନ୍ତ ପର୍ଯ୍ୟାୟ ରେ ପହଂଚିଛି.

() ନବମ ଥର ବିଜୁ ଜନତା ଦଳର ସଭାପତି ହେବେ ନବୀନ ପଟ୍ଟନାୟକ । ଆସନ୍ତ କାଲି ନାମାଙ୍କନ ଦାଖଲ କରିବେ ନବୀନ । ନବୀନ ପଟ୍ଟନାୟକଙ୍କ ନେତୃତ୍ବରେ ପୁଣିଥରେ ଓଡିଶାର ବିକାଶ ଓ ସ୍ବାଭିମାନ ପାଇଁ ଲଢେଇ ଜାରି ରଖିବାକୁ ବିଜେଡି ଆରମ୍ଭ କରିଛି ପ୍ରୟାସ । ୧୯୯୭ ମସିହାରୁ ଓଡିଶା ରାଜନୀତିରେ ପାଦ ଥାପିଥିବା ନବୀନ ପ୍ରଥମେ ଅଢେଇରୁ ୩ ବର୍ଷ ଯାଏ ବିରୋଧୀ ଦଳରେ ରହି ୨୦୦୦ ମସିହାରୁ ଓଡିଶା ଶାସନର ମଙ୍ଗ ଧରିଥିଲେ । ଏହାପରେ ନିରନ୍ତର ଭାବେ ୨୪ ବର୍ଷ ଶାସନ କରି ଓଡିଶାବାସୀଙ୍କ ସେବା କରିଛନ୍ତି । ତାଙ୍କ ନେତୃତ୍ବରେ ଓଡିଶା ବିଭିନ୍ନ କ୍ଷେତ୍ରରେ ବିକାଶ ହେବା ସହ ଜାତୀୟ ସ୍ତରରେ ସ୍ବତନ୍ତ୍ର ପରିଚୟ ସୃ୍‌ଷ୍ଟି କରିଥିଲା । ଶାସନ କଳରେ ଶୂନ୍ୟସହନଶୀଳତା ନୀତିକୁ ଆପଣାଇ ସେ ସାଜିଥିଲେ ଉଦାହହଣ। କଥା କମ କାମ ଅଧିକରେ ନବୀନଙ୍କ ଶାସନର ପରିଚୟ ଥିଲା । ଦଳ ଓ ସରକାର ସହ ସମନ୍ବୟ ରଖି ସେ କାମ କରୁଥିଲେ। ନବୀନ ବିଜେଡିକୁ ଦେଶର ଶକ୍ତିଶାଳୀ ଆଞ୍ଚଳିକ ଦଳ ଭାବେ ଉଭା କରି ଜାତୀୟ ରାଜନୀତିରେ ସ୍ବତନ୍ତ୍ର ପରିଚୟ ଦେଇଥିଲେ । ରାଜନୀତିକୁ ନୂଆ ଦିଶାରେ ନେଇ ନବୀନ ସାଜିଥିଲେ ଦେଶର ଅନନ୍ୟ । ଜନସେବା ଥିଲା ତାଙ୍କ ରାଜନୀତିର ମୂଳ ଆଧାର । ଶୃଙ୍ଖଳାକୁ ସବୁବେଳେ ଗୁରୁତ୍ୱ ଦେଇ ଆସୁଥିଲେ ଦଳରେ । ରାଜନୀତି ଯେତେ ହଲଚଲ ହେଲେ ମଧ୍ୟ ନବୀନ ସବୁବେଳେ ସ୍ଥିର ରହି ଚତୁର ଗୋଟି ଚାଳନ କରି ସଫଳତାର ଶୀର୍ଷରେ ପହଞ୍ଚିଛନ୍ତି ସେ । ନବୀନଙ୍କ ରାଜନୀତିର ଗୋଟିଏ ଧାରା ଜନସେବା । ଯେଉଁଥି ପାଇଁ ସେ ଓଡିଶାବାସୀଙ୍କ ହୃଦୟ ଜିତିଛନ୍ତି । ୨୪ ବର୍ଷ ପରେ ନବୀନ ପୁଣିଥରେ ବିରୋଧୀ ଭୁମିକାରେ ଉଭା ହୋଇଛନ୍ତି । ଦଳ କ୍ଷମତା ଯିବା ୧୦ ମାସ ଭିତରେ ନେତାଏ ନବୀନ ଶୃଙ୍ଖଳା ନୀତିରୁ ବାହାରି ପଡିଛନ୍ତି । ଯାହାକୁ ନେଇ ପ୍ରତ୍ୟେକ ଦିନ ବିଜେଡିରେ ହଲଚଲ ଲାଗି ରହିଛି । କେହି କାହାକୁ ମାନିବାକୁ ନାରାଜ । ଏପରିକି ପ୍ରଥମ ଥର ଲାଗି ନବୀନଙ୍କ ନିଷ୍ପତିକୁ ଚ୍ୟାଲେଞ୍ଜ କରିବାକୁ କିଛି ନେତା ପଛଘୁଞ୍ଚା ଦେଉନାହାନ୍ତି । ଆଉ ଏ ସ ବୁ ଭିତରେ ନବୀନ ବିଜେଡି ସଭାପତି ନବମ ଇଂନିସ ଆରମ୍ଭ କରିବାକୁ ଯାଉଛନ୍ତି ।

