ଇଶ୍ରୋର ଅଧ୍ୟକ୍ଷ ଡକ୍ଟର ଭି. ନାରାୟଣନ ମଙ୍ଗଳବାର ସନ୍ଧ୍ୟାରେ ଭୁବନେଶ୍ବରରେ ପହଞ୍ଚିଛନ୍ତି। ବିମାନବନ୍ଦରରେ ତାଙ୍କୁ ସୋଆ ଶିକ୍ଷା ଓ ଅନୁସନ୍ଧାନ ବିଶ୍ଵବିଦ୍ୟାଳୟର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ, ଆଇଏନ୍ଏଇ ଓଡ଼ିଶା ଶାଖାର ଅଧ୍ୟକ୍ଷ ତଥା ସୋଆ ଆନ୍ତର୍ଜାତିକ ଉପଦେଷ୍ଟା ମଣ୍ଡଳୀର ଅଧ୍ୟକ୍ଷ ପ୍ରଫେସର ଦାମୋଦର ଆଚାର୍ଯ୍ୟ ଏବଂ ଆଇଟିଇଆର ର ନିର୍ଦ୍ଦେଶକ ପ୍ରଫେସର ମାନସ କୁମାର ମଲ୍ଲିକ ସ୍ୱାଗତ ଜଣାଇଥିଲେ। ବୁଧବାର ସନ୍ଧ୍ୟାରେ ଶିକ୍ଷା ଓ ଅନୁସନ୍ଧାନ ବିଶ୍ଵବିଦ୍ୟାଳୟ କ୍ୟାମ୍ପସ ୨ ପରିସରରେ ଡ. ନାରାୟଣନ ସୋଆର ଫାକଲ୍ଟି ଏବଂ ଛାତ୍ରଛାତ୍ରୀ ମାନଙ୍କ ଉଦ୍ଦେଶ୍ୟରେ ବକ୍ତୃତା ପ୍ରଦାନ କରିବେ ।
() ପୋଲାଭରମ ବିବାଦକୁ ନେଇ ଚାରି ରାଜ୍ୟ ମୁଖ୍ୟମନ୍ତ୍ରୀଙ୍କ ସହ ପ୍ରଧାନମନ୍ତ୍ରୀ ସମୀକ୍ଷା କରିବେ l ଏହାକୁ ଦୁଇ ଦିନ ହେବ ଗଣମାଧ୍ୟମରେ ଖବର ହେଉଛି l ଯାହାକୁ ନେଇ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ ପୋଲଭାରମ୍ ପ୍ରସଂଗରେ ଓଡ଼ିଶା ତାର ଯୁକ୍ତି ଉପସ୍ଥାପନ କରିବ । ଓଡ଼ିଶାର ସ୍ବାର୍ଥ ସହିତ କେବେ ବି ସାଲିସ କରାଯିବ ନାହିଁ । ଓଡ଼ିଶାର ସ୍ବାର୍ଥ ଦୃଷ୍ଟିରୁ ସମସ୍ତ ତଥ୍ୟ ଉପସ୍ଥାପନ କରାଯିବ । ଜଳସମ୍ପଦ ବିଭାଗ ଯୁକ୍ତି ଉପସ୍ଥାପନ କରିବ । ତେଣୁ ବୁଝାମଣା ମାଧ୍ୟମରେ ଯାହା ସମାଧାନ ହୋଇପାରିବlଆଲୋଚନା ମାଧ୍ୟମରେ ହେଲେ ବିବାଦର ସମାଧାନ ହେବ । ଜମି, ଜଳ, ଅଞ୍ଚଳର ସବୁ ବିବାଦ ସମାଧାନ ହେବ । କିନ୍ତୁ ଏ ବାବଦରେ ଗତ ସରକାର ଯେଉଁ ନ୍ୟାୟିକ ଲଢେଇ କରିବା କଥା ସେଥିରେ ପଛଘୁଞ୍ଚା ଦେଲେ । କେବଳ ନିଜର ରାଜନୈତିକ ସ୍ବାର୍ଥ ଦେଖିଲେ ପୂର୍ବ ସରକାର । ଆଲୋଚନା ମାଧ୍ୟମରେ ସମାଧାନ ପାଇଁ ଗତ ସରକାର ଶୁଣୁନଥିଲେ । ବଧିର ପାଲଟି ଯାଇଥିଲେ ବୋଲି ବିଜେଡି ସରକାରକୁ ଟାର୍ଗେଟ କରି କହିଥିଲେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ l ଅନ୍ୟପଟେ ରାଜ୍ୟର ସବୁଠାରୁ ଗୁରୁତ୍ବ ପୁର୍ଣ୍ଣ ପୋଲାଭରମକୁ ନେଇ ମୁଖ୍ୟମନ୍ତ୍ରୀଙ୍କ ପାଖରେ କୌଣସି ସୂଚନା ନାହିଁ l ମୁଖ୍ୟମନ୍ତ୍ରୀ ମୋହନ ମାଝୀ ଗଣମାଧ୍ୟମକୁ କହିଛନ୍ତି ଯେ ପ୍ରଧାନମନ୍ତ୍ରୀ ପୋଲାଭରମକୁ ନେଇ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ବୋଲି ମୋ ପାଖରେ ସେମିତି କୌଣସି ବାର୍ତା ନାହିଁ। ଅଫିସିଆଲି ସ୍ତରରେ ଆମ ରାଜ୍ୟର ମୁଖ୍ୟମନ୍ତ୍ରୀ ଶାସନସଚିବ ଏବଂ ବିଭାଗୀୟ ସଚିବମାନଙ୍କ ସହିତ ଆଲୋଚନା କରିବେ ବୋଲି ପ୍ରଧାନମନ୍ତ୍ରୀ ଯେଉଁ ପ୍ରକ୍ରିୟା ରଖିଛନ୍ତି ସେ ଆଲୋଚନା କରିପାରନ୍ତି। ଆମର ଯେଉଁ ଦାବି ଆଉ ହକ ଅଛି ତାହା ଆମେ ଉପସ୍ଥାପିତ କରିବୁ ବୋଲି ମୁଖ୍ୟମନ୍ତ୍ରୀ କହିଛନ୍ତି l ହେଲେ ଏଠି ପ୍ରଶ୍ନ ଉଠୁଛି ଯେଉଁ ପ୍ରସଙ୍ଗକୁ ନେଇ ରାଜ୍ୟ ରାଜନୀତି ଉଠୁଛି ପଡୁଛି, ସେ ପ୍ରସଙ୍ଗକୁ ମୁଖ୍ୟ ବିରୋଧୀ ବିଜେଡି ଅସ୍ତ୍ର କରି ସରକାରଙ୍କୁ ଘେରିଥିବା ବେଳେ ମୁଖ୍ୟମନ୍ତ୍ରୀ ଏ ପ୍ରସଂଗରେ ଅନ୍ଧାରରେ ରହିବା ରାଜ୍ୟରେ ବିଜେପି ସରକାର କେମିତି ଚାଲିଛି ତାହା ପ୍ରମାଣିତ କରିଛି l ସରକାରରେ ଗୋଟେ ହାତ କଣ କରୁଛି ଅନ୍ୟହାତ ଜାଣୁନାହିଁ ତାହା ପୋଲାଭରମ୍ ପ୍ରସଙ୍ଗ ବୈଠକ ନେଇ ମୁଖ୍ୟମନ୍ତ୍ରୀ ଓ ଆଇନ ମନ୍ତ୍ରୀ ଗଣମାଧ୍ୟମ ବୟାନରୁ ସ୍ପଷ୍ଟ ହୋଇଛି l
ଭୁବନେଶ୍ୱର, ମେ ୧୯: ଦେଶର ଭବିଷ୍ୟତ ନିମନ୍ତେ ଓ ସ୍ଥାୟୀ ବିକାଶ ଲକ୍ଷ୍ୟ ହାସଲ କରିବା ପାଇଁ ପରମାଣୁ ଶକ୍ତିର ଉପଯୋଗ କରିବା ଆବଶ୍ୟକ ବୋଲି ବିଶିଷ୍ଟ ପରମାଣୁ ବଜ୍ଞାନୀ ଡକ୍ଟର ଏ.