- Advertisement -

୨୦୨୪ ଜୁନ ୪ ତାରିଖ, ୨୪ବର୍ଷର ଶାସନରେ ବ୍ରେକ ଲାଗିବା ସହ ଓଡିଶା ଶାସନର ପଟ୍ଟପରିବର୍ତ୍ତନ ହୋଇଥିଲା। ୨୪ ବର୍ଷର ନବୀନ ଶାସନର ଯୁଗ ଅନ୍ତ ହୋଇ ପ୍ରଥମଥର ଲାଗି ରାଜ୍ୟରେ ବିଜେପି ଏକାକୀ ଶାସନଭାର ଗ୍ରହଣ କରିଥିଲା। ଜୁନ ୧୨ ତାରିଖରେ ଓଡିଶାରେ ଆରମ୍ଭ ହୋଇଥିଲା ମୋହନ ସରକାର। ମୋହନ ସରକାର ଲୋକଙ୍କ ସରକାର ଆକ୍ଷା ଦେଇ ବିଜେପି ଓଡିଶାବାସୀଙ୍କ ସେବାରେ ସରକାରକୁ ନିୟୋଜିତ କରିଥିଲା । ସରକାର ଆସିବା ପରେ ବିଜେପିର ନିର୍ବାଚନୀ ପ୍ରତିଶୃତି ଅନୁସାରେ ପ୍ରଥମେ ଚାରିଦ୍ବାରା ଖୋଲିବା ସହ ଚାଷୀଙ୍କୁ ୮୦୦ ଟଙ୍କା ଇନପୁଟ ସବସିଡ଼ି ପ୍ରଦାନ କରାଯାଇଥିଲା। ମହିଳାମାନଙ୍କୁ ସୁଭଦ୍ରା ଯୋଜନାରେ ୨ବର୍ଷରେ ୫୦ ହଜାର ଟଙ୍କା ଦେବା ପାଇଁ ପ୍ରତିଶୃତି ଦେଇ ବର୍ଷକୁ ଦୁଇଥର ୧୦ ହଜାର ଟଙ୍କା ଦେଉଛନ୍ତି ମୋହନ ସରକାର। ଭତ୍ତା ୩୫୦୦ ଟଙ୍କା ଦେବାକୁ ପ୍ରତିଶୃତି ଦେଇ ସରକାର ୮୦ ବର୍ଷ ପରେ ୩୫ଶହ ଟଙ୍କା ଦେବାକୁ କହିଲେ । ସାମାଜିକ ସୁରକ୍ଷା ଭତ୍ତାକୁ ମଧ୍ୟ ମାସକୁ ମାସ ଦେବାରେ ବ୍ୟତିକ୍ରମ ଦେଖାଦେଇଛି। ରାଜ୍ୟ ସଚିବାଳୟ ବା ଲୋକସେବା ଭବନକୁ ସାମ୍ବାଦିକ ପ୍ରବେଶ କଟକଣାକୁ ହଟାଇଲେ ସତ, ହେଲେ ଗୋଟିଏ ସଂସ୍ଥାରୁ ମାତ୍ର ଜଣେ ସାମ୍ବାଦିକ ପ୍ରବେଶ ପାଇଁ ସୁଯୋଗ ଦିଆଗଲା। ବିଧାନସଭାରେ ଲବି ପାସକୁ ବନ୍ଦ କରିଦେଲେ । ଏହାସହ ସାମ୍ବାଦିକଙ୍କୁ ପେନସନ ଓ ସୁରକ୍ଷା ଦେବାରେ ବିଫଳ ହେଲେ । ୩୦୦ ୟୁନିଟ ବିଜୁଳି ମାଗଣା ଦେବାକୁ କହି ଓଡିଶାବାସୀଙ୍କ ଉପରେ ଟାଟା ପାଓ୍ବାର ଜରିଆରେ ବିଜୁଳି ବୋଝ ଏପରି ଲଦିଦେଲେ ଯେ ଖୋଦ ଶାସକ ଦଳର ବିଧାୟକ ଓ ସାଂସଦମାନେ ଏହାକୁ ନେଇ ଅସନ୍ତୋଷ ପ୍ରକାଶ କଲେ। ଚାଷୀଙ୍କ ସବୁ ଧାନ କିଣିବାର ପ୍ରତିଶୃତି ଦେଇଥିବା ମୋହନ ସରକାର ଧାନ କିଣାରେ ଅବ୍ୟବସ୍ଥାର ସମାଧାନ କରିବାରେ ବିଫଳ ହେଲେ। ଏପରିକି ଏଫସିଆଇ ୧୩ ଲକ୍ଷ ମେଟ୍ରିକ ଟନ ଚାଉଳ ଉଠାଇନଥିବାରୁ ବାରମ୍ବାର କେନ୍ଦ୍ର ସହ ଆଲୋଚନା ଚାଲିଛି କହି ଚାଷୀଙ୍କ ଠାରୁ ଚାଉଳ କିଣିପାରୁନାହାଁନ୍ତି ସରକାର। ଅବଶ୍ୟ ପୂର୍ବ ସରକାର ଅପେକ୍ଷା ଅଧିକ ଧାନ କିଣା ଯାଇଛି ବୋଲି ସରକାର ଦାବି କରୁଛନ୍ତି । ସେହିପରି ମହାନଦୀ, ପୋଲାଭରମ, କୋଟିଆ ସହ ବିଭିନ୍ନ ବଡବଡ ରାଜ୍ୟସ୍ବାର୍ଥ ସମ୍ବଳିତ ଦାବି ପୂରଣ କରିବାରେ ସେପରି କିଛି ଠୋସ ପଦକ୍ଷେପ ନେଇନାହାନ୍ତି ମୋହନ ସରକାର। ବିଜେପି ସରକାରର ୨ ବର୍ଷରେ ଆଇନ ଶୃଙ୍ଖଳା ପରିସ୍ଥିତି ସଂପୂର୍ଣ୍ଣ ବିପର୍ଯ୍ୟସ୍ତ ହୋଇଛି । ଯାହାକୁ ବିରୋଧୀ ସରକାର ବିରୋଧରେ ମୁଖ୍ୟ ଅସ୍ତ୍ର କରି ସମାଲୋଚନା କରୁଛନ୍ତି । ଅବଶ୍ୟ ପୂର୍ବ ସରକାର ଷ୍ଟାଇଲରେ ବଡବଡ ଦୁର୍ନୀତି ଖୋର ସରକାରୀ ବାବୁଙ୍କୁ ମୋହନ ସରକର ସାବାଡ କରିବା ପୁରା ସଫଳ ହୋଇଛନ୍ତି।