ନବୀନଙ୍କ ନବୀନ ଇଂନିସ ନବୀନ ପୁଣି ପୂର୍ବ ଷ୍ଟାଇଲକୁ ଫେରିବେ । ଦଳରେ ବିଶୃଙ୍ଖଳାକୁ ସେ ବରଦାସ୍ତ କରିବା ମୁଡରେ ନାହାନ୍ତି । ନେତାଙ୍କ ବୟାନବାଜି , ବିଜେଡିରେ ହଲଚଲ ଓ ପ୍ରତ୍ୟେକ ଦିନ ଗଣମାଧ୍ୟମରେ ବିଜେଡିରେ ଗୋଷ୍ଠୀ ବିବାଦ ମୁଖ୍ୟ ପ୍ରସଙ୍ଗ ହେବା ନବୀନଙ୍କ ନେତୃତ୍ବ ପ୍ରତି ଅଙ୍ଗୁଳି ଉଠିଛି । ଓ୍ବାକଫ ବିଲ କୁ ନେଇ ମଧ୍ୟ ନବୀନ ସ୍ଫଷ୍ଟତା ଦେବା ପରେ ବି ନେତାମାନେ ବୟାନବାଜି କରି ଦଳକୁ କ୍ଷତିରେ ପହଞ୍ଚାଇଛନ୍ତି । ସବୁବେଳେ ସ୍ଥିର ଓ ନିରବ ରହୁଥିବା ବିଜେଡିର ଏପରି କମ୍ପନ ସମୟରେ ନୂଆ ଅବତାରେ ଆସିବେ । ଦଳ ପୁଣି କେମିତି କ୍ଷମତାକୁ ଆସିବ ତାହାକୁ ନେଇ ସେ ନିରବ ଗୋଟି ଚାଳନା କରୁଛନ୍ତି । ନବମ ଥର ସଭାପତି ହେବା ପରେ ବିଜେଡିର ନବକଳେବର କରିବେ ନବୀନ । ପୁଣିଥରେ ନବୀନ ରାଜନୈତିକ ବ୍ୟାପାର କମିଟି ଗଠନ କରିବା ସହ ମହାସଚିବ ପଦ ସୃଷ୍ଟି କରିବେ । ଦଳ ପ୍ରତି ଆନୁଗତ୍ୟ ଥିବା ନେତାଙ୍କୁ ଏଥିଲାଗି ଗୁରୁଦାୟିତ୍ବ ଦିଆଯିବ । ପରେ ଛାମୁଆ ସଂଗଠନକୁ ମଧ୍ୟ ନୂଆରୂପ ଭାବେ ଗଢିତୋଳିବେ ।

ବିଜେଡିକୁ ନବକଳେବର କରିବା ପରେ ସଶକ୍ତ ବିରୋଧୀ ଦଳ ଭାବେ ନବୀନ ଓଡିଶା ହକ ପାଇଁ ପଲ୍ଲୀ ଠାରୁ ଦିଲ୍ଲୀ ଯାଏ ଲଢେଇ ଜୋରଦାର କରିବା ସହ ପଂଚାୟତ ଓ ପୌର ନିର୍ବାଚନ ପାଇଁ ଲମ୍ବା ଖସଡ଼ା ପ୍ରସ୍ତୁତ କରିବେ । ଯାହାକୁ ନେଇ ବିଜେଡି ଶିବିର ଉତ୍ସାହିତ ।