କେ. ତ୍ୟାଗୀ କହିଛନ୍ତି । ବର୍ତମାନ ଜଳବାୟୁ ପରିବର୍ତନ ମଣିଷ ଜୀବନକୁ ବିଶେଷ ପ୍ରଭାବିତ କରିଥିବା ବେଳେ ପ୍ରଦୂଷଣକୁ ନିୟନ୍ତ୍ରିତ କରି ସ୍ୱଚ୍ଛ ବିଦ୍ୟୁତ୍ ଉତ୍ପାଦନ ନିମନ୍ତେ ପରମାଣୁ ବିଜ୍ଞାନର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ଡକ୍ଟର ତ୍ୟାଗୀ କହିଛନ୍ତି । ବର୍ତମାନ ଟ୍ରୋମ୍ବେ ସ୍ଥିତ ହୋମି ଭାବା ନ୍ୟାସ୍ନାଲ୍ ଇନ୍ଷ୍ଟିଚ୍ୟୁଟ୍ର ଡିନ୍ ତଥା ସିନିୟର ପ୍ରଫେସର ଭାବେ କାର୍ଯ୍ୟ କରୁଥିବା ଡକ୍ଟର ତ୍ୟାଗୀ ଶନିବାର ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍ଡ ଟୁ ବି ୟୁନିଭର୍ସିଟି କ୍ୟାମ୍ପସ ପରିସରରେ ଇଣ୍ଡିଆନ୍ ନ୍ୟାସ୍ନାଲ ଏକାଡେମୀ ଅଫ୍ ଇଞ୍ଜିନିୟରିଂ (ଆଇଏନ୍ଏଇ)ର ଓଡ଼ିଶା ଶାଖା ପକ୍ଷରୁ ଆୟୋଜିତ ବକ୍ତୃତାମାଳାର ପ୍ରଥମ ବକ୍ତୃତା ପ୍ରଦାନ କରି ସେ ଏହା କହିଥିଲେ । ୧୯୯୮ ମସିହା ମେ ୧୧ ଏବଂ ୧୩ ତାରିଖ ମଧ୍ୟରେ ପୋଖରାନ୍ ଠାରେ ଭାରତ କରିଥିବା ପରମାଣୁ ପରୀକ୍ଷାକୁ ସ୍ମରଣ କରି ଜାତୀୟ ଟେକ୍ନୋଲଜି ଦିବସ ପାଳନ ଅବସରରେ ଏହି ବକ୍ତୃତାମାଳାର ଆୟୋଜନ କରାଯାଇଛି । ପ୍ରଥମ ବକ୍ୃତାର ପ୍ରସଙ୍ଗ ‘ସଷ୍ଟେନେବୁଲ ଡେଭଲପମେଂଟ: ରୋଲ ଅଫ୍ ନ୍ୟୁକ୍ଲିୟର ସାଇନ୍ସ ଆଣ୍ଡ ଟେକ୍ନୋଲଜି’ ଉପରେ ବକ୍ତବ୍ୟ ରଖି ଡକ୍ଟର ତ୍ୟାଗୀ କହିଥିଲେ ଯେ ଭାରତରେ ବୃଦ୍ଧି ପାଉଥିବା ବିଦ୍ୟୁତ ଶକ୍ତିର ଆବଶ୍ୟକତାକୁ ଦୃଷ୍ଟିରେ ରଖି ଏବଂ ଜଳବାୟୁ ପରିବର୍ତନର ପ୍ରଭାବକୁ ଦୂର କରିବା ନିମନ୍ତେ ପରମାଣୁ ଶକ୍ତି ନିର୍ଭର ଯୋଗ୍ୟ ଏବଂ ଏହାକୁ ସ୍ଥାୟୀ ବ୍ୟବସ୍ଥା ଭାବେ ଗ୍ରହଣ କରାଯାଇପାରେ । ଡକ୍ଟର ତ୍ୟାଗୀଙ୍କୁ ଆଇଏନ୍ଏଇ ଓଡ଼ିଶା ଶାଖାର ଅଧ୍ୟକ୍ଷ ତଥା ସୋଆ ଆନ୍ତର୍ଜାତିକ ଉପଦେଷ୍ଟା ମଣ୍ଡଳୀର ଅଧ୍ୟକ୍ଷ ପ୍ରଫେସର ଦାମୋଦର ଆଚାର୍ଯ୍ୟ ସ୍ୱାଗତ କରିଥିବା ବେଳେ ଏହି କାର୍ଯ୍ୟକ୍ରମରେ ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଏବଂ ଆଇଆଇଟି ଭୁବନେଶ୍ୱରର ପ୍ରଫେସର ଶୁଭ୍ରାଂଶୁ ରଞ୍ଜନ ସାମନ୍ତରାୟ ବକ୍ତବ୍ୟ ରଖିଥିଲେ । ସୋଆର ସେଂଟର ଫର ନାନୋ ସାଇନ୍ସ ଆଣ୍ଡ ନାନୋ ଟେକ୍ନୋଲଜିର ନିର୍ଦ୍ଦେଶକ ପ୍ରଫେସର କୁଳମଣି ପରିଡ଼ା ବକ୍ତାଙ୍କର ପରିଚୟ ପ୍ରଦାନ କରିଥିବା ବେଳେ ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ କାର୍ଯ୍ୟକ୍ରମ ପରିଚାଳନା କରିଥିଲେ । ଆଡିସ୍ନାଲ୍ ଡିନ୍ (ଷ୍ଟୁଡେଂଟ ଆଫେୟାର୍ସ), ଆଇଟିଇଆର ପ୍ରଫେସର ରେଣୁ ଶର୍ମା କାର୍ଯ୍ୟକ୍ରମ ଶେଷରେ ଧନ୍ୟବାଦ ଅର୍ପଣ କରିଥିଲେ ।ଡକ୍ଟର ତ୍ୟାଗୀ କହିଥିଲେ ଯେ କୃଷି, ସ୍ୱାସ୍ଥ୍ୟ ବିଜ୍ଞାନ ଏବଂ ମ୍ୟାଟେରିଆଲ୍ ସାଇନ୍ସ କ୍ଷେତ୍ରରେ ପରମାଣୁ ବିଜ୍ଞାନର ପ୍ରଭୂତ ଆବଶ୍ୟକତା ରହିଛି । କ୍ୟାନ୍ସର ଚିକି୍ତ୍ସା କ୍ଷେତ୍ରରେ ରୋଗ ଚିହ୍ନଟ ଓ ଚିକିତ୍ସା ନିମନ୍ତେ ରେଡିଓଆଇସୋଟୋପ୍ସ ବ୍ୟବହାର ଏବଂ ଖାଦ୍ୟ ସଂରକ୍ଷଣ କ୍ଷେତ୍ରରେ ଏହାର ଆବଶ୍ୟକତା ରହିଥବା ସେ କହିଥିଲେ । ଭାରତର ପରମାଣୁ କାର୍ଯ୍ୟକ୍ରମର ବିକାଶ କ୍ଷେତ୍ରରେ ପ୍ରମୁଖ ଭୂମିକା ନେଇଥିବା ଡକ୍ଟର ତ୍ୟାଗୀ କହିଥିଲେ ଯେ ଗତ ୨୦୦ ବର୍ଷ ଧରି ପରିବେଶକୁ ଯେଉଁଭଳି ଭାବେ ବ୍ୟବହାର କରାଯାଇଛି ସେହି କାରଣରୁ ବିଶ୍ୱରେ ପରିବେଶ ଜନିତ ସମସ୍ୟା ଦେଖା ଦେଇଛି । ପରିବେଶରେ ଅଙ୍ଗାରକାମ୍ଳ ୩୨୦ ପାର୍ଟସ ପର ମିଲିୟନ୍ (ପିପିଏମ୍)ରୁ ୪୩୦ ପିପିଏମ୍କୁ ବୃଦ୍ଧି ପାଇଛି । ଯଦି ଏହା ୪୫୦ ପିପିଏମ୍ ଛୁଇଁବ ତେବେ ପରିସ୍ଥିତି ଭୟଙ୍କର ହେବ । ତେଣୁ ଗ୍ରୀନ୍ ହାଉସ ଗ୍ୟାସକୁ ହ୍ରାସ କରାଇବା ନିମନ୍ତେ ସମସ୍ତ ପଦକ୍ଷେପ ନେବା ଆବଶ୍ୟକ ଅଟେ । ଏହା ହିଁ ବିଶ୍ୱ ତାପମାତ୍ରା ବୃଦ୍ଧିର ପ୍ରମୁଖ କାରଣ ବୋଲି ସେ କହିଥିଲେ । ଜାତି ସଂଘ ୧୭ଟି ସ୍ଥାୟୀ ବିକାଶ ଲକ୍ଷ୍ୟ ହାସଲ ଧାର୍ଯ୍ୟ କରିଥିବା ବେଳେ କେବଳ ପରମାଣୁ ଶକ୍ତି ବ୍ୟବହାର ଉପରେ ଅଧିକ ଗୁରୁତ୍ୱ ଦିଆଗଲେ ଏହା ମଧ୍ୟରୁ ୮ଟି ଲକ୍ଷ୍ୟ ହାସଲ କରିବା ସହଜ ହୋଇପାରିବ ବୋଲି କହିବା ସହ ଦୀର୍ଘ ସମୟ ଧରି ମାନବିକ କାର୍ଯ୍ୟଧାରା ଯୋଗୁଁ ହିଁ ପୃଥିବୀର ସନ୍ତୁଳନରେ ପରିବର୍ତନ ଘଟିଛି ବୋଲି ଡକ୍ଟର ତ୍ୟାଗୀ କହିଥିଲେ । କୋଇଲା ଏବଂ ଅନ୍ୟାନ୍ୟ ଇନ୍ଧନ ବ୍ୟବହାର କରି ବିଦ୍ୟୁତ ଉତ୍ପାଦନ ତଥା ଅନ୍ୟ ଶିଳ୍ପ ଦ୍ୱାରା ପ୍ରଦୂଷଣ ଜନିତ ସମସ୍ୟା ଉପୁଜୁଥିବା ବେଳେ ପରମାଣୁ ଶକ୍ତି ବ୍ୟବହାରରେ ଏଭଳି ସମସ୍ୟା ଦେଖାଦିଏ ନାହିଁ । ଏଥି ନିମନ୍ତେ ଭାରତରେ ୟୁରାନିୟମ୍ର ଅଭାବ ଥିଲେ ମଧ୍ୟ ଯଥେଷ୍ଟ ଥୋରିୟମ୍ ଗଚ୍ଛିତ ଅଛି ଯାହାକୁ ବ୍ୟବହାର କରାଯାଇପାରିବ ବୋଲି ସେ କହିଥିଲେ lଏକ ସପ୍ତାହ ବ୍ୟାପୀ ଆୟୋଜିତ ହେବାକୁ ଥିବା ଏ ବକ୍ତୃତାମାଳାକୁ ସୋଆ, ଆଇଆଇଟି ଭୁବନେଶ୍ୱର, ଆଇଏମ୍ଏମ୍ଟି ଭୁବନେଶ୍ୱର ଏବଂ ନାଇଜର ଭୁବନେଶ୍ୱର ପକ୍ଷରୁ ସଂଚାଳନ କରାଯାଉଛି ।
