ରାଜନୀତିରେ କ୍ଷମତା ଆସିବ ଓ ଯିବ। ଯେବେଠାରୁ ରାଜନୀତିର ଶବ୍ଦ ସୃଷ୍ଟି ହେଲା, ସେବେଠାରୁ ଆଜି ଯାଏ ତାହା ପ୍ରମାଣିତ ହୋଇଛି। ହେଲେ ସମ୍ପର୍କରେ ଥରେ ବାନ୍ଧିହେଲେ ସେଥିରୁ ମୁକୁଳିବା କଷ୍ଟ। ଭଲ ପାଇବା ଏପରି ଏକ ସମ୍ପର୍କ। ସେହିଭଳି ନିଃସ୍ୱାର୍ଥପର ଭଲପାଇବା ଦେଖି ଆଜି ଭାବପ୍ରବଣ ହୋଇ ଯାଇଥିଲେ ବିଜେଡି ଉପ ସଭାପତି ତଥା ଯାଜପୁରର ଲୋକପ୍ରିୟ ନେତା ପ୍ରଣବ ପ୍ରକାଶ ଦାସ(ବବି)। ଯାଜପୁର ଜିଲ୍ଲା କୋରେଇ ନିର୍ବାଚନ ମଣ୍ଡଳୀର ଷଠିପୁର ଠାରେ କୋରେଇ ବିଜେଡି ପକ୍ଷରୁ ଏକ ବନ୍ଧୁମିଳନ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଜେଡି ଉପସଭାପତି ପ୍ରଣବ ପ୍ରକାଶ ଦାସ(ବବି) ଯୋଗ ଦେଇଥିଲେ। ଏହି ଅବସରରେ ବବି କହିଥିଲେ କ୍ଷମତା ଆସିବ ଓ ଯିବ । ହେଲେ ସମ୍ପର୍କ ଆସିଲେ ଯାଏନି । କ୍ଷମତା ପଛରେ ମୁଁ ଗୋଡାଇ ନାହିଁ , ସମ୍ପର୍କ ପଛରେ ଗୋଡ଼ାଇଛି ସବୁବେଳେ । ଆଜି ମୁଁ ଖୁସି , ଏ ସଂପର୍କକୁ ମୁଁ ଭଲ ପାଇବାରେ ବାଣ୍ଟିପାରିଛି। ସେଥିପାଇଁ ମୁଁ ବହୁତ ଖୁସି। ବନ୍ଧୁ ମିଳନ କାର୍ଯ୍ୟକ୍ରମରେ ବବିଙ୍କ ଏହି କିଛି ପଦ କଥା ଉପସ୍ଥିତ ଥିବା ଲୋକଙ୍କ ମନକୁ ଭେଦିଥିଲା। ନିଜ ବାପାଙ୍କ ଗଡରେ ବାପାଙ୍କ ଘନିଷ୍ଠ ବ୍ୟକ୍ତିମାନଙ୍କ ସହ ବେଶ କିଛି ଘଣ୍ଟା ବବି ମନଖୋଲା କଥା ହୋଇଥିଲେ । ଯାଜପୁରର ମୁକୁଟ ବିହୀନ ସମ୍ରାଟ ସ୍ବର୍ଗତ ଅଶୋକ ଦାସ କୋରେଇ ନିର୍ବାଚନ ମଣ୍ଡଳୀକୁ ନିଜ ପରିବାର ପରି ଭଲ ପାଇଁ ଲୋକଂକ ସୁଖ ଓ ଦୁଃଖର ସାଥି ହୋଇଥିଲେ। କୋରେଇକୁ ସ୍ୱତନ୍ତ୍ର ପରିଚୟ ମଧ୍ୟ ଦେଇଥିଲେ ରାଜ୍ୟ ରାଜନୀତିରେ । ବାପାଙ୍କ ପରେ ବବି ବି କୋରେଇ ପ୍ରତି ତାଙ୍କ ପରିବାରର ସେ ଭଲ ପାଇବାକୁ ଭୁଲି ନାହାଁନ୍ତି । ସେ କ୍ଷମତାରେ ଥାଆନ୍ତୁ କି ନ ଥାଆନ୍ତୁ ଭଲ ପାଇବା ଓ ସମ୍ପର୍କ କୋରେଇ ସହ ସେମିତି ଅଛି । ବବିଙ୍କ ପରିବାର ପ୍ରତି ବି କୋରେଇ ବାସୀଙ୍କର ସମାନ ଭଲ ପାଇବା ଅତୁଟ ରହିଛି ତାହା ଆଜିର ବନ୍ଧୁ ମିଳନ କାର୍ଯ୍ୟକ୍ରମ ପ୍ରମାଣିତ କରିଛି।