() କାଳବୈଶାଖୀ ପ୍ରଭାବରେ ଗ୍ରୀଷ୍ମ ତାତିରୁ ରାଜ୍ୟବାସୀଙ୍କୁ ଆଶ୍ୱସ୍ତି ମିଳିଛି l ହେଲେ ରାଜ୍ୟ ରାଜନୀତିରେ କିନ୍ତୁ ପ୍ରତ୍ୟେକ ଦିନ ତାତି ବଢ଼ିବାରେ ଲାଗିଛି l ହଲଚଲ ହେଉଛି ବିଜେଡି ରାଜନୀତି l ନେତାଙ୍କ ବୟାନବାଜି ବିଜେଡି ରାଜନୀତିକୁ ଗୋଳମାଳିଆ କରିଥିବା ବେଳେ କଂଗ୍ରେସ ଓ ବିଜେପିର ଅସନ୍ତୋଷ ନେତାଙ୍କ ପାଇଁ ସୁଯୋଗ ସୃଷ୍ଟି ହୋଇଛି ରାଜ୍ୟ ରାଜନୀତିରେ ନିଜର ଦବଦବା ଜାହିର କରିବା ପାଇଁ l ୨୦୨୪ ନିର୍ବାଚନର ୧୦ ମାସ ପରେ ହଠାତ୍ ସାମାଜିକ ନ୍ୟାୟ ଆନ୍ଦୋଳନ ମୁଣ୍ଡ ଟେକୁଛି l ଗୋଟେ ପଟେ ବିଜେଡିର ସାଙ୍ଗଠନିକ ନିର୍ବାଚନ ପ୍ରକ୍ରିୟା ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ୱାକଫ ବିଲ ନିଷ୍ପତ୍ତି ନେଇ ବିଜେଡିରେ ଅସନ୍ତୋଷ ନିଆଁ ହୁ ହୁ ହୋଇ ବଢ଼ିବାରେ ଲାଗିଛି l ବିଜେଡି ନେତାମାନେ ନବୀନଙ୍କୁ ସର୍ବମାନ୍ୟ ନେତା କହି ଗଣମାଧ୍ୟମ ଆଗରେ ୧୫ ଦିନ ହେବ ଯେପରି ବୟାନବାଜି କରୁଛନ୍ତି ତାହା ଅନ୍ୟ କିଛି ଦିଗକୁ ସୂଚାଉଛି l ରାଜନୀତିରୁ ସନ୍ନ୍ୟାସ ନେଇଥିବା କାର୍ତ୍ତିକ ପାଣ୍ଡିଆନ୍ ଦଳ ପାଇଁ କାମ କରୁନାହାନ୍ତି ବୋଲି ବିଜେଡି ସୁପ୍ରିମୋ ନବୀନ ପଟ୍ଟନାୟକ କହିଛନ୍ତି l ସେ ଦଳ ପାଇଁ କାମ କରୁନାହାନ୍ତି ବୋଲି ନବୀନ ପଟ୍ଟନାୟକ କହୁଥିବା ବେଳେ ନେତା କିନ୍ତୁ ବୁଝିବାକୁ ନାରାଜ l ନବୀନ ପଟ୍ଟନାୟକ ଙ୍କ ମନ୍ତବ୍ୟକୁ ମଧ୍ୟ ପ୍ରଥମ ଥର ଲାଗି ବିଜେଡି ନେତାମାନେ ଗ୍ରହଣ କରୁନାହାଁନ୍ତି l ଆଉ ଏସବୁ ପଛରେ ଲୁଚିରହିଛି ନୂଆ ରାଜନୈତିକ ସମୀକରଣ l ସାମାଜିକ ନ୍ୟାୟକୁ ଓଡ଼ିଶାରେ ଆନ୍ଦୋଳନ ରେ ପରିଣତ କରିବାକୁ ନେତାଏ ଅଣ୍ଟା ଭିଡିଛନ୍ତି l ସେପଟେ ଓଡ଼ିଶାରେ ସାମାଜିକ ନ୍ୟାୟ ପାଇଁ ଲଢ଼େଇ କରୁଥିବା ଶ୍ରୀକାନ୍ତ ଜେନାଙ୍କ କଂଗ୍ରେସ ଯେମିତି ସାଥ ଦେବା କଥା ଦେଉନାହିଁ l ଖାସ ସେଥିପାଇଁ ଶ୍ରୀକାନ୍ତ ଏହି ଆନ୍ଦୋଳନକୁ ଘରେ ଘରେ ପହଞ୍ଚିବା ପାଇଁ ଅସନ୍ତୋଷ ବିଜେଡି ନେତା ଏବେ ସାମାଜିକ ନ୍ୟାୟ ପ୍ରସଙ୍ଗକୁ ବାରମ୍ୱାର ଉଠାଉଛନ୍ତି l ରାଜନୈତିକ ସମୀକ୍ଷକଙ୍କ କହିବା କଥା ହେଉଛି ୱାକଫ ଆଳରେ ଓଡିଶାର ୮୦ ଦଶକର କିଛି ହେବିୱେଟ୍ ନେତା ଏବେ ବିଜେଡି ଅସନ୍ତୋଷର ନିଆଁରେ ଘିଅ ଢାଳି ଫାଇଦା ନେବାକୁ ଯାଉଛନ୍ତି l ଯାହା ବିଜେଡି ବିଭାଜନ ହେବାର ଗୋଟେ ବଡ ଦିଗ ହୋଇପାରେ ବୋଲି ସମୀକ୍ଷକ କହିଛନ୍ତି l ଯେଉଁଥି ପାଇଁ ରାଜ୍ୟ ରାଜନୀତିରେ ଏପରି ହଇଚଇ ସୃଷ୍ଟି ହୋଇଛି l ୨୪ ବର୍ଷ ପରେ ଓଡ଼ିଶାରେ ଏପରି ଏକ ବଡ ରାଜନୈତିକ ସମୀକରଣ ନେଇ ଚର୍ଚ୍ଚା ଜୋର l ଯାହା ଉପରେ ରାଜ୍ୟର ୩ ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସର ନଜର ରହିଛି l