ଏହି କାର୍ଯ୍ୟକ୍ରମରେ ବକ୍ତବ୍ୟ ରଖିବାକୁ ଥିବା ଅନ୍ୟ ବିଶିଷ୍ଟ ବକ୍ତାମାନେ ହେଲେ ଆଇଆଇଟି (ବିଏଚ୍ୟୁ)ର ବୋର୍ଡ ଅଫ୍ ଗଭର୍ଣ୍ଣର୍ସ ଚେୟାରମ୍ୟାନ ତଥା ଭାରତର ଲାଇଟ୍ କମ୍ବାଟ ଏୟାରକ୍ରାଫ୍ଟ (ଏଲ୍ଏସି)ର ଚିଫ୍ ଡିଜାଇନର ତଥା ପୂର୍ବତନ ପ୍ରକଳ୍ପ ନିର୍ଦ୍ଦେଶକ ଡକ୍ଟର କୋଟା ହରିନାରାୟଣ, ଇଣ୍ଡିଆନ୍ ସ୍ପେସ୍ ରିସର୍ଚ୍ଚର୍ ଅର୍ଗାନାଇଜେସନ୍ (ଇସ୍ରୋ)ର ଅଧ୍ୟକ୍ଷ ଡକ୍ଟର ଭି. ନାରାୟଣନ ଏବଂ ପ୍ରତିରକ୍ଷା ମନ୍ତ୍ରଣାଳୟ ଅଧିନସ୍ଥ ଇଲେକ୍ଟ୍ରୋନିକ୍ସ ଆଣ୍ଡ କମ୍ୟୁନିକେସନ୍ ସିଷ୍ଟମ୍ (ଡିଆଇଡିଓ)ର ଡାଇରେକ୍ଟର ଜେନେରାଲ ଡକ୍ଟର ବିନୟ କୁମାର ଦାସ ।
() ଦାୟିତ୍ୱ ନେବାର ୩ମାସ ପରେ ପିସିସି ସଭାପତି ଭକ୍ତ ଚରଣ ଦାସ ନୂଆ ଟିମ୍ ଗଢିଛନ୍ତି l ଭକ୍ତଙ୍କ ଟିମ୍ ରେ ନିର୍ବାଚିତ ଓ ସକ୍ରିୟ କଂଗ୍ରେସ ନେତାଙ୍କୁ ସଂଗଠନର ଗୁରୁ ଦାୟିତ୍ବ ଦେଇଛନ୍ତି l ବିଧାୟକ ମାନଙ୍କୁ ସଂଗଠନର ଦାୟିତ୍ୱ ଦେଇ ଭକ୍ତ ୨୦୨୯ପାଇଁ କଂଗ୍ରେସକୁ ଆଗେଇ ନେବାକୁ ଲମ୍ବା ରଣନୀତି ପ୍ରସ୍ତୁତ କରିଛନ୍ତି l ଭକ୍ତଙ୍କ ଟିମରେ ୭ ଉପସଭାପତି, ୧୦ ଜଣ ସାଧାରଣ ସମ୍ପାଦକ, ୧୨ ଜଣ ସମ୍ପାଦକ, ଜଣେ କୋଷାଧ୍ୟକ୍ଷଙ୍କ ସମେତ ଘୋଷଣା ହୋଇଛି ସୋସିଆଲ ମିଡିଆ ବିଭାଗର ଅଧ୍ୟକ୍ଷ ଓ ଉପାଧ୍ୟକ୍ଷଙ୍କ ନାମ ଉପରେ ମୋହର ମାରିଛନ୍ତି ଏଆଇସିସି ସଭାପତି । ଦଳର ଦୁଇ ଚର୍ଚ୍ଚିତ ବିଧାୟକ ତାରା ପ୍ରସାଦ ବାହିନୀପତି ଓ ରମେଶ ଜେନାଙ୍କୁ ଉପ ସଭାପତି ଦାୟିତ୍ୱ ଦେଇଛନ୍ତି ଭକ୍ତ ଦାସ l ସେହିପର ପୂର୍ବତନ ବିଧାୟକ ସନ୍ତୋଷ ସିଂ ସାଲୁଜା, ଦେବାଶିଷ ପଟ୍ଟନାୟକ, ବିଧାୟକ ସି.ଏସ୍. ରାଜନ ଇକା, ପୂର୍ବତନ ବିଧାୟକ ଲଲାଟେନ୍ଦୁ ମହାପାତ୍ର ଓ ପୂର୍ବତନ ମହିଳା କଂଗ୍ରେସ ସଭାନେତ୍ରୀ ସସ୍ମିତା ବେହେରା ନିଯୁକ୍ତି ପାଇଛନ୍ତି । ନୂଆ କମିଟି ଗଠନ ନେଇ ପିସିସି ସଭାପତି ଭକ୍ତ ଦାସଙ୍କ ସୁପାରିସ ଆଧାରରେ ଅଖିଳ ଭାରତ କଂଗ୍ରେସ କମିଟି ସଭାପତି ମଲ୍ଲିକାର୍ଜ୍ଜୁନ ଖଡ଼ଗେ ମଞ୍ଜୁରୀ ଦେଇଥିବା ଏଆଇସିସି ସାଧାରଣ ସମ୍ପାଦକ ତଥା ସାଂସଦ କେ.ସି ବେଣୁଗୋପାଳ ଜଣାଇଛନ୍ତି । ତାରା ଓ ଭକ୍ତ ଦାସଙ୍କ ଯୋଡି ଓଡ଼ିଶାରେ କଂଗ୍ରେସ ସଂଗଠନକୁ ମଜବୁତ୍ କରିବ l
() ୮୦ ଦଶକରେ ଓଡିଶା କଂଗ୍ରେସ ରାଜନୀତିରେ ଚାଣକ୍ୟ ଥିଲେ ସ୍ବର୍ଗତ ବସନ୍ତ ବିଶ୍ଵାଳ l ସେତେବେଳେ ଶାସନ ବ୍ୟବସ୍ଥାରେ ଗୋଟେ ଚର୍ଚ୍ଚା ହୁଏ ଜାନକୀ ପଟନାୟକ ମୁଖ୍ୟମନ୍ତ୍ରୀ ହେଲେ ଚଳନ୍ତି ମୁଖ୍ୟମନ୍ତ୍ରୀ ଥିଲେ ବସନ୍ତ ବିଶ୍ଵାଳ l ପରବର୍ତ୍ତୀ ସମୟରେ ବସନ୍ତ ବିଶ୍ଵାଳଙ୍କ ଦୁଇ ପୁଅ ଚିରଞ୍ଜୀବ ବିଶ୍ଵାଳ ଓ ରଞ୍ଜୀବ ବିଶ୍ବାଳ କଂଗ୍ରେସ ରାଜନୀତିରେ ବେଶ ସକ୍ରିୟ ରହିଲେ l କଂଗ୍ରେସ ରାଜନୀତିରେ ବାପାଙ୍କ ଲିଗାସିକୁ ଦୁଇ ପୁଅ ରଞ୍ଜୀବ ଓ ଚିରଞ୍ଜୀବ ଆଗକୁ ନେଲେ l ରାଜ୍ୟସଭାକୁ ଗଲେ ରଞ୍ଜୀବ ଓ କଂଗ୍ରେସ ଟିକେଟରେ ନିର୍ବାଚନ ଲଢ଼ି ବିଧାୟକ ହେଲେ ଚିରଞ୍ଜୀବ ବିଶ୍ବାଳ l ୨୦୧୯ପରେ କିନ୍ତୁ ଦୁଇ ଭାଇ କଂଗ୍ରେସ ରାଜନୀତିରେ ସେତେଟା ସକ୍ରିୟ ଦେଖିବାକୁ ମିଳିଲାନି l ରଞ୍ଜୀବ ବିଶ୍ବାଳଙ୍କୁ ବର୍ଷ ବର୍ଷ ଧରି ଓଡ଼ିଶା କଂଗ୍ରେସ ରାଜନୀତିରେ ଦେଖିବାକୁ ମିଳୁନଥିଲା l ଚିରଞ୍ଜୀବ ବିଶ୍ବାଳ ଥାଇ ନଥିଲା ପରି ଲାଗୁଥିଲା l ଶେଷରେ କଂଗ୍ରେସ ଛାଡି ବିଜେଡିରେ ସାମିଲ ହେଲେ ଚିରଞ୍ଜୀବ l ହେଲେ ବିଜେଡିରେ ଚିରଞ୍ଜୀବ ବିଶ୍ବାଳଙ୍କୁ ସେମିତି କିଛି ଗୁରୁତ୍ବ ମିଳିଲାନି l ୨୦୨୪ ନିର୍ବାଚନରେ ଜଗତସିଂହପୁର ବିଧାନସଭାର ଆସନ ପାଇଁ ବିଜେଡି ଟିକେଟ ଆଶାୟୀ ଥିବା ଚିରଞ୍ଜୀବ ବିଶ୍ବାଳଙ୍କୁ ବିଜେଡି ଦଳୀୟ ଟିକେଟ ଦେଲା ନାହିଁ l ଯାହା ତାଙ୍କ ସମର୍ଥକମାନଙ୍କୁ ନିରାଶ କରିଥିଲା l ୨୪ ନିର୍ବାଚନରେ ବିଜେଡି ହାରିଲା l ଏହାପରେ ଚିରଞ୍ଜୀବ ବିଶ୍ବାଳଙ୍କ ସ୍ବପ୍ନ ସ୍ବପ୍ନରେ ରହିଗଲା l ୨୦୨୪ରେ ବିଜେଡି ଯଦି କ୍ଷମତାକୁ ଆସିଥାନ୍ତା ତେବେ ଚିରଞ୍ଜୀବ ବିଶ୍ବାଳ ରାଜ୍ୟସଭା ଯିବାର ସମ୍ଭାବନା ରହିଛି ବୋଲି ସେତେବେଳ ବିଜେଡି ରାଜନୀତିରେ ଚର୍ଚ୍ଚା ହେଉଥିଲା l ହେଲେ ସେ ଚର୍ଚ୍ଚା ବି ଚର୍ଚ୍ଚାରେ ରହିଗଲା l ଶେଷରେ ବିଜେଡି ସାଙ୍ଗଠନିକ ନିର୍ବାଚନ ପ୍ରକ୍ରିୟାରେ ବି ଚିରଞ୍ଜୀବ ବିଶ୍ଵାଳଙ୍କୁ କୌଣସି ଦାୟିତ୍ୱ ଦିଆଗଲା ନାହିଁ l ଯାହା ତାଙ୍କ ସମର୍ଥକମାନଙ୍କୁ ନିରାଶକୁ ଦୁଇ ଗୁଣିତ କରିଛି l ଠିକ୍ ଏତିକି ସମୟରେ କଂଗ୍ରେସ ଭବନରେ ହଠାତ୍ ରଞ୍ଜୀବ ବିଶ୍ବାଳ ଦେଖାଦେବା ଓ କଂଗ୍ରେସ ରାଜନୀତିରେ ସକ୍ରିୟ ହେବା ରଞ୍ଜୀବ ଓ ଚିରଞ୍ଜୀବଙ୍କ ରାଜନୈତିକ ଭବିଷ୍ୟତ ନେଇ ଚର୍ଚ୍ଚା ଆରମ୍ଭ ହୋଇଛି l ରଞ୍ଜୀବ ବିଶ୍ବାଳ କଂଗ୍ରେସରେ ସକ୍ରିୟ ହେବା ପରେ ଭାଇ ଚିରଞ୍ଜୀବ ବିଶ୍ଵାଳ କଂଗ୍ରେସକୁ ଫେରିବା ଚର୍ଚ୍ଚା ଆରମ୍ଭ ହୋଇଛି l ଭକ୍ତ ଦାସ ପିସିସି ସଭାପତି ହେବା ପରେ କଂଗ୍ରେସ ଛାଡିଥିବା ଚର୍ଚ୍ଚିତ ନେତାଙ୍କୁ ଦଳକୁ ଫେରାଇ ଆଣିବାକୁ ପ୍ରୟାସ କରିଛନ୍ତି l ତେବେ ରାଜନୀତି ସବୁବେଳେ ସ୍ଥିର ଓ ଚତୁର ଚିରଞ୍ଜୀବ ଚୁପ୍ ଚାପ ବସି ନିଜ ଭବିଷ୍ୟତ ପାଇଁ କି ରଣନୀତି ପ୍ରସ୍ତୁତ କରୁଛନ୍ତି ତାହାକୁ ଜଗତସିଂହପୁର ଜିଲ୍ଲାର ଭୋଟରମାନେ ଚାହିଁ ବସିଛନ୍ତି l
() ସୁଜିତ କୁମାର, ମମତା ମହନ୍ତ ପରେ ବିଜେଡି ସଭାପତି ନବୀନ ପଟ୍ଟନାୟକ ଙ୍କ ହାତ ଛାଡିଲେ ରାଜ୍ୟସଭା ସାଂସଦ ମୁନା ଖାଁ l ବେଶ କିଛି ଦିନର ନିରବତା ପରେ ପୁଣି ବିଜେଡି ରାଜନୀତିରେ ହଲଚଲ୍ ସୃଷ୍ଠି ହୋଇଛି l ଆଜି ସକାଳୁ ନିବାସରେ ପହଞ୍ଚି ବିଜେଡି ସାଂସଦ ମୁନା ଖାନ୍ ଇସ୍ତଫା ଦେଇଛନ୍ତି । ସଂଖ୍ୟାଲଘୁ ସେଲ୍ କମିଟିରୁ ମୁନା ଖାନ୍ ଇସ୍ତଫା ଦେଇଥିବା ଚର୍ଚ୍ଚା ଜୋର ଧରିଛି। ସୁଜିତ ଓ ମମତାଙ୍କ ପରି ମୁନା ଖାଁ ପରବର୍ତ୍ତୀ ସମୟରେ ବିଜେଡି ଛାଡି ପାରନ୍ତି ବୋଲି ରାଜନୈତିକ ସମୀକ୍ଷକମାନେ ମତ ରଖିଛନ୍ତି l ଗତ ୫ ତାରିଖରେ ଗଠନ ହୋଇଥିଲା ସଂଖ୍ୟାଲଘୁ ସଂପ୍ରଦାୟ କମିଟିକୁ ନେଇ ମୁନା ଖାଁ ଅସନ୍ତୋଷ ଥିଲେ l । ଦିଲ୍ଲୀପ ତିର୍କୀଙ୍କୁ ସଂଖ୍ୟାଲଘୁ କମିଟିର ଆବାହକ ଦାୟିତ୍ୱ ଦିଆଯାଇଥିବା ବେଳେ ତାଙ୍କୁ ଦଳ ଅଣଦେଖା କରିଥିବା ଚର୍ଚ୍ଚା ହେଉଛି l ସେଥିପାଇଁ ସେ ପ୍ରଥମେ ପଦ ଓ ପରେ ବିଜେଡିକୁ ବାଏ ବାଏ କରିବେ ବୋଲି ଚର୍ଚ୍ଚା ହେଉଛି l
ଧର୍ମେନ୍ଦ୍ର ପ୍ରଧାନ l ଓଡିଶା ରାଜନୀତିର ବଡ ଚେହେରା l ୨୦୧୯ ପରଠୁ ସେ ଓଡିଶା ବିଜେପିର ପୋଷ୍ଟର ବୟ l ତାଙ୍କର ସାଙ୍ଗଠନିକ ଦକ୍ଷତା ଓ ରାଜନୈତିକ ଋଣକୌଶଳ ଯୋଗୁଁ ଓଡ଼ିଶାରେ ବିଜେପିର ଶକ୍ତି ବୃଦ୍ଧି ପାଇବା ସହ ୨୦୨୪ ରେ ବିଜେପି ଏକୁଟିଆ ଶାସନ ଡୋରୀ ଧରିଲା l ବିଜେପି ଓଡ଼ିଶାରେ ଏକାକୀ ସରକାର ଗଠନ କରିବା ପଛରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକା କିଛି କମ୍ ନୁହେଁ l ୨୦୧୯ ସାଧାରଣ ନିର୍ବାଚନରେ ଧର୍ମେନ୍ଦ୍ର ପ୍ରଧାନ ଯେଉଁ ରିଚାଜ୍ୟ କରିଥିଲେ ଓଡ଼ିଶା ବିଜେପି ସଙ୍ଗଠନକୁ ତୃଣମୂଳ ସ୍ତରରୁ ତାହା ୨୦୨୪ରେ ପାୱାର ପ୍ଲସ ଭାବେ କାମ ଦେଲା ବିଜେପିକୁ ଓଡ଼ିଶାରେ ଏକାକୀ ସରକାର ଗଢିବାରେ l 2019 ଲୋକସଭା ନିର୍ବାଚନରେ ବିଜେପି ମୋଟ ଭୋଟର 38.4 ପ୍ରତିଶତ ଥିବା ବେଳେ 2014 ନିର୍ବାଚନରେ 21.9 ପ୍ରତିଶତ ଥିଲା l ସେହିପରି ବିଧାନସଭା ନିର୍ବାଚନରେ ଦଳ 2019 ରେ ମୋଟ ଭୋଟର 32.5 ପ୍ରତିଶତ ହାସଲ କରିଥିବା ବେଳେ 2014 ତାହା 18.2 ପ୍ରତିଶତଥିଲା l ୧୮ ପ୍ରତିଶତ ଭୋଟ ୨୦୨୪ରେ ୪୦ ପ୍ରତିଶତରେ ପହଞ୍ଚିବାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପରିଶ୍ରମକୁ ପୁରା ଓଡିଶା ମାନିଛି l ଖାସ ସେଥିପାଇଁ ସମସ୍ତେ ଭାବୁଥିଲେ ବିଜେପିର ମୁଖ୍ୟମନ୍ତ୍ରୀ ଚେହେରା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ l ହେଲେ ସମୟଚକ୍ରରେ ସବୁକିଛି ବଦଳିଗଲା l ଓଡ଼ିଶାରେ ବିଜେପି ସରକାର ଗଠନର ସମୟ ଅବଧି ଯେତେ ଯେତେ ବଢ଼ିବାରେ ଲାଗିଛି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଓଡ଼ିଶା ରାଜନୀତିରେ ସକ୍ରିୟତା ସେତେ କମିବାରେ ଲାଗିଛି l ପାୱାର କରିଡରରୁ ଚା ଖଟି ଯାଏ ଚର୍ଚ୍ଚା ହେଉଛି ଓଡିଶାରେ ବିଜେପି ସରକାରରେ ଧର୍ମେନ୍ଦ୍ର ପ୍ରଧାନ ଦବଦବା ଆଉ ନାହିଁ l ଏକ ରକମର କେନ୍ଦ୍ରମନ୍ତ୍ରୀଙ୍କୁ ଓଡିଶାରେ ଶାସନରୁ ଦୂରେଇ ରଖିଛି ବିଜେପି l ବିଜେପିର ଶୀର୍ଷ ନେତୃତ୍ୱ କାହିଁକି ଏପରି ନିଷ୍ପତ୍ତି ନେଲେ ତାହା କାହାକୁ ଜଣା ନାହିଁ l ହେଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ହଠାତ୍ ଓଡିଶା ରାଜନୀତିରୁ ବ୍ଲାକଆଉଟ୍ ହେବା ରହସ୍ୟ କଣ ତାହାକୁ ନେଇ ଏବେ ରାଜନୈତିକ ମହଲରେ ଜୋରଦାର ଚର୍ଚ୍ଚା l ଅନେକ ରାଜନୈତିକ ସମୀକ୍ଷକଙ୍କ ମତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିର୍ଦ୍ଦିଷ୍ଟ ଗୋଷ୍ଠୀ ରହିଥିବାରୁ ବିଜେପି ଶୀର୍ଷ ନେତୃତ୍ୱ ଏହାକୁ ସହଜରେ ହଜମ କରିପାରିନାହାନ୍ତି l ଏପରିକି ଦୁଇଟି ସାଧାରଣ ନିର୍ବାଚନରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଦଳ ସବୁ କ୍ଷମତା ଦେଇଥିଲେ ମଧ୍ୟ ଓଡ଼ିଶାରେ ବିଜେପି ୨୦୧୪ ଓ ୨୦୧୯ରେ ଆଶାଧିକ ସଫଳତା ପାଇଲା ନାହିଁ l ତେଣୁ ୨୦୨୪ ପାଇଁ ଦଳ କେନ୍ଦ୍ରମନ୍ତ୍ରୀଙ୍କୁ ସାଙ୍ଗରେ ନେଇ ଭିନ୍ନ ରଣନୀତି ଆପଣାଇଲା l ଏଥିରେ ଦଳ ସଫଳ ହେଲା ଓ ଏକାକୀ ଶାସନ ଡୋରୀ ଧରିଲା l ହୁଏତ ଏ କାରଣ ଯୋଗୁଁ କେନ୍ଦ୍ରମନ୍ତ୍ରୀଙ୍କ ପାୱାରକୁ ଓଡିଶା ରାଜନୀତିରେ ଟିକିଏ କମାଇ ଦିଆଯାଇଛି l ସେ ଯାହା ବି ଚର୍ଚ୍ଚା ହେଉ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିନା ଓଡ଼ିଶାରେ ବିଜେପି ଶକ୍ତିଶାଳୀ ହୋଇ ତିଷ୍ଠି ରହିବା ମୁସ୍କିଲ ପାଠ l ହେଲେ ବେଶ କିଛି ମାସ ହେବ ବିଜେପି ସଂଗଠନ ଓ ସରକାର ଯେମିତି ଚାଲିଛି ଏଥିରୁ ସ୍ପଷ୍ଟ ସଂକେତ ମିଳୁଛି କେନ୍ଦ୍ରମନ୍ତ୍ରୀ ବିଜେପି ରାଜନୀତିରୁ ବ୍ଲାକଆଉଟ ହୋଇଛନ୍ତି l ତାହା କେତେ ସତ କେତେ ମିଛ, ବିଜେପି ରାଜନୀତିକୁ ଅତି ନିକଟରୁ ଦେଖୁଥିବା ଲୋକେ ବିଚାର କରିବେ l
ଅରୁଣ ସାହୁ l ବରିଷ୍ଠ ବିଜେଡି ବିଧାୟକ l ରାଜନେତା, ସାହିତ୍ୟକ , ଉପସ୍ଥାପକ(ଆଙ୍କର) ଆଦି କେତେ କଣ ତାଙ୍କ ନାଁ ଆଗରେ ଲେଖାଯାଏ l ରାଜନେତା ଭାବେ ସବୁବେଳେ କିଛି ନୂଆ କରି ସେ ଚର୍ଚ୍ଚାରେ ରୁହନ୍ତି l ବେଶ କେହି ମାସର ନିରବତା ପରେ ସୋସିଆଲ ମିଡିଆ ଟ୍ରାକରେ ପୁଣି ସକ୍ରିୟ ହୋଇଛନ୍ତି ବିଜେଡିର ଏହି ବରିଷ୍ଠ ବିଧାୟକ l ଭାରତ ପାକିସ୍ତାନ ଯୁଦ୍ଧକୁ ନେଇ ପୁରା ଦେଶରେ ଯେତେବେଳେ ଏ ପ୍ରସଙ୍ଗକୁ ନେଇ ଚର୍ଚ୍ଚା ଉଷ୍ମ ରହିଛି ସେତେବେଳେ ଲୋକଙ୍କ ନେତା ଅରୁଣ ସାହୁ କିପରି ଚୁପ୍ ରହିବେ l ଗଣମାଧ୍ୟମରେ ଯେତେ ବୟାନ ରଖିଲେ ବି ତାଙ୍କ ମନ ସନ୍ତୁଷ୍ଟ ନୁହେଁ l ତେଣୁ ଯୁଦ୍ଧକୁ ନେଇ ମନର କଥାକୁ ନିଜ ସୋସିଆଲ ମିଡିଆରେ ଲମ୍ବା ମତାମତ ଟିଏ ରହିଛନ୍ତି ବିଧାୟକ ଅରୁଣ ସାହୁ l ଯୁଦ୍ଧ କାହିଁକି ହୁଏ, ହେଲେ କଣ ଭଲ ଓ କଣ ଖରାପ ତାହା ବି ସେ ଓଡିଶାବାସୀଙ୍କୁ ବୁଝେଇବାକୁ ଚାହିଁଛନ୍ତି l ଏହା ସହ ଏକାଠି ହୋଇ ଯୁଦ୍ଧ ଲାଗିବାର ଶକ୍ତି କଣ ତାହା ବି କହିଛନ୍ତି l ପ୍ରେସ ବାର୍ତ୍ତା ସେ କହିଛନ୍ତି ଯେ ଆତଙ୍କବାଦୀ ମାନେ ଭାରତରେ ଧର୍ମ ଭେଦଭାବକୁ ନେଇ ବିରାଟ ଷଡଯନ୍ତ୍ର କରିଥିଲେ l ସେଥିପାଇଁ ସେମାନେ ୨୬ଜଣ ପର୍ଯ୍ୟଟକଙ୍କୁ ଧର୍ମ ପ୍ରଚାରୀ ହତ୍ୟା କରିଥିଲେ l ଏହାର ଜବାବ ଭାରତୀୟ ସେନା ଦେଇଛି l ଏଥିପାଇଁ ଭାରତର ଯବାନ ମାନଙ୍କୁ ଦେଶ କୋଟିକୋଟି ସଲାମ୍ ଜଣାଉଛି l ଭାରତ ବର୍ଷ ଏକ ହୋଇ ଲଢ଼ିଲେ ବିଶ୍ୱର କୌଣସି ଶକ୍ତିନାହିଁ ଯାହା ପାଖରେ ଭାରତ ବର୍ଷ ମୁଣ୍ଡ ନୂଆଇବ l ଭାରତ ବର୍ଷର ଉନ୍ନତି ଓ ପ୍ରଗତି ପାଇଁ ସଭିଏ ଏକ ହୋଇ କାମ କରିବାକୁ ସେ ଆହ୍ବାନ ଦେଇଛନ୍ତି l ପ୍ରାୟ ଏକ ବର୍ଷର ନିରବତା ପରେ ଅରୁଣଙ୍କ ସୋସିଆଲ ମିଡିଆରେ ମତ ରଖିବାକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି l ଆଗକୁ ରାଜ୍ୟର ବହୁ ବଡ ବଡ ପ୍ରସଙ୍ଗକୁ ସୋସିଆଲ ମିଡିଆରେ ଉଠାଇ ଡବଲ ଇଞ୍ଜିନ୍ ସରକାରଙ୍କୁ ପ୍ରଶ୍ନ କରିବାକୁ ମୂଳଦୁଆ ପକାଇଲେ ବିଜେଡିର ଚତୁର ବିଧାୟକ ଅରୁଣ ସାହୁ l ଯୁଦ୍ଧ ପ୍ରେସ ବାର୍ତ୍ତାରୁ ଏହି ସଙ୍କେତ ଦେଇଛନ୍ତି l