ମୋହନ ସରକାରରେ ୨ବର୍ଷରେ ପ୍ରଚାର ଓ ପ୍ରସାର ସହ ରଙ୍ଗ ବଦଳାଇବା, ଯୋଜନା ନାଁ ପରିବର୍ତ୍ତନ କରିବାରେ ଅଧିକ ଫୋକସ ଦିଆଯାଇଛି। ଯାହା ଏକ ସ୍ବାଭାବିକ ପ୍ରକ୍ରିୟା । ୨ ବର୍ଷରେ ବିଜେପି ସରକାର ଯେତେ ସଫଳତା ପାଇନାହିଁ ତାହାଠାରୁ ଅଧିକ ବଦନାମ ହୋଇଛି, ଯାହା ବିରୋଧୀଙ୍କୁ ବଳ ଯୋଗାଇଛି। ସରକାରକୁ ଆସିବା ପରେ ବିଜେପି ବିରୋଧୀ ଶିବିରକୁ ଫୁସ କରିବାରେ ବହୁମାତ୍ରାରେ ସଫଳ ହୋଇଛି। ନୂଆପଡ଼ା ଉପନିର୍ବାଚନ ଠାରୁ ଆରମ୍ଭ କରି ରାଜ୍ୟସଭା ନିର୍ବାଚନ ଯାଏ ମୋହନ ସଫଳ ଗୋଟିଚାଳନ କରି ସଫଳ ହୋଇଛନ୍ତି। ବିକାଶର ନକ୍ସା କେବଳ ଆଙ୍କିଥିଲେ ମଧ୍ୟ ୨ବର୍ଷ ଭିତରେ ସେପରି କିଛି ବିକାଶର ଝଲକ ଓଡିଶାବାସୀ ବିଜେପି ସରକାରରେ ଦେଖିନାହାନ୍ତି। ବିଜେପି ସରକାର କିନ୍ତୁ ନିଜର ୨ବର୍ଷର ରିପୋର୍ଟ କାର୍ଡ଼କୁ ନିଜେ ତର୍ଜମା କରି ମୋହନ ସରକାର କିପରି କଥାରେ ନୁହେଁ, କାମରେ ଲୋକଙ୍କ ସରକାର ହୋଇପାରିବ ତାହାକୁ ରାଜ୍ୟବାସୀ ଅପେକ୍ଷା କରିଛନ୍ତି। ନହେଲ ୨୪ ବର୍ଷର ନବୀନ ସରକାର ଯେମିତି କିଛି ବୁଝିବା ପୂର୍ବରୁ ଶାସନ ଗାଦିରୁ ଲୋକେ ହଟାଇଦେଲେ, ସମାନ ଦଶା ମୋହନ ସରକାର ଭୋଗିବେ ବୋଲି ରାଜନୈତିକ ସମୀକ୍ଷକମାନେ ଏବେଠାରୁ ଆକଳନ କଲେଣି।

- Advertisement -