( )ରାଜ୍ୟରେ ଯୋଉ ସରକାର ରୁହନ୍ତୁ ନାଁ କାହିକିଁ ସାମ୍ୱାଦିକ ମାନଙ୍କ ସ୍ବାର୍ଥ ପାଇଁ, ହକ୍ ପାଇଁ ସାମ୍ୱାଦିକ ୟୁନିଅନ ତା’ର ସଂଗ୍ରାମ ଜାରି ରଖିବ ବୋଲି ଭବାନୀପାଟଣା ଟାଉନ ହଲ୍ ଠାରେ ଅନୁଷ୍ଠିତ ଓଡ଼ିଶା ସାମ୍ବାଦିକ ୟୁନିଅନ (ଓୟୁଜେ)ର ରାଜ୍ଯ କାର୍ଯ୍ୟକାରିଣୀ ବୈଠକ ତଥା କଳାହାଣ୍ଡି ଜିଲ୍ଲା ସାମ୍ବାଦିକ ୟୁନିଅନର ୨୦ତମ ବାର୍ଷିକ ଉତ୍ସବରେ ରାଜ୍ୟ ସଭାପତି ପ୍ରସନ୍ନ ମହାନ୍ତି ତାଙ୍କ ବକ୍ତବ୍ୟରେ କହିଛନ୍ତି।ପ୍ରଥମ ପର୍ଯ୍ୟାୟରେ ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା। ସାମ୍ୱାଦିକ ମାନଙ୍କ ବୀମା ରାଶିକୁ ୧୦ ଲକ୍ଷ ଟଙ୍କାକୁ ବୃଦ୍ଧି, ସାମ୍ବାଦିକଙ୍କ ପେନସନ ଲାଗୁ, ଏକ୍ରିଡିଏସନ୍ କମିଟି ତିଆରି ପାଇଁ ସରକାରଙ୍କ ନିକଟରେ ଦାବୀ, ସାମ୍ୱାଦିକ ମାନଙ୍କ ସୁରକ୍ଷା ପାଇଁ ଦାବୀ ନେଇ ଏକ ପଦଯାତ୍ରା ଅନୁଷ୍ଠିତ ହୋଇଥିଲା। ଏହାପରେ ଦ୍ୱିତୀୟ ପର୍ଯ୍ୟାୟରେ ୨୦ତମ ବାର୍ଷିକ ଉତ୍ସବ ଅନୁଷ୍ଠିତ ହୋଇଥିଲା।

ରାଜ୍ୟ ସମ୍ପାଦକ କମ୍ବୁପାଣି ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବାର୍ଷିକ ଉତ୍ସବ ସମାରୋହରେ ମୁଖ୍ୟ ଅତିଥି ଭାବରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ଭକ୍ତ ଚରଣ ଦାସ, ସ୍ଵତନ୍ତ୍ର ଅତିଥି ଭାବରେ ରାଜ୍ୟ ସଭାପତି ପ୍ରସନ୍ନ ମହାନ୍ତି, ମୁଖ୍ୟ ବକ୍ତା ଭାବେ ଓଟିଭିର ପଶ୍ଚିମ ଓଡ଼ିଶା ବ୍ୟୁରୋ ଚିଫ୍ ମନୋରଞ୍ଜନ ଯୋଷୀ, ସମ୍ମାନୀତ ଅତିଥି ଭାବରେ କଳାହାଣ୍ଡି ଜିଲ୍ଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂ ଦେଓ, ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ତଥା ଗୋଲାମୁଣ୍ଡା ସମାଜ ପ୍ରତିନିଧି ବିନ୍ଦୁ ମହାନନ୍ଦ, ରାଜ୍ଯ ଉପସଭାପତି ରାଜେଶ ପଟ୍ଟନାୟକ, ଉପସଭାପତି ରାଜୀବ ମହାନ୍ତି, କଳାହାଣ୍ଡି ଜିଲ୍ଲା ସାମ୍ୱାଦିକ ୟୁନିଅନର କାର୍ଯ୍ୟକାରୀ ସଭାପତି ବିରଞ୍ଚି ନାରାୟଣ ଜାଲ ପ୍ରମୁଖ ମଞ୍ଚାସୀନ ରହିଥିଲେ।ଅତିଥି ମାନଙ୍କୁ ସଂଘ ତରଫରୁ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା। ରାଜ୍ଯ ସମ୍ପାଦକ ଶ୍ରୀ ମିଶ୍ର ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଜିଲ୍ଲା ସମ୍ପାଦକ ସନ୍ତୋଷ କୁମାର ସିଂଦେଓ ବିବରଣୀ ପଠନ କରିଥିଲେ। ଇତ୍ୟବସରରେ କଳାହାଣ୍ଡି ଜିଲ୍ଲାର ସଂସ୍କୃତିକୁ ଓ ସାମ୍ବାଦିକଙ୍କ ସ୍ୱାଭିମାନ ବହନ କରୁଥିବା ବାର୍ଷିକ ପତ୍ରିକା ‘କାରୁଣ୍ଡ’କୁ ଅତିଥି ବୃନ୍ଦ ଉନ୍ମୋଚନ କରିଥିଲେ। ମଞ୍ଚ ପରିଚାଳନା କରିଥିଲେ ସାମ୍ବାଦିକ ହେମନ୍ତ ସାହୁ।