ଝୁଣ୍ଟି ପଡିଲେ ପାଟିରୁ ଆପେ ଆପେ ବାହାରି ପଡେ ମା ଲୋ। ଯେତେବେଳେ ମଣିଷ ପୁରା ନିରାଶ କି ଦୁଃଖରେ ଥାଏ ମନ ପ୍ରଥମେ ଖୋଜେ ମାକୁ। କାରଣ ମା ସବୁବେଳେ ଶାହା। ପିଲାର ଚିନ୍ତା ତାକୁ ସବୁବେଳେ ଘାରିଥାଏ। ମା ଆଖିରେ ତା ପୁଅ ଓ ଝିଅ ସବୁବେଳେ ଛୁଆଁ। ନିଜେ ନଖାଇ ଯିଏ ଖାଇବା ଖୁଆଇ ଥାଏ, ଦୁଃଖରେ ଥାଇ ମଧ୍ୟ ଯିଏ ହସିପାରେ, ସଂସାରର ସବୁ ଅଦୃଶ୍ୟ ବୋଝକୁ ଯିଏ ନିଜ ମୁଣ୍ଡରେ ବୋହିପାରେ , ଅନ୍ୟକୁ ନିଦରେ ଶୋଇବା ପାଇଁ ଯିଏ ରାତି ରାତି ଅନିଦ୍ରା ହୋଇପାରେ, ଦୁଃଖ, ଯନ୍ତ୍ରଣା ଭିତରେ ରହି ଯିଏ ଖୁସି ଥାଏ, ସବୁ ନା ରେ ଯାହାର ହଁ ଥାଏ, ନିଜେ କଷ୍ଟରେ ରହି ଯିଏ ଅନ୍ୟର କଷ୍ଟ ଦୂର କରେ ସେ ହେଉଛି ମା। ସବୁ ଜାଣି ଯିଏ ପିଲାର ସଦା ସର୍ବଦା ମଙ୍ଗଳ ଚାହେଁ ସେ ମା। ଘରେ ସମସ୍ତେ ଖାଇ ସାରିବା ପରେ ଖାଏ, ସମସ୍ତେ ଶୋଇ ସାରିବା ପରେ ଶୁଏ, ପୁଣି ସକାଳୁ ସମସ୍ତେ ଉଠିବା ପୂର୍ବରୁ ଉଠେ , ଜୀବନର ଶେଷ ନିଃଶ୍ୱାସ ଯାଏ ଯିଏ ଘର ଓ ପିଲାଛୁଆଁଙ୍କ ଚିନ୍ତାରେ ରହେ ସେ ହେଉଛି ମା। ସେଥିପାଇଁ କଥାରେ ଅଛି ” *ମା ଅଛି ଯାହାର କି ସୁଖ ତାହାର”* । ସେ ସବୁ ବୁଝେ, ସବୁ ଜାଣେ ତଥାପି ପିଲାକୁ କେବେ ଅଭାବ କି ଅସୁବିଧା ଜଣାଇବା ପାଇଁ ଦିଏ ନାହିଁ । ତାହା ପାଖରେ ସବୁବେଳେ ଥାଏ ଭଳ ପାଇବା ଓ ଆଶିର୍ବାଦ। ମା କେତେବେଳେ ଜନ୍ମଦାତ୍ରୀ ତ କେତେବେଳେ ପାଳନ କର୍ତ୍ତା । ୧୦ ମାସ ୧୦ଦିନ ଗର୍ଭରେ ଧରି ଯିଏ ଯାହାର ରକ୍ତ ଦେଇ ଆମକୁ ଏ ସଂସାରକୁ ଆଣେ ସେ ପରା ମା। ମା କେବେ ବି କାହାକୁ କଷ୍ଟ ଦେଇ ପାରେନା। କାରଣ ସେ ସବୁ କଷ୍ଟ ଓ ବୋଝ ନେବା ପାଇଁ ସଂସାରକୁ ଆସେ। ମା ଧରିତ୍ରୀ ପୁରା ପୁଥିବୀର ବୋଝକୁ ମୁଣ୍ଡାଇ ନେଉଥିବା ବେଳେ ଏ ସୁନ୍ଦର ସମାଜର ବୋଝକୁ ମା ପା ମୁଣ୍ଡେଇଛି। ମା ରୂପ ଗୋଟେ ନା କେବଳ ଅନେକ। ସବୁଠି ସେ ପିଲାଙ୍କ ପାଇଁ ଗୋଟେ ମା କେବେବି ନିଜ ସନ୍ତାନର ଅମଙ୍ଗଳ କରିପାରେନା। ସେ ଜନ୍ମଦେଇଥିବା ମା ହେଉ କି ମା ରୂପରେ ଆମକୁ ନିଜ ଠାରୁ ଅଧିକ ଭଲ ପାଉଥିବା ମା । ମା ସବୁବେଳେ ସନ୍ଧେହ ଓ ଅଭିଯୋଗ ର ଉର୍ଦ୍ଧରେ । ସେ କଥା ଭାବିବା ବି ପାପ l କାରଣ କଷ୍ଟ ନୁହେଁ କଷ୍ଟ ଲାଘବ ପାଇଁ ସେ ଭଗବାନ ରୂପରେ ସଂସାରକୁ ଆସିଛି । ଆଜିର ଆଧୁନିକ ଯୁଗରେ ମାତୃ ଦିବସରେ କେବଳ ବହୁ ଲୋକଙ୍କ ମାଙ୍କ ପ୍ରତି ଥିବା ଭଲ ପାଇବା ଝରି ପଡେ। ହେଲେ ଗୋଟେ ଦିନରେ ସୀମିତ ନୁହେଁ ମା ଦିବସ । ମା ପାଇଁ ଜୀବନ ସାରା ଏମିତି ନିସ୍ବାର୍ଥପର ଭଲ ପାଇବା ସବୁ ସନ୍ତାନ ପାଖରେ ରହିବା ନିହାତି ଦରକାର । କାରଣ ମା ଶବ୍ଦରେ ନଥାଏ ପର କି ଆପଣାର । ଚାଲନ୍ତୁ ଭଗବାନ ରୂପୀ କରୁଣାମୟୀ, ଦୟାମୟୀ, ଦୟା ସାଗର ପରି ଆମ ମା କୁ ପୂଜା କରିବା ଓ ମା ର କିଛି ଟା କଷ୍ଟକୁ ନିଜେ ନେବାକୁ ଚେଷ୍ଟା କରିବା। ତାହାହିଁ ଆଜିର ଦିନରେ ପ୍ରତ୍ୟେକ ମା ଚାହେଁ । କାରଣ ସେ ସବୁବେଳେ ଚାହେଁ ମୋ ପୁଅ ଓ ମୋ ଝିଅ, ମୋ ବୋହୁ, ମୋ ନାତି, ମୋ ନାତୁଣୀ ଓ ମୋ ସ୍ବାମୀ ସବୁବେଳେ ଖୁସିରେ ରୁହନ୍ତୁ ଓ ତାଙ୍କର ସବୁ ଦୁଃଖ ଓ କଷ୍ଟ ମତେ ଦିଅ ପ୍ରଭୁ । ଏ ଭଲ ପାଇବା ଓ ଭାବନା ଆଉ କାହା ପାଖରେ ଅଛି । ମା’ଲୋ ତୋ ପାଇଁ ମୁଁ ଆଜି ଏ ସଂସାରରେ ଦେଖୁଛି। ତେଣୁ ତୋ ନି ସ୍ୱାର୍ଥ ଭଲ ପାଇବା ଏ ଦୁନିଆରେ ଆଉ କାହା ପାଖେ ନାହିଁ। ମାତୃ ଦିବସରେ ସବୁ ମାଙ୍କୁ ମୋର କୋଟି କୋଟି ପ୍ରଣାମ।
ରାଜନେତାମାନେ ସେମାନଙ୍କ ବ୍ୟକ୍ତିତ୍ଵ ଓ କାର୍ଯ୍ୟଶୈଳୀକୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି l ନୀତି, ନିଷ୍ପତି ଓ ଜନସେବା ମନବୃତି ସେମାନଙ୍କୁ ଲୋକପ୍ରିୟ କରିଥାଏ l ତା ଭିତରୁ କିଏ ଭିଡ ଭିତରେ ନେତା ସାଜିଥାନ୍ତି ଯେ ଆଉ କିଏ ନିଜର ବ୍ୟକ୍ତିତ୍ଵ ପାଇଁ ଲୋକଙ୍କ ଠାରୁ ଆଦର ପାଆନ୍ତି l ନିର୍ବାଚନ ରାଜନୀତିରେ କିଏ କେତେ ସଫଳ ଓ କିଏ କେତେ ବିଫଳ ତାହା ସେମାନଙ୍କ ରାଜନୀତି ସଫଳତାର ଏକମାତ୍ର ମାନଦଣ୍ଡ ନୁହେଁ l ସାଢେ଼ଚାରି କୋଟି ଓଡିଆଙ୍କ ପାଖରେ ଓଡ଼ିଶାର ଏମିତି କିଛି ଚର୍ଚ୍ଚିତ ରାଜନେତା ନେଇ ଆମର ଏହି ରିପୋର୍ଟ l
