- Advertisement -
ସାମ୍ବାଦିକଙ୍କ ଦାବି ପ୍ରତି ଉଦାସୀନ ସରକାର : ରାଜ୍ୟ ବ୍ୟାପି ଓୟୂଜେର ଆନ୍ଦୋଳନ।
ପେନସନ, ପ୍ରୋଟେକସନ୍ ଓ ଆକ୍ରିଡେସନ୍ ଦାବିରେ ମୁଖ୍ୟମନ୍ତ୍ରୀଙ୍କୁ ସ୍ମାରକପତ୍ର ।
ସାମ୍ବାଦିକଙ୍କ ଦାବି ପୁରଣ କରିବା ଦିଗରେ ରାଜ୍ୟ ସରକାର କାଳକ୍ଷେପଣ ନୀତି ଗ୍ରହଣ କରୁଥିବାରୁ ଏହାକୁ ନେଇ ଗଭୀର କ୍ଷୋଭ ପ୍ରକାଶ କରାଯାଇଛି । ପେନସନ, ପ୍ରୋଟେକସନ୍ ଓ ଆକ୍ରିଡେସନ ଦାବିକୁ ନେଇ ବିଭିନ୍ନ ସମୟରେ ସ୍ୱର ଉତ୍ତୋଳନ କରି ଆସୁଥିବା ରାଜ୍ୟର ପ୍ରମୁଖ ସଙ୍ଗଠନ ଓଡ଼ିଶା ସାମ୍ବାଦିକ ୟୁନିଅନ (ଓୟୂଜେ) ଡାକରାରେ ଶୁକ୍ରବାର ଦିନ ଶ୍ରମିକ ଦିବସକୁ ରାଜ୍ୟ ବ୍ୟାପି ସାମ୍ବାଦିକ ମାନେ ପ୍ରତିବାଦ ଦିବସ ଭାବେ ପାଳନ କରିଥିଲେ। ଏହି ଅବସରରେ ୩୦ ଟି ଜାକ ଜିଲ୍ଲାରେ ସାମ୍ବାଦିକ ମାନେ କଳା ବ୍ୟାଚ ପିନ୍ଧିବା ସହ ଜିଲ୍ଲାପାଳଙ୍କ କାର୍ଯ୍ୟଳୟ ସମ୍ମୁଖରେ ଧାରଣା ଦେଇଥିଲେ।
ରାଜଧାନୀରେ ଓୟୁଜେ ଭବନରେ ସଙ୍ଘର ରାଜ୍ୟ ସଭାପତି ପ୍ରସନ୍ନ ମହାନ୍ତିଙ୍କ ସଭାପତିତ୍ୱରେ ଅନୁଷ୍ଠିତ ପ୍ରତିବାଦ ସମାବେଶରେ ମୁଖ୍ୟ ବିରୋଧି ଦଳ ବିଜେଡି ସମେତ ବିଭିନ୍ନ ରାଜନୈତିକ ଦଳର ପ୍ରତିନିଧି ମାନେ ଯୋଗଦେଇ ସାମ୍ବାଦିକ ମାନଙ୍କ ଦାବିପ୍ରତି ସମର୍ଥନ ବ୍ୟକ୍ତ କହିଥିଲେ। ପୂର୍ବତନ ମନ୍ତ୍ରୀ ତଥା ବିଜେଡି ବିଧାୟକ ଡ଼. ଅରୁଣ ସାହୁ ସାମ୍ବାଦିକ ମାନଙ୍କ ନ୍ୟାୟୋଚିତ ଦାବି ପ୍ରତି ସରକାରଙ୍କ ଅବହେଳା ଅତ୍ୟନ୍ତ ନିନ୍ଦନୀୟ ବୋଲି ମତବ୍ୟକ୍ତ କରିବା ସହ ସେ ନିଜେ ଏ ବାବଦରେ ମୁଖ୍ୟମନ୍ତ୍ରୀଙ୍କୁ ପତ୍ର ଲେଖିବେ ବୋଲି ପ୍ରତିଶ୍ରୁତି ଦେଇଥିଲେ।