୫୩ ବର୍ଷର ସାମ୍ୱାଦିକ ୟୁନିଅନ୍ ପ୍ରତି ସବୁବେଳେ ରାଜ୍ଯ ସରକାର ଅବହେଳା କରି ଆସିଛନ୍ତି। ବିହାର ଭଳି ରାଜ୍ୟରେ ସାମ୍ୱାଦିକ ମାନଙ୍କ ସମସ୍ତ ଅଧିକାର ପୂରଣ କରାଯାଇଛି। ପେନସନ୍, ପ୍ରୋଟେକ୍ସନ୍ ଓ ଆକ୍ରିଡିଏସନ୍ ପାଇଁ ଆମେ ଦୀର୍ଘ ଦିନ ଧରି ସ୍ୱର ଉତ୍ତୋଳନ କରି ଆସୁଛୁ। ଆମର ସହିବାର ସୀମା ଟପି ଗଲାଣି। ଏଣୁ ଆଗକୁ ଆମର ହକ ପାଇଁ ଆନ୍ଦୋଳନ କରିବୁ। ପ୍ରତି ଜିଲ୍ଲାରେ ଆନ୍ଦୋଳନ ହେବ ବୋଲି ରାଜ୍ୟ ସଭାପତି ଶ୍ରୀ ମହାନ୍ତି ତାଙ୍କ ଅଗ୍ନିବର୍ଷି ଭାଷଣରେ କହିଥିଲେ।ମୁଖ୍ୟ ବକ୍ତା ଶ୍ରୀ ଯୋଶୀ ପ୍ରକୃତ ସାମ୍ବାଦିକତା ବିଷୟରେ କହିଥିବା ବେଳେ ମୁଖ୍ୟ ଅତିଥି ଶ୍ରୀ ଦାସ ସାମ୍ବାଦିକ ସମାଜକୁ ବଞ୍ଚାଇ ରଖିଛି ବୋଲି ତାଙ୍କ ବକ୍ତବ୍ୟରେ କହିବା ସହିତ ନାରୀ ସୁରକ୍ଷା ଉପରେ ବକ୍ତବ୍ୟ ରଖିଥିଲେ। ଇତ୍ୟବସରରେ ସାମ୍ବାଦିକତା କ୍ଷେତ୍ରରେ ଅତୁଳନୀୟ ଅବଦାନ ପାଇଁ ସମ୍ବାଦର ଜିଲ୍ଲା ପ୍ରତିନିଧି ଦେବେନ୍ଦ୍ର ବିଶି, ସକାଳର କଳାହାଣ୍ଡି ଜିଲ୍ଲା ପ୍ରତିନିଧି ସ୍ଵାଧୀନ ପାତ୍ର, ଓଟିଭି ପ୍ରତିନିଧି ଇଙ୍ଗିତ ପଣ୍ଡା, ବିକାଶ ଷଢ଼ଙ୍ଗୀ, କନକ ଟିଭି ଜୟପାଟଣା ପ୍ରତିନିଧି ସମୀକ୍ଷା ପ୍ରହରାଜ, ରୁପ୍ରାରୋଡ ପ୍ରମେୟ ପ୍ରତିନିଧି ପୂର୍ଣ୍ଣଚନ୍ଦ୍ର ମହାନ୍ତି, ପରେଶ ନାଏକ, ମନମୋହନ ପଧାନ, କିଶୋର ନାଏକ, ଆଶୁତୋଷ ରାଉତ, ସନତ କୁମାର ପ୍ରଧାନୀ, ଖଗେଶ୍ବର ଧଙ୍ଗଡାମାଝୀ, ଶୁଭମ ରୋହିଲା, ଭଦ୍ରାଞ୍ଚଳ ନାଏକ ପ୍ରମୁଖ‌ସାମ୍ବାଦିକଙ୍କୁ ମାନପତ୍ର ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଥିଲା।

ଯାଜପୁର ଜିଲ୍ଲା ସାମ୍ୱାଦିକ ଅଭୟ ପତି, ରାଜ୍ୟ ବାର୍ କାଉନସିଲର ସଦସ୍ୟ ଭାବରେ ମନୋନୀତ ହୋଇଥିବାରୁ ରାଜୀବ ମହାନ୍ତି, ବିକ୍ରମାଦିତ୍ୟ ସିଂ ଦେଓଙ୍କୁ ସ୍ଵତନ୍ତ୍ର ଭାବରେ ସମ୍ମାନୀତ କରାଯାଇଥିଲା। ସଂଘରେ ନୂତନ ଭାବରେ ଯୋଗଦାନ କରିଥିବା ସଦସ୍ୟ ମାନଙ୍କୁ ପୁଷ୍ପ ଗୁଚ୍ଛ ଦେଇ ସ୍ବାଗତ କରାଯାଇଥିଲା। ଶେଷରେ ଜିଲ୍ଲା କାର୍ଯ୍ୟକାରୀ ସଭାପତି ଶ୍ରୀ ଜାଲ ଧନ୍ୟବାଦ ଅର୍ପଣ କରିଥିଲେ।ଭୋଜନ ବିରତି ପରେ ପୁଣି ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଥିଲା।