ନବୀନ ପଟ୍ଟନାୟକ: ୧୯୯୭ରେ ଓଡିଶାର ବରପୁତ୍ର ବିଜୁ ପଟ୍ଟନାୟକଙ୍କ ଦେହାନ୍ତ ପରେ ଓଡିଶା ରାଜନୀତିରେ ନବୀନ ପଟ୍ଟନାୟକ ଏଣ୍ଟ୍ରି କଲେ l ସାଂସଦ, କେନ୍ଦ୍ରମନ୍ତ୍ରୀ ଆଉ ୨୦୦୦ ମହିହାରୁ ଓଡିଶା ଶାସନର ଡୋରି ଧରି ୨୪ ବର୍ଷ ମୁଖ୍ୟମନ୍ତ୍ରୀ ରହି ଓଡିଶା ଲୋକଙ୍କ ହୃଦୟରେ ସ୍ବତନ୍ତ୍ର ସ୍ଥାନ ଅଧିକାର କରିଛନ୍ତି l କଥା କମ କାମ ଅଧିକ ତାଙ୍କର ପରିଚୟ l ଓଡିଶାର ସର୍ବାଧିକ ଲୋକପ୍ରିୟ ନେତାଭାବେ ସେ ଉଭା ହୋଇଛନ୍ତି l ରାଜନୀତିରେ ଜନସେବାକୁ ମୂଳମନ୍ତ୍ର କରି ସେ କାମ କରିଛନ୍ତି l ବେଶୀ ଲୋକଙ୍କ ସହ ତାଙ୍କର ସିଧାସଳଖ ଆଲୋଚନା ନଥିଲେ ମଧ୍ୟ ସବୁବେଳେ ଲୋକଙ୍କ ଦୁଃଖ ଓ ସୁଖର ସାଥୀ ହୁଅନ୍ତି ନିଜ ଷ୍ଟାଇଲରେ l ଲୋକଂକ ନେତା ସେ l ସବୁବେଳେ ସାଧାରଣ ଜନତା କିପରି ଖୁସିରେ ରହିବେ ସେ ଚିନ୍ତା ତାଙ୍କୁ ଘାରେ l ସମାଲୋଚନା, ବିତର୍କ ଠାରୁ ଦୂରରେ ରହି ଜନସେବା କରିହୁଏ ତାହା ସେ ପ୍ରମାଣିତ କରିଛନ୍ତି ଏଯାଏ l ଏବେ ବିରୋଧୀ ଦଳର ନେତାଭାବେ ଲୋକଙ୍କ ସ୍ଵର ସାଜିଛନ୍ତି ନବୀନ l
ସୁର ରାଉତରାୟ: ଓଡିଶାର ଘରେ ଘରେ ଛୋଟ ପିଲାଙ୍କ ଠାରୁ ବୁଢ଼ା ଯାଏ, ଯିଏ ସଭିଙ୍କ ଭାଇ ସେ ହେଉଛନ୍ତି ବରିଷ୍ଠ କଂଗ୍ରେସ୍ ନେତା ସୁର ଭାଈ l କଂଗ୍ରେସ ରାଜନୀତିରେ ୫୦ ବର୍ଷର ସେ ଜଣେ ବରିଷ୍ଠ ରାଜନେତା l ୬ଥର ବିଧାୟକ ହୋଇ ସେ ନିଜର କାର୍ଯ୍ୟଶୈଳୀ ପାଇଁ ବେଶ ଲୋକପ୍ରିୟ l ନିର୍ବାଚନ ଜିତନ୍ତୁ କି ହାରନ୍ତୁ ତାହା ସୁର ରାଉତରାୟଙ୍କ ପାଖରେ କିଛି ଫରକ ପକାଏ ନାହିଁ l କାରଣ ସକାଳ ୬ରୁ ରାତି ୯ ଯାଏ ସେ ସବୁବେଳେ ଲୋକଙ୍କ ଗ୍ରହଣରେ ରହିବାକୁ ଭଲ ପାଆନ୍ତି l ୮୦ ବର୍ଷ ପରେ ବି ସେ ଫିଟ୍ ଓ ଯୁବକ ପରି ତତପର l ସବୁବେଳେ ଲୋକଙ୍କ କାମ କରିବାକୁ ଭଲ ପାଆନ୍ତି ସୁର ଭାଈ l ଯେମିତି ଜନସେବା ପାଇଁ ତାଙ୍କର ଜନ୍ମ l ପୁରା ଓଡ଼ିଶାରେ ସୁର ରାଉତରାୟ ଯୁଆଡେ ଯିବେ ସାଧାରଣ ଲୋକ ତାଙ୍କ ପାଖରେ ଭିଡ ଜମାନ୍ତି l
ତାରା ପ୍ରସାଦ ବାହିନୀପତି : ତାରା ବାହିନୀପତି l ନିଜର ଷ୍ଟାଇଲ ଓ କଥା ପାଇଁ ଓଡିଶା ରାଜନୀତିରେ ତାଙ୍କର ସ୍ବତନ୍ତ୍ର ସ୍ଥାନ ରହିଛି l ଜୟପୁରରୁ ଭୁବନେଶ୍ଵର, ବ୍ରହ୍ମପୁର ରୁ ବାଲେଶ୍ଵର ଯାଏ ତାଙ୍କର ଲୋକପ୍ରିୟତା କିଛି କମ ନୁହେଁ l ମଜା, ମସ୍ତି ଓ ଲୋକଙ୍କୁ ସାହାଯ୍ୟ ଓ ସହଯୋଗ କରିବାର ରାଜନେତା ସେ l ୫ଥର ବିଧାୟକ ଭାବେ ପ୍ରାୟ ୪୦ ବର୍ଷ ହେବ ଓଡିଶା ରାଜନୀତି ସେ ଜଣେ ଚର୍ଚ୍ଚିତ ରାଜନେତା ଭାବେ ପରିଚିତ ପୁରା ଓଡ଼ିଶାରେ l ଜଣେ ମିଳାପି ରାଜନେତା ତାରା ପ୍ରସାଦ ବାହିନୀପତି l
ବିଶ୍ବଭୂଷଣ ହରିଚନ୍ଦନ : ବିଶ୍ଵ ଭୂଷଣ ହରିଚନ୍ଦନ l ଓଡିଶା ରାଜନୀତିରେ ଜଣେ ଚର୍ଚ୍ଚିତ ରାଜନେତା l ତାଙ୍କର ବ୍ୟକ୍ତିତ୍ଵ ଯେମିତି, ମଣିଷ ବି ସେମିତି ସେ l ୬୦ବର୍ଷରୁ ଉର୍ଦ୍ଧ ସମୟ ସକ୍ରିୟ ରାଜନୀତିରେ ସେ ତାଙ୍କର ନୀତି ଓ ନିଷ୍ପତି ପାଇଁ ସବୁବେଳେ ଓଡ଼ିଶା ଲୋକଙ୍କ ହୃଦୟରେ ରହିଛନ୍ତି l ଅତିଥି ଦେବ ଭବ ଅକ୍ଷର ଅକ୍ଷରେ ପାଳନ କରିବାରେ ତାଙ୍କର ଏକ ସ୍ବତନ୍ତ୍ର ପରିଚୟ ରହିଛି l ଯିଏ ତାଙ୍କ ସହ ମିଶିଛି ସେ ଜାଣିଛି l ସବୁବେଳେ ଓଡିଶାର ସ୍ବାର୍ଥ ପାଇଁ ସେ ଲଢ଼େଇ କରିଛନ୍ତି l
ଧର୍ମେନ୍ଦ୍ର ପ୍ରଧାନ: ଧର୍ମେନ୍ଦ୍ର ପ୍ରଧାନ l ନବୀନ ପଟ୍ଟନାୟକ ଙ୍କ ପରେ ଓଡ଼ିଶା ରାଜନୀତିରେ ସବୁଠାରୁ ଅଧିକ ଚର୍ଚ୍ଚିତ ରାଜନେତା l ନିଜର ଦକ୍ଷତା ଓ ପରିଶ୍ରମ ଯୋଗୁଁ ବିଜୁ ପଟ୍ଟନାୟକଙ୍କ ପରେ ଯଦି କେହି ଓଡିଆ ରାଜନେତା ଦିଲ୍ଲୀ ଦରବାରରେ ଲମ୍ବା ସମୟ ଧରି ଦେଶର ରଣନୀତିରେ ନିଜର ଦବଦବା ରଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ l କିଏ ମାନୁ ବା ନମାନୁ ସେ ଓଡିଶା ବିଜେପିର ପୋଷ୍ଟର ବୟ l ଆଜି ଯଦି ଓଡ଼ିଶାରେ ବିଜେପି ଏକାକୀ ସରକାର ଗଠନ କରିବାରେ ସଫଳ ହୋଇଛି ସେଥିରେ ଧର୍ମେନ୍ଦ୍ରଙ୍କ ପରିଶ୍ରମ ସର୍ବାଧିକ l ପୂର୍ବ ଅପେକ୍ଷା ଧୀରେ ଧୀରେ ସେ ସରଳ ହେବା ତାଙ୍କୁ ଏବେ ଓଡ଼ିଶାବାସୀଙ୍କ ପସନ୍ଦର ନେତା ସାଜିଛନ୍ତି l
