- Advertisement -

ବରଗଛ ପରି ପୁରା ପରିବାରକୁ ସୁରକ୍ଷା ଦିଅନ୍ତି ବାପା। ବାପା ଆକାଶ ଭଳି ଛାତ ଟିଏ,ପାହାଡ ଭଳି ଭରସାର ଉତ୍ସ,ସାଗର ଭଳି ଗଭୀର ଓ ବ୍ୟାପକ। ବାପାଙ୍କ ଦୁଃଖ କିଏ କେବେ ଦେଖିଛି ନା ଜାଣିଛି । ନା କେଉଁ ପୁଅ ଝିଅଙ୍କୁ ବାପା ତାଙ୍କ ଦୁଃଖ ଅନୁଭବ ବି କେବେ କରାଇ ଦିଅନ୍ତି। ପୁଅ ଓ ଝିଅର ସବୁ ଇଚ୍ଛା ଚୁଟକିରେ ଯିଏ ପୂରଣ କରିବା ପାଇଁ ଆଗଭର ହୁଅନ୍ତି ସେ ବାପା। ପୁଅ ଓ ଝିଅ ପାଇଁ ସଂସାରର ସବୁ ଅଦୃଶ୍ୟ ବୋଝକୁ ଯିଏ ସହଜରେ ବୋହିନେଇ ପାରନ୍ତି ସେ ବାପା। ଯିଏ,ପାହାଡ ଭଳି ଭରସାର ଉତ୍ସ,ସାଗର ଭଳି ଗଭୀର ଓ ବ୍ୟାପକ ସେ ବାପା । ସବୁ ଦିନ ,ସବୁ ମୁହୂର୍ତ୍ତ ହିଁ ବାପାଙ୍କ ତାଙ୍କ ଜୀବନ ଉତ୍ସର୍ଗୀକୃତ କରିଥାନ୍ତି ପୁଅ ଓ ଝିଅଙ୍କ ପାଇଁ । ସବୁ ସନ୍ତାନଙ୍କ ଜୀବନରେ ପିତାଙ୍କ ଅବଦାନ ଅନେକ । ସେ ଆମର ମାର୍ଗଦର୍ଶକ, ଆମ ଭରସା, ଆମ ଆତ୍ମବିଶ୍ଵାସ । ତାଙ୍କରି ଆଙ୍ଗୁଠି ଧରି ଆମେ ଜୀବନର ଚଲାପଥରେ ଚାଲିବା ଶିଖିଥାଉ। ତାଙ୍କ ନିଷ୍କପଟ ପ୍ରେମ ଓ ତ୍ୟାଗର ତୁଳନା ନାହିଁ । ବରଗଛ ପରି ପୁରା ପରିବାରକୁ ସେ ସବୁବେଳେ ସୁରକ୍ଷା ଦିଅନ୍ତି । ବାପା କାନ୍ଦନ୍ତି କି ନାହିଁ, ବରଂ ପରିବାରର କୌଣସି ସଦସ୍ୟ କେବେ କାନ୍ଧ କଣ ଜଣାଇ ଦିଅନ୍ତନି ସେଥିଲାଗି ଦିନରତି ଏକ କରିଦିଅନ୍ତି ସେ । ବାପା ଆକାଶରୁ ଜହ୍ନମାମୁଁ ଆଣିପାରନ୍ତି ଓ ପାହାଡ ଉପରେ ପୁଅ ଓ ଝିଅର ଖୁସି ପାଇଁ ଚଢିପାରନ୍ତି । ବୟସ ଯେତେ ହେଉ ବାପା କିନ୍ତୁ ସବୁବଳେ ସନ୍ତାନ ପାଇଁ ନିଜକୁ ଫିଟ୍ ଭାବନ୍ତି । ସନ୍ତାନର ସୁଖ ପାଇଁ ବାପାଙ୍କ ଆଖିକୁ ନିଦ ଆସେନି କି ପେଟକୁ ଭୋକ ଲାଗେନି। ସବୁ ଝଡ, ଯନ୍ତ୍ରଣାକୁ ଛାତିତଳେ ଚାପିରଖି ସେ ଆଗକୁ ବଢ଼ିନ୍ତି। ବର୍ଷ ସାରା ପୁରୁଣା ସାଟ ପ୍ୟାଣ୍ଟ ଓ ବାରମ୍ୱାର ମୋଚି ଠାରୁ ସିଲେଇ କରି ଚପଲ ବିନ୍ଧୁଥିଲେ ମଧ୍ୟ ସବୁ ପର୍ବପର୍ବାଣୀରୁ ଆରମ୍ଭ କରି ପୁଅ ଓ ଝିଅଙ୍କ ପାଇଁ ମନ ପସନ୍ଦର ଡ୍ରେସ କିଣି ଦିଅନ୍ତି । ସେଥିରେ ସେ ଆନନ୍ଦ ପାଆନ୍ତି, ପଚାରିଲେ କହନ୍ତି ତମେ କାହିଁକି ଚିନ୍ତା କରୁଛ ମୁଁ ଅଛି । ଛୁଆ ବେଳେ କାନ୍ଧରେ ବସାଇ ସୁନ୍ଦର ପୃଥିବୀକୁ ଯିଏ ଆମକୁ ଦେଖାଇ ଥିଲେ, ଆମ ଜୀବନଟା କେମିତି ପୁରା ସୁନ୍ଦର ହେବ ସେ ରକ୍ତକୁ ପାଣି କରିଦେଇଥାନ୍ତି। ଆଜି ମୁଁ ବଡ ହୋଇଛି, ଲୋକେ କହୁଛନ୍ତି ବାପା କାଳେ ବୁଢ଼ା ହୋଇଯାଇଛନ୍ତି । ହେଲେ ଜୀବନର ଏ ବାସ୍ତବ ଶତକୁ କଣ କୌଣସି ବାପା ଗ୍ରହଣ କରନ୍ତି। ୭୦ ବର୍ଷ ବୟସରେ ବି ସେ ମତେ ତାଙ୍କ କାନ୍ଧରେ ବସେଇ ନେବାର ଆତ୍ମ ବିଶ୍ୱାସ ଭରନ୍ତି।ଦୁନିଆରେ ଭଗବାନ ଅଛନ୍ତି , ହେଲେ ସଂସାରରେ ଚଳନ୍ତି ଭଗବାନ ହେଉଛନ୍ତି ବାପା। ସଂସାରର ସମସ୍ତ ପିତାଙ୍କ ପାଇଁ ପିତୃ ଦିବସର ଶୁଭେଚ୍ଛା ଓ ଅଭିନନ୍ଦନ। କୌଣସି ଦିବସରେ ସୀମିତ ନୁହେଁ ବାପା। ବାପାଗୁରୁ, ସାଙ୍ଗ , ବାପା ଭାଇ ଓ ବାପା ଜୀବନର ସବୁକିଛି ।ବାପାଙ୍କ ତୁଳନା ନାହିଁ, ତାଙ୍କ ପାଇଁ ଯେତେ ଲେଖିଲେ ଯଥେଷ୍ଟ ହେବନି । ଯାହାଙ୍କର କୌଣସି ବିକଳ୍ପ ନାହିଁ, ସେ ହିଁ ବାପା ଆଉ ବାପା।