() ୨୦୨୪ ସାଧାରଣ ନିର୍ବାଚନର ୧୦ ମାସ ପରେ ଓଡିଶା ରାଜନୀତି ଅସ୍ଥିର ଆଡକୁ ଗତି କରିବାରେ ଲାଗିଛି । ଶାସକ ଓ ବିରୋଧୀ କ୍ୟାମ୍ପରେ ଯାହା ଘଟୁଛି ତାହା ଏବେ ଚର୍ଚ୍ଚାର ବିଷୟ । ବିଶେଷ କରି ମୁଖ୍ୟ ବିରୋଧୀ ବିଜେଡିରେ ପ୍ରତ୍ୟେକ ଦିନ ନେତାଙ୍କ ବିଶୃଙ୍ଖଳା ଦଳର ସଂଗଠନକୁ ହଲଚଲ କରିଥିବା ବେଳେ ନେତୃତ୍ବକୁ ନେଇ ଶାସକ ଦଳରେ ବିବାଦ ବି କିଛି କମ ନୁହେଁ । ଅନ୍ୟପଟେ ଦ୍ବିତୀୟ ବିରୋଧୀ କଂଗ୍ରେସ ଶିବିର ଯେତିକି ଉତ୍ସାହ ସେତିକି ଧୀମା ମଧ୍ୟ। ଏପରି ସ୍ଥିତିରେ ଚାଲିଛି ରାଜ୍ୟର ୩ ପ୍ରମୁଖ ରାଜନୈତିକ ଦଳ ସଂଗଠନ ।

ବିଜେଡି-

ବିଜେଡି କ୍ଷମତାରୁ ଯିବାର ୧୦ ମାସ ମଧ୍ୟରେ ବିଜେଡିରେ ବିଶୃଙ୍ଖଳା ଏବେ ଉଗ୍ରରୂପ ନେଇଛି। ମନ୍ତ୍ରୀ ଓ ବିଭିନ୍ନ ପଦ ପଦବୀରେ ଥିବା ବେଳେ ଯେଉଁନେତାମାନେ ନିଜ ବିଭାଗର କଥାରେ ଟିକେ ମୁହଁ ଖୋଲୁନଥିଲେ , ଏବେ ଦଳ ବିରୋଧରେ କେମିତି ଗଣମାଧ୍ୟମରେ କିଛି କହିବେ ସେହି ନେତାମାନଙ୍କୁ ନିଦ ନାହିଁ । ଯେମିତି ନାଲିରଙ୍ଗ ଦେଖିଲେ ଷଣ୍ଢ ଉତପାତ ଆରମ୍ଭ କରେ ଠିକ ସେହିଭଳି ଗଣମାଧ୍ୟମ ବୁମ ଦେଖିଲେ ବିଜେଡି ନେତାମାନେ ବିଜେଡି ବିରୋଧରେ କହିବାକୁ ଆଗଭର ହେଉଛନ୍ତି । ନିର୍ବାଚନ ହାରିବା ପରେ ବି ନେତାଏ ୨୦୨୯ରେ କିପରି ପୂର୍ଣ୍ଣବାର ଜିତିକି ଆସିବେ ସେ ଚିନ୍ତା ନକରି , ଦଳର ନେତୃତ୍ବ ଓ ନେତାଙ୍କ ସମାଲୋଚନା କରିବାରେ ଲାଗିଛନ୍ତି । କାରଣ ୨୪ ବର୍ଷ ଧରି ଯେଉଁ ଦିନ ନିର୍ବାଚନ ସରେ ସେହିଦିନ ଠାରୁ ପରବର୍ତ୍ତୀ ନିର୍ବାଚନ ପାଇଁ ବିଜେଡି ପ୍ରସ୍ତୁତି ଆରମ୍ଭ କରେ l ହେଲେ ଏଥର ତାହାର ବ୍ୟତିକ୍ରମ ଦେଖିବାକୁ ମିଳୁଛି ସବୁଠାରୁ ବଡ଼ କଥା ହେଉଛି ବିଜେଡି ରାଜନୀତିରେ ଏପରି ହଲଚଲ ସମୟରେ ଦଳର ନେତା ଓ ମଙ୍ଗୁଆଳ ପରସ୍ପର ବିରୋଧରେ କଥା କଟାକଟି ବାକଯୁଦ୍ଧରେ ଲାଗିପଡିଛନ୍ତି l ଯାହା ବିଭିନ୍ନ ଗଣମାଧ୍ୟମରେ ରାଜନୀତିର ବାଦିପାଲା ପରି ଓଡିଶାବାସୀ ଦେଖୁଛନ୍ତି । ୨୦୨୪ ସର୍ବାଧିକ ଭୋଟ ପାଇଁ ମୁଖ୍ୟ ବିରୋଧୀ ଦଳ ଭୂମିକା ଲିଭାଉଥିବା ବିଜେଡି ନେତାମାନେ ସରକାରଙ୍କ ବିରୋଧରେ ଲଢିବେ କଣ ନିଜ ବିରୋଧରେ ଲଢିବାକୁ ପସନ୍ଦ କରୁଛନ୍ତି ନେତାଏ। ପ୍ରଥମଥର ଲାଗି ଦେଖାଦେଉଛି ନବୀନଙ୍କ ନିଷ୍ପତି ଉପରେ ମଧ୍ୟ ନେତାଏ ପ୍ରଶ୍ନ ଉଠାଉଛନ୍ତି । ଏପରି ସ୍ଥିତିରେ ବିଜେଡିର ଭବିଷ୍ୟତ କଣ ହେବ ତାହାକୁ ନେଇ ଚା ଖଟିରୁ ପାନ ଦୋକାନୀ ଓ ଗାଁ ଗାଁରେ ଆଲୋଚନା ବିଷୟ ହୋଇଛି । ନବୀନ ପଟ୍ଟନାୟକଙ୍କ ନୀତି ଓ ଆଦର୍ଶରୁ ଯେପରି ବିଜେଡି ନେତାମାନେ ଧୀରେଧୀରେ ବାହାରି ଯାଉଛନ୍ତି ତାହା ଏବେ ଜଳଜଳ କରି ଦିଶୁଛି । ବିଜେଡିର ଏପରି ସମୟରେ ଦଳ କିପରି ସଂଗଠିତ ହୋଇ ୨୦୨୭ ପଂଚାୟତ ଓ ପୌର ନିର୍ବାଚନକୁ ସାମ୍ନା କରିବ ତାହା ଦଳ ପାଇଁ ବଡ଼ ଚ୍ୟାଲେଜ ।