ପ୍ରଣବ ପ୍ରକାଶ ଦାସ : ଲିଗାସୀ ରାଜନୀତିରୁ ଓଡ଼ିଶା ରାଜନୀତିରେ ଏଣ୍ଟ୍ରିମାରି ଯେଉଁ କିଛି ଯୁବନେତାମାନେ ଓଡିଶାରେ ସବୁଠାରୁ ଲୋକପ୍ରିୟ ରାଜନେତା ହୋଇଛନ୍ତି ସେମାନଙ୍କ ଭିତରୁ ପ୍ରଣବ ପ୍ରକାଶ ଦାସ ଅନ୍ୟତମ l ଓଡ଼ିଶାର ସାଲିସ ବିହୀନ ରାଜନେତା ସ୍ବର୍ଗତ ଅଶୋକ ଦାସଙ୍କ ନନ୍ଦନ ହେଉଛନ୍ତି ପ୍ରଣବ l ୩ଥର ବିଧାୟକ ଓ ୨୫ ବର୍ଷ ରାଜନୀତି କ୍ୟାରିୟର ଭିତରେ ସେ ଓଡିଶାର ଯୁବମାନସର ପ୍ରତୀକ ସାଜିଛନ୍ତି l ପଦ ପଦବୀ ଠାରୁ ଦୂରରେ ରହି ଦଳୀୟ ରାଜନୀତିରେ କିପରି ପାୱାର ଫୁଲ ନେତା ହେବାକୁ ପଡେ ତାହା ସେ ପ୍ରମାଣିତ କରିଛନ୍ତି l ନେତାଙ୍କ ପ୍ରତି ଆନୁଗତ୍ୟ ଓ କଠିନ ପରିଶ୍ରମ ଫଳରେ ସେ ଆଜି ଓଡ଼ିଶାରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି l ପୁରା ଓଡ଼ିଶାରେ ରହିଛି ତାଙ୍କର ସଙ୍ଗଠନ l ଜଣେ ଯୁବ ନେତା ଭାବେ ଓଡିଶାରେ ବେଶ ଲୋକପ୍ରିୟ ପ୍ରଣବ ପ୍ରକାଶ ଦାସ l ସାହସୀ ଓ ପରିଶ୍ରମ ଓ ଜନସେବା ତାଙ୍କୁ ଓଡିଶା ରାଜନୀତିରେ ଲୋକପ୍ରିୟ ନେତା କରିଛି l
ଅରୁଣ ସାହୁ: ଛାତ୍ର ରାଜନୀତିରୁ ଆସି ଓଡିଶା ରାଜନୀତିରେ ଲମ୍ବା ସମୟ ଧରି ଦବଦବା ଜାରି ରଖିଥିବା ରାଜନେତା ମଧ୍ୟରୁ ବିଜେଡିର ବରିଷ୍ଠ ବିଧାୟକ ଅରୁଣ ସାହୁ ଅନ୍ୟତମ l ଓଡ଼ିଶା ରାଜନୀତିରେ ଜଣେ ମେଳାପି ମଣିଷ ଅରୁଣ l ସମୟ ଯାଆ ଥାଉ, ନୀତି ଓ ନିଷ୍ପତ୍ତି ନେବାରେ ସେ ଯେମିତି କି ସେମିତି l ବିଧାୟକ ଥିଲା ବେଳେ ଯେମିତି ମନ୍ତ୍ରୀ ବେଳେ ବି ସେମିତି l ଲୋକଂକ ସହ ରହି ସେମାନଙ୍କ ମନର କଥା ବୁଝିବାରେ ସେ ମାହିର l ଚତୁରତା ସହ ସବୁ ସମୟକୁ କିପରି ମୁକାବିଲା କରିହେବ ସେଥିରେ ସେ ସିଦ୍ଧହସ୍ତ l
ପ୍ରଭାତ ବିଶ୍ଵାଳ : ସବୁବେଳେ ଲୋକଙ୍କ କାମ କରିବାକୁ ଯେଉଁ କେତେ ନେତା ୨୪ ଘଣ୍ଟା ପରିଶ୍ରମ କରିବାକୁ ଭଲ ପାଆନ୍ତି ସେମାନଙ୍କ ମଧ୍ୟରୁ ପୂର୍ବତନ ବିଧାୟକ ପ୍ରଭାତ ବିଶ୍ଵାଳ ଅନ୍ୟତମ l ନିଜ ଶକ୍ତି ଅନୁସାରେ ସବୁବେଳେ ଲୋକଙ୍କୁ ବିନା ସ୍ବାର୍ଥରେ ସହଯୋଗ କରିବାକୁ ସେ ଆଗେଇ ଆସନ୍ତି l ରଣନୀତି କେବଳ କ୍ଷମତା ପାଇଁ କରାଯାଏ ତାହା ପ୍ରଭାତ ବିଶ୍ଵାଳ କ୍ଷେତ୍ରରେ କିଛି ଅର୍ଥ ରଖେ ନାହିଁ l ଜଣେ ଦୃଢ ସଂଗଠକ ଭାବେ ସେ କଟକ ଜିଲ୍ଲାରେ ପରିଚିତ l
ମହମ୍ମଦ ମୋକିମ : ମହମ୍ମଦ ମୋକିମ l ଭାଇଚାରା ନେତାର ବଡ ପ୍ରତୀକ ସେ l ରାଜନୀତିରେ ଯେତେ ସଫଳ ନୁହେଁ, ରାଜନେତା ଭାବେ ଲୋକଙ୍କ ପାଖରେ ସେତେ ଆଦର ରହିଛି ତାଙ୍କର l ତାଙ୍କର ବ୍ୟକ୍ତିତ୍ଵ ଓ କାର୍ଯ୍ୟଶୈଳୀ ଆଜି ତାଙ୍କୁ ଅନ୍ୟ ରାଜନେତାଙ୍କ ଠାରୁ ଟିକେ ଭିନ୍ନ ପରିଚୟ ଦେଇଛି ଓଡିଶା ରାଜନୀତି ରେ l ସବୁବେଳେ ସମସ୍ତଙ୍କ ପାଇଁ ସାହାଯ୍ୟ ଓ ସହଯୋଗ କରିବାକୁ ମୋକିମ ଆଗେଇ ଆସନ୍ତି l ଦଳୀୟ ରାଜନୀତିରେ ବି ତାଙ୍କର ଦବଦବା କିଛି କମ୍ ନୁହେଁ l ନିର୍ବାଚନ ଜିତନ୍ତୁ କି ହାରନ୍ତୁ, ଲୋକଙ୍କ ନେତା ହେଇ ସେ ରହିବାକୁ ପସନ୍ଦ କରନ୍ତି l ଯାହା ତାଙ୍କୁ ଆଜି କଟକ ଜିଲ୍ଲା ନୁହେଁ, ଓଡିଶା ରାଜନୀତିରେ ପ୍ରତିଷ୍ଠିତ କରିପାରିଛି l
ମନମୋହନ ସାମଲ : ମନମୋହନ ସାମଲ l ଜଣେ ଲଢୁଆ ରାଜନେତା ଭାବେ ସେ ପରିଚୟ ସୃଷ୍ଟି କରିଛନ୍ତି ଓଡିଶା ରାଜନୀତିରେ l ନିର୍ବାଚନ ରାଜନୀତିରେ ସେତେଟା ସଫଳ ହୋଇନଥିବା ମନମୋହନ ସାମଲ ନେତୃତ୍ଵ ନେବାର ବଡ ରାଜନେତା ଭାବେ ଓଡ଼ିଶା ରାଜନୀତିରେ ଉଦ୍ଭା ହୋଇଛନ୍ତି l ଆତ୍ମ ବିଶ୍ୱାସ ଓ ରଣକୌଶଳ ବଳରେ ସବୁ ଅସମ୍ଭବ କାମକୁ ସେ ସମ୍ଭବ କରିପାରନ୍ତି ତାଙ୍କର ରଣନୀତିରେ l ଯେତିକି ଚର୍ଚ୍ଚିତ ସେ ସେତିକ ମିଳାପି ମଧ୍ୟ ସେ l ବିଜେପି ରାଜନୀତିରେ ସେ ହେଉଛନ୍ତି ଜଣେ ଭାଗ୍ୟବାନ ରାଜନେତା l ତାଙ୍କ ସଭାପତି ସମୟରେ ବିଜେପି ସବୁବେଳେ ରାଜ୍ୟରେ ଅଧିକ ଫାଇଦା ପାଇଛି l ରାଜନୀତିରେ ସଫଳତା ହାସଲ କରିବାରେ ତାଙ୍କୁ ଭାଗ୍ୟ ସବୁବେଳେ ସାଥ ଦେଇଥାଏ l
(ଵିଦ୍ର: ଯାହା ଜନ ମାନସରେ ଆଲୋଚନା ହୁଏ, ତାହା ଆମେ ଉପସ୍ଥାପନ କରିଛୁ, ଏହି ଲେଖାରେ କାହାକୁ ଉଚ୍ଚ କି ନୀଚ ବା ଶକ୍ତିଶାଳୀ ରାଜନେତା ର ଆକ୍ଷା ଦେବା ଆମର ଉଦ୍ଦେଶ୍ୟ ନୁହେଁ,)