ଦେଶରେ ୧୮ଟି ରାଜ୍ୟରେ ପେନସନ ଯୋଜନା ଲାଗୁ ହୋଇଥିବା ବେଳେ ଓଡ଼ିଶାରେ ଏ ଯାଏ ଲାଗୁ ନହେବା,୧୯ ବର୍ଷରୁ ଅଧିକ ସମୟ ଧରି ସାମ୍ବାଦିକ ଅଧିସିକୃତି କମିଟି ଗଠନ ନହେବା ଏବଂ ରାଜ୍ୟରେ ସାମ୍ବାଦିକ ମାନଙ୍କ ଉପରେ ଆକ୍ରମଣ ଘଟଣା ବଢ଼ି ଚାଲିଥିବା ବେଳେ ସାମ୍ବାଦିକ ସୁରକ୍ଷା ଆଇନ ପ୍ରଣୟନ ନହେବା ଅତ୍ୟନ୍ତ କ୍ଷୋଭର ବିଷୟ ବୋଲି ସଭାପତି ଶ୍ରୀ ମହାନ୍ତି ତାଙ୍କ ବକ୍ତବ୍ୟରେ ଦର୍ଶାଇଥିଲେ। ସାଧାରଣ ସମ୍ପାଦକ କିଷାନ କୁମାର ରାଉତ ନିର୍ବାଚନ ପୂର୍ବରୁ ସାମ୍ବାଦିକଙ୍କୁ ଦିଆଯାଇଥିବା ପ୍ରତିଶ୍ରୁତି ପାଳନ କରାଯାଉନଥିବାରୁ ଏହାକୁ ନେଇ ସାମ୍ବାଦିକ ମହଲରେ ଗଭୀର କ୍ଷୋଭ ପ୍ରକାଶ ପାଇଛି ଓ ଆଗାମୀ ଦିନରେ ଏହା ବଡ଼ ଧରଣର ଆନ୍ଦୋଳନର ରୁପ ନେବ ବୋଲି ଚେତାଇ ଦେଇଥିଲେ।
ଉପସଭାପତି ପରୀକ୍ଷିତ ବିଶ୍ୱାଳ, ଜାତୀୟ କାର୍ଯ୍ୟକାରିଣୀ ସଦସ୍ୟ ଅକ୍ଷୟ କୁମାର ସାହୁ, ପ୍ରମୋଦ କୁମାର ସାମନ୍ତ ରାୟ,କଟକ ଜିଲ୍ଲା ସଭାପତି ପ୍ରଫୁଲ୍ଲ ମହାନ୍ତି, ବରିଷ୍ଠ ସଦସ୍ୟ ଅଜୟ ଦାସ , ରାଜେଶ ପଟ୍ଟନାୟକ, କମ୍ଭୂପାଣି ମିଶ୍ର, ଅଶୋକ କୁମାର ନନ୍ଦ,ଚିନ୍ମୟ ମାହାପାତ୍ର,ପ୍ରଶନ୍ନ ପାଇକରାୟ, କାର୍ଯ୍ଯକାରିଣୀ ସଦସ୍ୟ ସୁଶାନ୍ତ ବିଶ୍ୱାଳ, ଅନସର୍ ଅଲ୍ଲି, ସୁଧାଂଶୁ ପରିଡ଼ା, ଶୁଭଲକ୍ଷ୍ମୀ ସାମନ୍ତରାୟ, ଅଶ୍ୱିନୀ ସାହୁ ପ୍ରମୁଖ ଯୋଗଦେଇ ସାମ୍ବାଦିକ ମାନଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋକପାତ କରିଥିଲେ।
ଏହି ଅବସରରେ କେନ୍ଦୁଝରର ବରିଷ୍ଠ ସାମ୍ବାଦିକ କ୍ଷେତ୍ରବାସୀ ମହାକୁଡ଼ଙ୍କ ବିୟୋଗରେ ଶୋକବ୍ୟକ୍ତ କରାଯାଇଥିଲା।
ପ୍ରତିବାଦ ଦିବସ ଅବସରରେ ଓୟୁଜେ ପକ୍ଷରୁ ପେନସନ, ପ୍ରୋଟେକସନ୍, ଆକ୍ରିଡେସନ୍ ଓ ସ୍ୱାସ୍ଥ୍ୟବୀମା ରାଶି ବୃଦ୍ଧି ଦାବିରେ ଏକ ଚାରି ଦଫା ଦାବି ସମ୍ବଳିତ ସ୍ମାରକପତ୍ର ପ୍ରଦାନ କରାଯାଇ ଥିଲା।
- Advertisement -