ବିଜେପି-

ପ୍ରଥମ ଥର ଲାଗି ରାଜ୍ୟରେ ବିଜେପି ଏକାକୀ ସରକାର ଗଠନ କରିଛି । ୧୦ ମାସ ଭିତରେ ଦଳ ଓଡିଶାବାସୀଙ୍କ ଯେମିତି ବିଶ୍ବାସ ଭାଜନ ହେବା କଥା ତାହା ହୋଇପାରିନାହିଁ । ବିରୋଧୀ ଅଭିଯୋଗ କରୁଛନ୍ତି ଯେ ବିଜେପିକୁ ସରକାର ଚଳାଇବା ଜଣାନାହିଁ । ୧୦ ମାସ ଭିତରେ ଯାହା ସବୁ ଘଟୁଛି ତାହାକୁ ଦେଖି ଲୋକଙ୍କ ମଧ୍ୟରେ ବିରୋଧୀଙ୍କ ଏପରି ଅଭିଯୋଗ ଧୀରେ ଧୀରେ ବିଶ୍ବାସ ଆଡକୁ ଗତି କରୁଛି । ସରକାର ନିଜର ଭାବମୃର୍ତ୍ତି ତିଆରି କରିବା ପରିବର୍ତ୍ତେ ରଙ୍ଗ , ନାଁ ପରିବର୍ତ୍ତନ ଉପରେ ଅଧିକ ଗୁରୁତ୍ବ ଦେଇଛନ୍ତି । ସରକାର ଗଠନର ୧୦ ମାସ ପରେ ଅଧାଗଢା ମନ୍ତ୍ରୀମଣ୍ଡଳ ହୋଇରହିଛି । ଏବେ ବି ୬ଟି ମନ୍ତ୍ରୀ ପଦ ଖାଲି ପଡିଛି । ସେହିପରି ବିଜେପି ସରକାର ଗଠନ ହେବାର ୧୦ ମାସ ପରେ ବି ନିଗମ ବଣ୍ଟନ କରିପାରୁନାହିଁ । ମନ୍ତ୍ରୀମାନେ ମଧ୍ୟ ନିଗ ବିଭାଗ କଥା ଛାଡ଼ି ଅନ୍ୟ ବିଭାଗ ବିଷୟରେ କହି ଗଣମାଧ୍ୟମର ଚର୍ଚ୍ଚାରେ ରହିଛନ୍ତି । ସୁଭଦ୍ରା, ଆୟୁଷ୍ମାନ ଯୋଜନା ଲାଗୁ କରି ବିଜେପି ନିଜର କଥା ରଖିଥିବା ବେଳେ ଚିଟଫଣ୍ଡ ଟଙ୍କା ଫେରସ୍ତ, ୩୦୦ ୟୁନିଟ ମାଗଣା ବିଜୁଳି ଆଦି ପରି ଅନେକ ପ୍ରତିଶୃତି ଏବେ ବି ପୂରଣ କରିନାହିଁ । ଏତ ଥିଲା ସରକାର କଥା । ଏବେ ବିଜେପି ଦଳ କଥା । ଡେଡଲାଉନ ପୁରିବା ପରେ ମଧ୍ୟ ରାଜ୍ୟ ବିଜେପି ସଭାପତି ଚୟନ କରିପାରୁନାହିଁ। ଯାହାକୁ ନେଇ ଦଳ ଭିତରେ ବିଭିନ୍ନ ଗୋଷ୍ଠୀ ମୁହାମୁହିଁ ହେଉଛନ୍ତି । କିଏ ପରବର୍ତ୍ତୀ ସଭାପତି ହେବ ତାହା ବି ଦଳ ସ୍ଥିର କରିପାରୁନାହିଁ । ସେହିପରି ଚର୍ଚ୍ଚା ହେଉଛି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନକୁ ଓଡିଶା ଶାସନ ବ୍ୟବସ୍ଥାରୁ ଦୂରେଇ ରଖିବାକୁ ବିଜେପିର ଗୋଟେ ଗୋଷ୍ଠି ସକ୍ରୀୟ ଭାବେ କେନ୍ଦ୍ର ନେତୃତ୍ବ ପାଖରେ ଜିଦ ଧରି ସଫଳ ହୋଇଛନ୍ତି । ଓଡିଶାରେ ବିଜେପି ଏକାକୀ ସରକାର ଗଠନ କରିବାରେ ମୁଖ୍ୟ ବିନ୍ଧାଣୀ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ହୋଇଥିବା ବେଳେ ତାଙ୍କୁ ଏକ ଘରିଆ କରାଯାଇଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି । ଧୂଆଁ ନଥିଲେ ନିଆଁ ଆସେ ନାହିଁ ପରି ଏ ଚର୍ଚ୍ଚା । ଏସବୁ ଛାଡ଼ି ବିଜେପି ୨୦୨୭ ପଂଚାୟତ ଓ ପେୌର ନିର୍ବାଚନରେ କିପରି ଭଲ ପ୍ରଦର୍ଶନ କରିବ ତାହା ଦଳ ପାଇଁ ବଡ଼ ଚ୍ୟାଲେଜ ।

