ପୁରୀ : କରି କରାଉ ଥାଏ ମୁହିଁ, ମୋ ବିନୁ ଅନ୍ୟ ଗତି ନାହିଁ। ସେ ସୃଷ୍ଟି। ସେ ସ୍ରଷ୍ଟା। ତା ବିନା ଅନୁମତିରେ ଏ ଧରାରେ ଦୁବ ବି ଉଠେନାହିଁ। ତାଙ୍କ ନିଳାକୁ ବୁଝିବା ସାଧାରଣ ମାନବ ପାଇଁ ସମ୍ଭବ ନୁହେଁ। ହେଲେ ସେ ତାଙ୍କ ଭକ୍ତ ପାଇଁ ସବୁବେଳେ ବ୍ୟାକୁଳ। କେବେ ବି ଭକ୍ତଙ୍କ ଦୁଃଖ ଦେଖିପାରେନା ସେ ଭାବର ଠାକୁର। ଯାହା ଆଜି ପୁଣି ଥରେ ପ୍ରମାଣ ହୋଇଗଲା।
ଜୁନ ୧୮ ତାରିଖ ଶ୍ରୀକ୍ଷେତ୍ରରେ ରଥଯାତ୍ରା ବନ୍ଦ କରିବାକୁ ସୁପ୍ରିମକୋର୍ଟ ରାୟ ଦେଲେ। ସେ ଦିନଠାରୁ ଆଜି ଯାଏଁ ଅଗଣିତ ଜଗନ୍ନାଥ ପ୍ରେମି ତଥା ଓଡ଼ିଆ ଜାତିର ନିଦ ହଜିଯାଇଥିଲା। କାରଣ ହଟିଆ ଠାକୁର ରଥରେ ବସିବନି। ଜୟ ଜଗନ୍ନାଥ ଡାକ ଏ ଓଡ଼ିଆ ଜାତି ଶୁଣି ପାରିବନି। ହେଲେ ପ୍ରଭୁଙ୍କ ନିଳା ତ ଅପର। ସେ ମାୟାବୀ। କେମିତି ବା ସେ ତାଙ୍କ ଭକ୍ତଙ୍କ ଠାରୁ ଦୂରରେ ରହିଥାନ୍ତେ। ସମୟର ଚକ ଘୁରିଲା। ସୁପ୍ରିମକୋର୍ଟର ଏହି ଶୁଣାଣିର ଶୁଣାଣି ପୁନଃଶୁଣାଣି ପାଇଁ ଗୋଟେ ପରେ ଗୋଟେ ପିଟିସନ ଦାଖଲ ହେଲା। ଏମିତି କି ଗୋଟେ କିମ୍ବା ଦୁଇଟି ନୁହେଁ ୧୮ ପିଟିସନ ପୁନଃଶୁଣାଣି ପାଇଁ ଦାଖଲ ହେଲା। ସବୁଠାରୁ ବଡ଼ କଥା ହେଲା ଜାତି ଧର୍ମ ବର୍ଣ୍ଣ ନିର୍ବିଶେଷରେ ସମସ୍ତେ ଠାକୁର ବଡ଼ ଦାଣ୍ଡକୁ ଆସନ୍ତୁ ବୋଲି ଚାହିଁଲେ। ସେପଟେ ସୁପ୍ରିମକୋର୍ଟ ରଥଯାତ୍ରାକୁ ବନ୍ଦ କରିଦେଲେ। ହେଲେ ଏ ପଟରେ ଅନିଶ୍ଚିତତା ମଧ୍ୟରେ ମଧ୍ୟ ରଥକାର୍ଯ୍ୟ ବନ୍ଦ ହୋଇ ନଥାଏ। ଦିନ ଗଡୁଥାଏ। ଯାତ୍ରା ପାଇଁ ସମୟ କମି କମି ଆସୁଥାଏ। ପୁଣି ଥରେ ମାନ୍ୟବର ଉଚ୍ଚତମ ନ୍ୟାୟାଳୟ ରତଯାତ୍ରାର ପୁନଃ ଶୁଣାଣି ପାଇଁ ରଥଯାତ୍ରାର ଠିକ୍ ପୁର୍ବ ଦିନ ଅର୍ଥାତ ଆଜିର ଦିନକୁ ଧାର୍ୟ୍ଯ କଲେ। ସକାଳ ଯେମିତି ହେଲା ସେମିତି ରଥଯାତ୍ରାକୁ ନେଇ ଖୁସି ଖବର ଆସିବା ଆରମ୍ଭ ହୋଇଗଲା। ଉଭୟ ରାଜ୍ୟ ଓ କେନ୍ଦ୍ର ସରକାର ଘୋଷ ଯାତ୍ରା କରିବା ସପକ୍ଷରେ ପକ୍ଷ ଭୁକ୍ତ ହେଲେ। ଏମିତି କି ଖୋଦ ଗୃହମନ୍ତ୍ରୀ ଅମିତ ଶାହା ପୁରୀ ଗଜପତି ମହାରାଜଙ୍କ ସହ ରଥଯାତ୍ରା ବାବଦରେ ଆଲୋଚନା କଲେ। ଏହାସହ ତିନି ରଥରେ ମହାପ୍ରଭୁଙ୍କ ଆଜ୍ଞମାଳ ବିଜେ ହୋଇଥିଲା। ଯାହା ପରେ ରଥଯାତ୍ରାକୁ ନେଇ ସମସ୍ତଙ୍କ ଆଶା ଆହୁରି ବଢ଼ି ଯାଇଥିଲା।ଏହାପରେ ଅପରାହ୍ନରେ ସୁପ୍ରିମକୋର୍ଟଙ୍କ ୩ ଜଣିଆ ଖଣ୍ଡପୀଠ ପୁରୀରେ ରଥ ଯାତ୍ରା ନେଇ ସର୍ତ୍ତମୂଳକ ଅନୁମତି ଦେଇଛନ୍ତି । ପୁରୀରେ କର୍ଫ୍ୟୁ ମଧ୍ୟରେ ହେବ ରଥଯାତ୍ରା । କୋଟି କୋଟି ଭକ୍ତଙ୍କ ପ୍ରାର୍ଥନାର ପଣ ରଖିଲେ ଭାବର ଠାକୁର । ରଥଯାତ୍ରା ପାଇଁ କୋର୍ଟଙ୍କ ନିଷ୍ପତ୍ତି ଆସିବା ପରେ ଶ୍ରୀମନ୍ଦିର ଭିତରୁ ରଥକୁ ଛୁଟି ଆସିବେ ବଡ଼ ଠାକୁର ବଳଭଦ୍ର, ସାନ ଭଉଣୀ ସୁଭଦ୍ରା ଏବଂ ମହାପ୍ରଭୁ ଜଗନ୍ନାଥ । ରଥାରୂଢ଼ ବେ ଚତୁର୍ଦ୍ଧା ମୂର୍ତ୍ତି ।
