- Advertisement -
ଶାସକ ବିଜେପି ବିଧାୟକ ଉପାସନା ମହାପାତ୍ର ରାଜ୍ୟସଭା ନିର୍ବାଚନରେ ଚର୍ଚ୍ଚାକୁ ଆସିଛନ୍ତି l ତାଙ୍କ ଭୋଟ ପ୍ରକ୍ରିୟାକୁ ନେଇ ବିଜେଡି ପ୍ରଶ୍ନ ଉଠାଇବା ପରେ ପ୍ରାୟ 40ମିନିଟ ମତଦାନ ବନ୍ଧ ରହିଥିଲା l ରାଜ୍ୟସଭା ଭୋଟିଂ ପ୍ରକୋଷ୍ଠ ରେ ବିଧାୟିକା ଉପାସନା ମହାପାତ୍ର ଙ୍କ ଭୋଟ ଦାନ ପ୍ରକ୍ରିୟାକୁ ନେଇ ତୁମୁଳ କାଣ୍ଡ ହୋଇଛି । ତାଙ୍କ ଭୋଟ କୁ ନାକଚ କରିବା ପାଇଁ ବିଜେଡି ଏଜେଣ୍ଟ ପ୍ରାର୍ଥୀ ଓ ସଦସ୍ୟମାନେ ଅଡି ବସିଥିବା ବେଳେ ତୀବ୍ର ଆପତ୍ତି ଉଠାଇଛନ୍ତି । ଏମିତି କି ଏହି ଭୋଟ ରେ ଅନିୟମିତତା ହୋଇଥିବ ନେଇ ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ ମଧ୍ୟ ପ୍ରଶ୍ନ ଉଠାଇଛନ୍ତି। ହେଲେ ସମସ୍ତ ଯୁକ୍ତି ତର୍କ ପରେ ନିର୍ବାଚନ ଅଧିକାରୀଙ୍କ ପକ୍ଷରୁ ଉପାସନା ଙ୍କୁ ଦ୍ୱିତୀୟ ଥର ବାଲଟ ପେପର ଯୋଗାଇ ଦିଆଯାଇଛି ଓ ସେ ଭୋଟ ଦେଇଛନ୍ତି ।
ରାଜ୍ୟସଭା ଭୋଟିଂ ବେଳେ ଉପାସନା ମହାପାତ୍ର ଭୋଟ ଦେବା ପାଇଁ ଆସିଥିଲେ । ପ୍ରଥମେ ସେ ନିର୍ବାଚନ ଅଧିକାରୀଙ୍କ ଠାରୁ ବାଲଟ ପେପର ନେଇ ମତଦାନ କରିଥିଲେ।
ମାତ୍ର ଭୋଟ ବାକ୍ସରେ ବାଲଟ ପେପର ପକାଇବା ପୂର୍ବରୁ ଏଥିରେ ଓଭର ରାଇଟିଙ୍ଗ ହୋଇଯାଇଥିବା ନେଇ ସମସ୍ତଙ୍କ ସମ୍ମୁଖରେ ପ୍ରକାଶ କରିଥିଲେ । ତେଣୁ ତାଙ୍କୁ ଆଉ ଗୋଟିଏ ବାଲଟ ପେପର ଯୋଗାଇଦେବାକୁ କହିଥିଲେ । ହେଲେ ଏହାକୁ ନେଇ ବିଜେଡି ଦଳୀୟ ଏଜେଣ୍ଟ ପ୍ରତାପ ଦେବ ଓ ପୋଲିଂ ଏଜେଣ୍ଟ ପ୍ରମିଳା ମଲ୍ଲିକ ଏହାକୁ ବିରୋଧ କରିଥିଲେ। ରୁଲ ୪୧ ଅନୁଯାୟୀ ଜଣେ ଭୋଟର ଙ୍କୁ ଦୁଇଟି ବାଲଟ ପେପର ଦିଆଯାଇପାରିବ ନାହିଁ ବୋଲି ସେମାନେ ଦର୍ଶାଇଥିଲେ । ବିଜେପି ପକ୍ଷରୁ ଇରାସିସ ଆଚାର୍ଯ୍ୟ ଓ ସନ୍ତୋଷ ଖଟୁଆ ଉପାସନାଙ୍କ ସପକ୍ଷରେ ଯୁକ୍ତି କରିବା ସହ ତାଙ୍କୁ ପୁନର୍ବାର ବାଲଟ ପେପର ଯୋଗାଇ ଦେବାକୁ ଦାବି କରିଥିଲେ। କଂଗ୍ରେସର ପ୍ରତିନିଧି ଅରବିନ୍ଦ ଦାସ ମଧ୍ୟ ଦ୍ୱିତୀୟ ବାଲଟ ପେପର ପ୍ରଦାନ ଉପରେ ଆପତ୍ତି ଉଠାଇଥିଲେ । ଓଭର ରାଇଟିଙ୍ଗ ବିଷୟରେ ସର୍ବ ସମ୍ମୁଖରେ ପ୍ରକାଶ କରିଥିବାରୁ ଏହି ଭୋଟ ନାକଚ ହେବା ଉଚିତ୍ ବୋଲି ପ୍ରତାପ ଦେବ ଦାବି କରିଥିଲେ। ପରେ ପରେ ବିଜେଡି ପ୍ରାର୍ଥୀ ସଂତୃପ୍ତ ମିଶ୍ର ଓ ମିଳିତ ପ୍ରାର୍ଥୀ ଦାଟେଶ୍ୱର୍ ହୋତା ମଧ୍ୟ ଏହି ଭୋଟ କୁ ନାକଚ କରିବାକୁ ଦାବି କରିଥିଲେ । ଏହି ଯୁକ୍ତିତର୍କ ଯୋଗୁଁ ଭୋଟ ଦାନ ପ୍ରକ୍ରିୟାକୁ ପ୍ରାୟ ୪୦ ମିନିଟ ଧରି ବନ୍ଦ ରହିବା ସହ ବିବାଦ ତୀବ୍ର ହୋଇଥିଲା। ଶେଷରେ ନିର୍ବାଚନ ଅଧିକାରୀ ଉପାସନା ଙ୍କ ଯୁକ୍ତିର ସନ୍ତୋଷ ବ୍ୟକ୍ତ କରି ତାଙ୍କୁ ଦ୍ୱିତୀୟ ଥର ବାଲଟ ପେପର ଦେବାକୁ ନିଷ୍ପତ୍ତି ନେଇଥିଲେ ।
- Advertisement -