କଂଗ୍ରେସ-

ନିର୍ବାଚନର ୧୦ ମାସ ପରେ କଂଗ୍ରେସ ସ୍ଥିତି ଟିକେ ଭିନ୍ନ । ୮ ମାସ ମୁଖିଆ ବିନା ଦଳର ସଂଗଠନ ରସାତଳକୁ ଯିବା ପରେ ଫେବୃଆରୀ ୧୧ ତାରିଖରେ ଭକ୍ତ ଚରଣ ଦାସ ଓଡିଶା ପିସିସିର ସଭାପତି ଭାବେ ନିଯୁକ୍ତ ହେଲେ । ଏହାପରେ କଂଗ୍ରେସ ଶିବିର ବେଶ ଚଳଚଞ୍ଚଳ ହୋଇଛି। ଭକ୍ତଙ୍କ ନେତୃତ୍ବରେ ଦଳ ଆଗକୁ ବଢୁଥିବା ବେଳେ ଦଳର ଦିଗ ଓ ଦିଶା କଣ ହେବ ତାହା ବି ସନ୍ଦେହରେ । କାରଣ ପ୍ରଥମ ଥର ଲାଗି କଂଗ୍ରେସ ବିଧାନସଭାରେ କୌଣସି ରେକର୍ଡ଼ ଠିକ ସେ କରି ପାରିଲା ନାହିଁ କି ବିଜେପି ଓ ବିଜେଡିକୁ ଶାଣିତ ଆକ୍ରମଣ କରିପାରିନାହିଁ । ବଂର ଦଳର ୧୪ ଜଣ ବିଧାୟକ ବିଧାନସଭାରୁ ନିଲମ୍ବନ ହେଲେ । ଗୃହ ବାହାରେ ମାର୍ଚ୍ଚ ୨୭ ତାରିଖରେ ଦଳ ବିକ୍ଷୋଭ ପ୍ରଦର୍ଶନ କରି ଯେଉଁ ଗଣ୍ଡଗୋଳ କଲା ତାହା ବିରୋଧରେ ଶାସକ ଦଳ ବଡ଼ ଆକ୍ସନ ନେଇଛି । ସମସ୍ତ ବିଧାୟକ , ଜଣେ ସାଂସଦ ଓ ୫ ହଜାର କଂଗ୍ରେସ କର୍ମୀଙ୍କ ନାଁରେ ମାମଲା ରୁଜୁ ହୋଇଛି । ପିସିସି ସଭାପତି ହେବାର ୨ ମାସ ପରେ ବି ପିସିସି ସଭାପତି ନିଜର ଟିମ ଗଠନ କରିପାରିନାହାନ୍ତି । କାହିକିଁ ଟିମ ଗଠନ କରିପାରୁନାହାନ୍ତି ତାହାକୁ ନେଇ କଂଗ୍ରେସରେ ସବୁ କିଛି ଠିକ ଠାକ ଚାଲିନାହିଁ । ବ୍କକ, ଜିଲ୍ଲା ସଭାପତି ଘୋଷଣା ହୋଇନଥିଲେ ମଧ୍ୟ ପିସିସି ସଭାପତି ଗୋଟିଏ ପରେ ଗୋଟିଏ କାର୍ଯ୍ୟକ୍ରମ ଘୋଷଣା କରିଚାଲିଛନ୍ତି । ଯାହାକୁ କଂଗ୍ରେସ କର୍ମୀ ଓ ନେତାମାନେ ନାପସନ୍ଦ କରୁଛନ୍ତି । ଏହସହ ଭକ୍ତଙ୍କ କାର୍ଯ୍ୟକ୍ରମକୁ ନେଇ କଂଗ୍ରେସର ଗୋଟିଏ ଗୋଷ୍ଠୀ ଅସନ୍ତୋଷ ହୋଇଛନ୍ତି। ଯାହା ଆଗକୁ ଉଗ୍ରରୂପ ନେବାର ସମ୍ଭାବନା ରହିଛି।ବିଶେଷ କରି କଂଗ୍ରେସ ନେତା ମହମ୍ମଦ ମୋକିମ ଭକ୍ତଙ୍କୁ ପିସିସି ସଭାପତି ଭାବେ କେତେ ସହଯୋଗ କରିବେ ଓ ତାଙ୍କ ସହ ଅନ୍ୟ କିଛି ନେତା ଏବେ ସାମିଲ ହୋଇ ଭକ୍ତଙ୍କ ବିରୋଧରେ ଭିତିରିଆ ମେଳି ବାନ୍ଧିଥିବା ଚର୍ଚ୍ଚା ହେଉଛି ।